Prezentēs gruomotu par Ūzulaini “Ozolzīles zīmē”

Prezentēs gruomotu par Ūzulaini “Ozolzīles zīmē”

Intervejis autore: Sintija Augustova, portals lakuga.lv

Itū sastdiņ, 7. augustā, Rēzeknis nūvoda Ūzulainis pogosta svātkūs prezentēs gruomotu, kas veļteita i suokta veiduot pogosta 80 godu jubilejai – “Ozolzīles zīmē”. Par emocejom puora dīnys pyrma gruomotys publiskys attaiseišonys apsavaicuojom Ūzulainis pogosta puorvaļdis vadeituojam i idejis autoram Edgaram Blinovam.

Kaidys sajiutys breidī, kod tiuleiņ, tiuleiņ tiks tautā palaista gruomota par Ūzulaini?

Sajiutys ir cīši īspaideigys i grandiozys, deļtam ka tys ir muns pyrmais gora dorbs sadarbeibā ar Sandru Ūdri, prīca, ka mums itys ir izadevs. Gruomota nu tipografejis atīs 5. augustā, kas reizē ir ari muna dzimšonys dīna, rikteiga duovona saīs. Sapyns par taidu gruomotu maņ jau ir seņ – pyrma stuojūs omotā par Ūzulainis pogosta vadeituoju – nu 2013. goda. Pakuopeniski itys sapyns ir puortaps realitatē. 

Studejūt Rēzeknis Augstškolā (niu Rēzeknis Tehnologeju akademeja – S. A.), tūlaik Juridiskajā fakultatē, mani cīši uzrunuoja filologu folklorys ekspedicejis, maņ vysod ir gribiejīs nazkū taidu izpieteit sovā pogostā. Byudams pogosta vadeituoja omotā, pīsaisteju sovus darbinīkus, projektu vadeituojus i pazinis.

Folklorys ekspediceja 2019. godā. Karteņa: Māris Justs

Maņ ir lapnums, ka maņ izadeve sarunuot i vīnuotīs ar tuo laika Izgleiteibys ministri Ilgu Šuplinsku, lai jei maņ paleidz vysu saorganizēt, jei pīkryta itai avaturai. Saprūtams, ka mums ir lelys materialu skaudzis i pylni skapi ar vuoktim i atšifrātim ekspedicejis materialim, fotografejom.

Dīvamžāl juoatzeist, ka vysu nasaguoja īkļaut gruomotā, nav īspiejams vysu tik eisā laikā aptvert i salikt gruomotā.  Sandra pīzyna, ka šaļtim ari gryuši guojs, bet sevkurā gadejumā vyss ir veiksmeigai pabeigts i realizāts, gaidu sovu dzimšonys dīnu.

2019. godā beja folklorys ekspediceja, kurā tyka vuokta informaceja gruomotai, varbyut jums ir kaida atmiņa, kas nu tuos palykuse pruotā?

Maņ patyka, es pats personeigi ari pīsadaleju, tei ir tik kolosala sajiuta, kod saīt uzzynuot kū jaunu par tū vītu, kur esi dzims, audzs i dūmoj dzeivuot tuoļuok. Ir daudz interesantu nūtykumu, faktu, pīruodejumu, viesturisku olūtu, dokumentu, kas aplīcynoj, ka kotrai vītai, kotrai sādžai i cīmatam ir sova nūzeime. (Vaira par ekspediceju var skaiteit ITE – S.A.)

Grybu uzsvērt, ka vysleluokuo boguoteiba ir myusu cylvāki. Kod suoču veiduot itū ideju, sasaskuoru ar aizruodejumu – kur jius bejot agruok, parkū naprasejot tim, kuri tū vysu zynuoja. Dīvamžāl ir cylvāki, kas nav sagaidejuši itū gruomotu, aizguojuši myužeibā, bet davuši sovu īguļdejumu, lai ituos gruomotys saturu radeitu vēļ interesantuoku ar stuostim par nūtikšonom i viesturiskom līceibom.

