Latgaliskais jaunūs formatūs ar mierkprogramys “KultūrELPA” atbolstu

Latgaliskais jaunūs formatūs ar mierkprogramys “KultūrELPA” atbolstu

Sagataveja: portals lakuga.lv

Marta vydā Vaļsts kulturkapitala fonds (VKKF) izsludynuoja mierkprogramu “KultūrELPA”, kab dūtu atbolstu jaunu kulturys produktu i pakolpuojumu radeišonai i jau asūšūs kulturys produktu pīmāruošonu dzeivei īrūbežuojumu apstuokļūs. Vakar, 10. majā, tyka paziņuoti programys rezultati i atbaļsteitūs projektu vydā itūgod byus ari jauni kulturys produkti latgaliski, viestej informaceja VKKF sātyslopā.

Mierkprogramys “KultūrELPA”, kurei tyka sataiseita, apvīnojūt asūšuos mierkprogramys “Nuokūtnis kulturys pīduovuojuma taiseišona vysuos kulturys nūzarēs” i “Kulturys pīduovuojums digitalajā vidē” vīnā mierkprogramā, mierkis ir dūt atbolstu jaunu kulturys produktu i pakolpuojumu radeišonai i jau izstruoduotūs kulturys produktu i pakolpuojumu pīlāguošonai i eistynuošonai asūšūs īrūbežuojumu apstuokļūs vysuos kulturys sferuos, krizis laikā nūdrūsynojūt kulturys daīmameibu plotam īdzeivuotuoju lūkam, aptverūt dažaidys mierkgrupys i nūdrūsynojūt regionalū puorkluojumu.

VKKF mierkprogramā īsnāgtūs projektu skaits beja 856, bet atbaļsteiti tyka 204 projekti – literaturys nūzarē 30, dizaina i arhitekturys nūzarē – 10, tradicionaluos kulturys nūzarē – 11, muzykys i dejis muokslys nūzarē – 38 projekti, teatra muokslys nūzarē – 22 projekti, kulturys montuojuma nūzarē – 27 projekti, kinu muokslys nūzarē – 21 projekts, vizualuos muokslys nūzarē – 30 projekti i atbaļsteiti ari 15 storpdisciplinari projekti.

Vysu atbaļsteitūs projektu vydā atbolstu sajiemuši ari vairuoki projekti, kurūs paradzāts jaunus formatus īdūt ari latgaliskajom aktivitatem:

Literaturys nūzarē atbolstu sajiems bīdreibys “LgSC” projekts – “Stuostu kruojuma “Dzeiveiba” radejis lasejumi” (sajimtais finansiejums 5000 €), kurā planavuots, sasadorbojūt ar Latvejis Radejis Latgolys multimedeju studeju, itūgod sataiseit Ilzis Spergys stuostu kruojuma “Dzeiveiba” stuostus radejis lasejumu formatā. Tī byus da ituo pyrmī piļneibā latgaliski skonūšī radejis lasejumi i radejis – Latvejis Radejis 1 – eterā izskanēs ituo goda decembrī.

Muzykys i dejis muokslys nūzarē atbolstu sajiems sasatikšonys festivals “VASALI GORĀ!” Latgolys viestnīceibys GORS vosorys telpā (sajimtais atbolsts 27 000 €). Kai portalam pastuosteja GORS Muokslinīcyskuos i pasuokumu nūdalis vadeituoja Ilona Rupaine, nu breiža, kod ļaus pastuovūšī īrūbežuojumi, pi Latgolys viestnīceibys GORS īcarāti nedeļgoli ar muzykys i kino nūtikšonom.

Kulturys montuojuma nūzarē atbolstu sajiems Baļtinovys nūvoda dūmis projekts “Izzinošas mobilās lietotnes BALTINAVA ZOOM izstrāde Baltinavas novada kultūrvēsturiskā mantojuma aktīvai iepazīšanai” (sajimtais atbolsts 8000 €), bet tradicionaluos kulturys nūzarē atbaļsteits bīdreibys “LgSC” projekts “Sibīrijas etnolingvistisko ekspedīciju materiālu publiskošana” (sajimtais atbolsts 9000 €), kurymā tiks apkūpuoti i digitalā veidā publiski, sataisūt kolekceju Latvīšu folklorys kruotivis digitalajā arhivā garamantas.lv, daīmami padareiti Lidejis Leikumys vadeitajuos ekspedicejuos iz Sibiri sovulaik savuoktī dažaidu formatu materiali par Sibira latgalīšim.

Storpdisciplinarūs projektu kategorejā atbolstu sajiemuši diveji projekti: Annelis Slišānis gruomotys “#100dečiLatvijai” padareišona daīmamai dažaidūs formatūs – digitalā, tauktilā i audio-vizualā, lai ar gruomotu-izstuodi var īsapazeit vēļ leluoka i dažaiduoka auditoreja (eistynuotuojs SIA “Anneles zeme, sajimtais atbolsts 9000 €), taipat atbaļsteits bīdreibys “LgSC” projekts “Dzejūli i dzīsmis bārnim “Vuškeņa iz pļovys” (sajimtais atbolsts 8000 €), kurā paradzāta Ilzis Spergys dzejūļu gruomotys bārnim izdūšona i septenim nu vysim dzejūlim tops Kristapa Rasima sakomponātys dzīsmis bārnim, kas piečuok byus daīmamys bezmoksys gon audio, gon video albumu formatā – kai papyldu materials saimem ar bārnim latgalīšu volūdys lītuošonys veicynuošonai.

Mierkprogramā “KultūrELPA” atbaļsteitī projekti juoeistynoj da 2021. goda. Informaceja par vysim atbaļsteitajim projektim atrūnoma Vaļsts kulturkapitala fonda sātyslopā ITE.

Print Friendly, PDF & Email

Kalenders

Feb
24
Sai
14:00 Koncertizvadums “Atgriežamies La... @ Latvejis Nacionalais teatris
Koncertizvadums “Atgriežamies La... @ Latvejis Nacionalais teatris
Feb 24 @ 14:00 – 16:00
Latgolys cylvāku spāks i humora dzierksts, kai ari vaira nakai 100 nūspālātys “Latgola.lv” izruodis īdrūsynuojušys autorus taiseit koncertizvadumu “Atgriežamies Latgolā”. Itamā kompanejā ir apsavīnuojuši režisors Valdis Lūriņš, komponists Valdis Zilveris, dzīšmu tekstu autors Jānis Peters,[...]
18:00 Koncertizvadums “Atgriežamies La... @ Latvejis Nacionalais teatris
Koncertizvadums “Atgriežamies La... @ Latvejis Nacionalais teatris
Feb 24 @ 18:00 – 20:00
Latgolys cylvāku spāks i humora dzierksts, kai ari vaira nakai 100 nūspālātys “Latgola.lv” izruodis īdrūsynuojušys autorus taiseit koncertizvadumu “Atgriežamies Latgolā”. Itamā kompanejā ir apsavīnuojuši režisors Valdis Lūriņš, komponists Valdis Zilveris, dzīšmu tekstu autors Jānis Peters,[...]