Alda Bukša kriminalromans “Bruoli” izdūts ari lītaunīku volūdā

Alda Bukša kriminalromans “Bruoli” izdūts ari lītaunīku volūdā

Rokstu sagataveja: portals lakuga.lv

Rakstnīka Alda Bukša 2020. goda golā izdūtais kriminalromans “Brāļi/Bruoli” niu izdūts ari lītaunīku volūdā, viestej rakstnīka puorstuovu atsyuteituo informaceja. Kriminalromans ituo goda suokumā sajēme Latgalīšu kulturys goda bolvu “Boņuks”, bet niu, oktobrī, tys ir daīmams ari lītaunīku skaiteituojim. Romanu Lītovā izdavuse izdevnīceiba “Litera”, kurys sātysvīta ir Šauli.

“Bruoli/Brāli”, kas izdūts obejuos latvīšu volūdys rokstu tradicejuos, ir stuosts par tū, kai naveiksmeiga pokera spēle ekskluzivā Londonys klubā latvīti Edgaru īvalk nūtikšonu kēdē, kas nūvad jū Helsinku cītumā. Pa itū laiku Igaunejā bez viests pagaist Edgara jaunuokais bruoļs. Aizasuoc Edgara pāddziņa gaitys: nu Igaunejis iz Zīmeļlatgolu, Latvejis-Krīvejis pīrubeža jūslu i Londonu, pa drupeišam izgaismojūt sarežgeitu storptautysku nūzīdzeibys teiklu.

Romanu iz lītaunīku volūdu puolykuse Dzintra Elga Irbīte, pasasokūt kurai lītaunīku skaiteituojim jau ir bejuse vareiba skaiteit vaira nakai desmit latvīšu rakstnīku literarūs dorbus, kurūs vydā Evys Mārtužys romanus, kai ari Aleksandra Grīna viesturiskū romanu “Nameja gredzens”.

Kriminalromana autors Aldis Bukšs par nūtikšonu soka: “Vīna nu romana temu – nalegaluo rūbežpuorkuopšona i austrumu sābru vaļsts īsaiste tuos organiziešonā – niu tei ir tykuse par problemu kai Latvejai, tai Lītovai. Pīļaunu, ka tys lītaunīku skaiteituojim liks romanu izbaudeit vēļ dzeivuok.”

Aldis Bukšs, kura dzymtuo puse ir niulinejais Bolvu nūvods, ir kriminalromanu “Parādu piedzinēji” i “Brāļi/Bruoli” autors, kai ari pylnmetražys kinys “Maiņa” (2020) scenareja leidzautors. Bukša debejis kriminalromanu “Parādu piedzinēji” izdevnīceiba “Dienas grāmata”, kas ir ari “Brāļi/Bruoli” izdeviejs, izdeve 2015. godā, romans tics atzineigi nūvārtāts skaiteituoju vydā. Obejuos latvīšu volūdys rokstu tradicejuos kriminalromans “Brāļi/Bruoli” izdūts 2020. goda golā, tys ir pyrmais kriminalromans latgaliski, pi latgaliskuo gruomtoys varianta rakstnīkam tolkā guojuse volūdys specialiste Māra Mortuzāne-Muravska. Par padareitū Bukšs sajēme Latgalīšu kulturys goda bolvu “Boņuks 2020”. 2021. goda majā kriminalromans “Brāļi” tyka īkļauts fraņču tīšsaistis žurnala “Le Grand Contonent” (legrandcontinent.eu) juņa gruomotu izlasē. Vaira par Aldi Bukšu i kriminalromanu “Brāļi/Bruoli” skaiti ari portala lakuga.lv sarunā ITE.

Kalenders

Jun
16
Pyr
17:00 Seminars “Mutvuordu viesturis ol... @ Kruoslovys nūvoda muzejs
Seminars “Mutvuordu viesturis ol... @ Kruoslovys nūvoda muzejs
Jun 16 @ 17:00
Seminars "Mutvuordu viesturis olūtu izmontuošona 20. godu symta viesturis pietnīceibā" @ Kruoslovys nūvoda muzejs
Viesturnīki, muzeju darbinīki, 16. junī 17.00 stuņdēs bibliotekari nūvodpietnīki i cyti interesenti aicynuoti iz seminaru “Mutvuordu viesturis olūtu izmontuošona 20. godu symta viesturis pietnīceibā” Kruoslovys nūvoda muzejā.
Jun
19
Cat
06:45 Pasuokums “FIZISKAIS RŪBEŽS: kul...
Pasuokums “FIZISKAIS RŪBEŽS: kul...
Jun 19 @ 06:45 – 18:45
Pasuokums "FIZISKAIS RŪBEŽS: kulturys nūzeime i pīejameiba Latvejis austrumu regionā"
Latgolys muokslys i kulturys platforma MUD LAB aicynoj iz storpdisciplinaru pasuokumu FIZISKAIS RŪBEŽS, kas nūtiks Leivuonā ituo gods 19. junī, daudzfunkcionaluo jaunīšu iniciativu centra “Kvartāls” futbola laukumā i Leivuon dzeļžaceļa stacejā. Pasuokums, kurā pīsadaleis kai[...]
18:00 Seminars “Viesturis olūtu komple... @ Kruoslovys nūvoda muzejs
Seminars “Viesturis olūtu komple... @ Kruoslovys nūvoda muzejs
Jun 19 @ 18:00
Seminars "Viesturis olūtu kompleksuo izpiete: mutvuordu viesturis olūti i fotografejis" @ Kruoslovys nūvoda muzejs
19. junī 18.00 stuņdēs Kruoslovys nūvoda muzejā nūtiks seminars “Viesturis olūtu kompleksuo izpiete: mutvuordu viesturis olūti i fotografejis”.
18:30 Izruode “Melnais piens/2024” @ Jaunais Reigys teatris
Izruode “Melnais piens/2024” @ Jaunais Reigys teatris
Jun 19 @ 18:30 – 20:15
Paguojuši 15 godi, kai JRT roduos izruode “Melnais piens”. Itei izruode paruoda, ka teatram nav obligati vysod juobyut baļsteitam iz destrukceju i konfliktim. Tys var byut ari par harmoneju i skaistumu, koč i skumeigu. Vizuali[...]