Tiks izdūta Leivuona nūvoda tradicionalajai kulturai veļteita gruomota

Tiks izdūta Leivuona nūvoda tradicionalajai kulturai veļteita gruomota

Rokstu sagataveja: portals lakuga.lv

Ituo gods golā izīs bejušuo Leivuona pogosta folklorai veļteita gruomota “Līvānu novads tradīcijās, dziesmās un stāstos”. Tuos veiduotuojs i idejis autors ir Leivuona nūvoda īdzeivuotuojs, folklorys kūpys “Ceiruleits” daleibnīks Mairis Iesalnieks. Gruomota tūp sadarbeibā ar bīdreibu “LgSC” i tei byus daīmama papeira formatā vysim interesentim.

Dorbs pi gruomotys suocēs jau pyrma vairuoku godu, kod gruomotys veiduotuojam rodusēs interese par Leivuona apleicīni daīmamajūs arhivu materialūs. Mairis stuosta, ka suokumā tys bejs kai breivuo laika pavadeišonys veids, kab kavātu laiku viļcīnī. Vys tik materialu suoka palikt arviņ vaira i vaira, leidz tū kūpskaits sasnīdze 20 000 vīneibu. Tai autors saprats, ka taidu daudzumu informacejis turēt zam pyura byutu grāks, i rodusēs ideja par gruomotys tapšonu.

Gruomotā byus apkūpuotys vaira nakai 5000 Latvīšu folklorys kruotivis digitaluo arhiva garamantas.lv vīneibu, kas leidz šam nav bejušys izdūtys cytuos gruomotuos. Pamatā tī asūt materiali nu viesturiskuo Leivuona pogosta rūbežim. Rudzātu pogosta materiali jau ir bejuši publicāti Juoņa Būmaņa gruomotā “Ošas upes krastu dziesmas un stāsti”. Gruomota teik taiseita, bolstūtīs iz tradicionalajim svātkim i dzeivis gūdim, bet tuos sadalis ir veiduotys, apkūpojūt materialus par godskuortu īražom, dzeivis gūdim i jaunuokajim laikim. Vysu dzīšmu i ticiejumu vydā varēs atrast ari puosokys, zabagonus, parunys, teikys, buramvuordus i daudz kū cytu.

Karteņā: Tylts par Dubnys upi. Biļde nu Leivuona stykla i amatnīceibys centra kruojuma

Mairis Iesalnieks, kurs ītogod sajiems ari Latvejis folklorys bīdreibys folklorys bolvys “Austras koks” veicynuošonys bolvu nominacejā “Iedvesma”, soka: “Gruomotys “Līvānu novads tradīcijās, dziesmās un stāstos” mierkis ir radeit cylvākūs interesi par sovu dzymtū vītu i popularizēt folklorys materialu izpēti. Cylvāki parosti napīvierš uzmaneibu sovu tyvynīku atmiņom i dzeivis gudreibom, leidz jau ir par vālu. Cerams, ka itei gruomota koč vīnam jaunīšam dūs īdvesmu pīraksteit, voi koč atsasēst i parunuot ar savu babu, pīraksteit kas jai ir pruotā, kab tys naaizīt zudeibā. Tys nav gryuši, jo eipaši niu, kod kotram karmanā ir diktafons, kamera i fotoaparats. Byutu cīš labi, ka kotram pogostam byutu pa tuodai gruomotai!”

Gruomotā daīmamī folklorys materiali tiks papildynuoti ar Annys Kārklis stuostim i aprokstim, kab gruomota byutu interesantuoka ari tim, kas kasdīnā ar folkloru nanūsadorboj. Izdavuma redaktore ir latgalīšu volūdys specialiste, literate Ilze Sperga, taipat gruomotys sakuortuošonā byus pīsaisteits Latvīšu folklorys kruotivis specialistu atbolsts. Gruomotys vizualuo nūformiejuma autore – muokslineica Dana Vasiļjeva. Gruomotys tapšonā tyka apzynuoti daudzi vītejī īdzeivuotuoji, leidz ar tū tekti tiks papyldinuoti ar vairuokom kai privatu, tai vaļsts arhivu fotografejom.

Paradzāts, ka izdavums izīs ituo goda golā. Tuo atkluošanai īcarāta ari nūtikšona Leivuona nūvoda kulturys centrā ar nūvoda folklorys kūpu pīsadaleišonu, vys tik tys byus atkareigs nu tymā laikā vaļstī pastuovūšajim īrūbežuojumim.

Izdavuma “Līvānu novads tradīcijās, dziesmās un stāstos” izdeviejs ir bīdreiba “LgSC”, bet tuos tapšona ir īspiejama ar Leivuona nūvoda dūmis, Viduslatgales pārnovadu fonda, Vaļsts kulturkapitala fonda i Latgolys kulturys programys paleigu, kū eistynoj Latgolys regiona atteisteibys agentura ar Vaļsts kulturkapitala fonda i A/S “Latvijas valsts meži” atbolstu.

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]