Gruomota tapa par gūdu Ūzulainis 80. godu jubilejai, tok par gūdu jubilejai 2019. godā tyka izdūta ari filma “Mēs kā zīles ozolā”, jius asat ituos filmys autors.

Zinit, viskolosaluokuos sajiutys i emocejis saīt dabuot tod, kod redzi, ka gola rezultatu viertej, skaita i verās cylvāki, kuri saprūt, par kū ir runa. Kod beja filmys pyrmizruode, es vierūs na jau filmu, kuru īprīšk montejūt beju redziejs symtim raižu, es vierūs iz cylvāku emocejom i reakcejom, tuos sajiutys ir zalta vārtys.

Maņ ir taida poša cereiba, ka myusu ar Sandru dorbs naatstuos nivīnu vīnaldzeigu. Dorbs pi gruomotys pajēme na tikai munu droba laiku, bet ari breivū laiku, kū es varieju veļteit saimei, radinīkim, es pietieju fotografejis, apmeklieju bibliotekys, maņ pateik portals periodika.lv, tī var atrast vierteigu informaceju. Pietejūt kartis, īraudzeju sovu pogostu nu cyta skotu punkta.

Paguojušugod Ūzulainē atkluoja ari ūzula skulpturu, kū tei simbolizej?

Ūzuls ir Ūzulainis simbols, pogosta atpazeišonys zeime, mes ari asam izveiduojuši Ūzulainis pogosta identitatis gruomotu. Tys ir vidis objekts, vīta, kur sasatikt, vīta, kur nūsafotografēt. Ūzuls līkās ilgmyužeigs, styngrs, styprs, maņ grybātūs, lai myusu pogosts, lai myusu cylvāki byutu leidzeigi.

Ūzulainis ūzula skulptura. Karteņa: Edgars Blinovs

Mierkis beja ari sakuortuot tū vītu, kur niu ir skulptura, jei izaver pīviļceiga, lobīkuortuota, pīvylynoj na tikai vītejūs, bet ari turistus, kas brauc garom. Ūzūlainis pogostam ir sovs simbols, zeime – Ūzuls, ūzulzeile, kai soka poši pogosta ļauds – kotram nu jim ir sova zeile nu leluo ūzula. 

Print Friendly, PDF & Email

Nūtikšonu kalendars

Jan
26
Tre
vysu dīnu Nūvodpietnīceibys lasejumi prāve... @ Bolvu Nūvoda muzejs, tīšsaiste
Nūvodpietnīceibys lasejumi prāve... @ Bolvu Nūvoda muzejs, tīšsaiste
Jan 26 vysu dīnu
Nūvodpietnīceibys lasejumi prāvesta Alberta Budžis pīmiņai @ Bolvu Nūvoda muzejs, tīšsaiste
Gūdynojūt prāvesta Alberta Budžis (1930–1957–2017) atceri, Bolvu Centraluo biblioteka aicynoj pietnīkus pīsadaleit “Novadpētniecības lasījumos prāvesta Alberta Budžes piemiņai”. Tēmu lūks nav īrūbežuots, jis ītvar sevkuru pietnīku interesejūšu jūmu, kurys izpietis teritoreja ir Bolvu nūvods. Lasejumu[...]
Jan
28
Pīk
19:00 Gruomotys “Mīlas kastings” muzyk... @ Babeitis Kulturizgleiteibys centrs
Gruomotys “Mīlas kastings” muzyk... @ Babeitis Kulturizgleiteibys centrs
Jan 28 @ 19:00 – 21:00
Gruomotys "Mīlas kastings" muzykaluo prezentaceja @ Babeitis Kulturizgleiteibys centrs
28. janvarī 19.00 Babeitis Kulturizgleiteibys centra lelajā zalē, Piņkūs, nūtiks rakstneicys Ilzis Aizsilys gruomotys “Mīlas kastings” muzykaluo prezentaceja.   Par latgalisku nūskaņu pasaryupēs: rakstneica Ilze Aizsila i improvizators Viesturs Vizulis; muzykys grupa “Dabasu Durovys”; videjuos[...]