Izdūts laikmeteiguos latgalīšu muzykys mini albums “Dīna bez gola”

Izdūts laikmeteiguos latgalīšu muzykys mini albums “Dīna bez gola”

Rokstu sagataveja: portals lakuga.lv

Pīcu dzīšmu mini albumā (EP) “Dīna bez gola” sakuortuoti i digitali izdūti dažaidu latgalīšu muziķu jaundorbu dzīšmu stuosti, viestej bīdreibys “Latgolys Producentu Grupa” portalam atsyuteituo informaceja. Projekta idejis autors i producents ir Mārcis Lipskis, kurs albumā apvīnuojs muzykys žanrus nu poproka da diskofanka.

Kai projekta prezentacejis singlys tyka izvālāta dzīsme “Dīna bez gola”, kū Mārcis Lipskis radejs sadarbeibā ar Arni Slobožaninu. Dzīsme īpazeistynoj ar albuma kūpeigū nūskaņu i dūmu, tuoļuok sekojūt cytim stuostim i puordūmom. Vaira par dzīsmi var puorskaiteit ITE.

Dzīsme “Tu nāc”, kurymā pīsadola Mārtiņš Strods i hiphopa muokslinīks Bruolāns, viestej par sasatikšonys īrūbežuojumu sekom, deļkuo ir īrūbežuota vareiba aizsuokt jaunys attīceibys, līkūt viņ sepinēt par sovu īspiejamū ūtrū puseiti, i gaideit, kod gols golā legali kaidu varēs satikt.

“Sovvaļņīka” skaņdorbs ar Annys Rancānis vuordim “Vīna Rāzna” viestej par naprīceigom puordūmom par lītom, kas dzeivē, ari saisteibā ar pandemejis īrūbežuojumim, jau ir nūkavātys i, vysā tycams, ka tai ari nikod naīsadūs dabuot atpakaļ. Skaņdorbs ir metalmuzykys žanrā, kas dzīsmis idejai dadūt cīši spylgtu emoceju i nūskaņu.

Dzīsme “AssBook’a” ir Gunta Rasima puordūmys par socialūs teiklu komentaru kulturu vītejā vidē. Skaņdorbs ir ar nalelu ironejis davu, sovā veidā až pasazūbojūt par škārsteikla komentaru troļim, kurim sovu guodu izsaceišona škārsteiklā teik pīleidzynuota sovpateigai religejai, bez kuruos dīna eistyn nabyus pīpiļdeita. Dzīsmis autori atzeist, ka itys ir cīši aktuals temats, kas jo eipaši aktivizējīs taišni pandemejis laikā.

Vysu dzīšmu cyklu nūslādz Mārča Lipska originalkompoziceja ar Denisa Paškeviča i Dionas Liepiņas pīsadaleišonu, kas aicynoj klauseituojus byut mīreiguokim i nasastreidēt sovā vydā. Itys periods vysā lelai nacejis daļai ir lics encētīs vīnam iz ūtra, deļtuo jo svareigi ir pīdūmuot par sovu emocionalū uzvedeibu i dūmuot ar sovu golvu. Aiz tuo i dzīsmei dūts drupeit provokativs nūsaukums “Beidziet lekties!”.

Jamūt vārā cik dažaidu izpiļdeituoju sastuovu, albums ir žanriski dažaids i viestej ari par latgalīšu plotū dzeivis uztveris lauku. Itys bejs vīns nu punktu, kas albuma salikšonu padarejs vys gryušuoku. Kotrs dzīsme ir kai atseviškys singlys, kas reizē bejs eipašs izaicynuojums albuma “Dīna bez gola” producentam Mārcim Lipskim. Mini albumu īskaņuojuši Artis Boriss, Deniss Paškevičs, Jurgis Lipskis, Armands Ozoliņš i cyti muziki. “Itys ir naīrosts, nu svareigs davums latgalīšu laikmeteigajai kulturai i vīni nu vodūšūs Latgolys muziķu otkon ir davuši par sevi zynuot!” par albumu eisi soka izdevieji.

Mini albums klauseituojim digitalā formatā byus daīmams YouTube, Facebook, kai ari Spotify i iTunes. “Dīna bez gola” vuoceņa biļdis autoris ir muokslineicys Evika Muizniece i Dana Vasiļjeva.

Dzīšmu cykla “Dīna bez gola” jaundorbu īroksts i tapšona bejuse īspiejama, pasateicūt Latgolys kulturys programai, kurū eistynoj Vaļsts kulturkapitala fonds, A/S “Latvijas valsts meži” i Latgolys regiona atteisteibys agentura.

Print Friendly, PDF & Email

Nūtikšonu kalendars

Jan
28
Pīk
20:00 Latgalīšu kuknei – gods @ tīšsaistē
Latgalīšu kuknei – gods @ tīšsaistē
Jan 28 @ 20:00 – 21:30
Latgalīšu kuknei - gods @ tīšsaistē
Vaira informacejis: Latgalīšu kuknis Facebook lopā
Jan
31
Pyr
22:00 Referatu pīsaceišona Latgolys ko... @ Tīšsaistē
Referatu pīsaceišona Latgolys ko... @ Tīšsaistē
Jan 31 @ 22:00
Referatu pīsaceišona Latgolys kongresam @ Tīšsaistē
2022. gods 31. janvars ir pādejuo dīna, kod 27.-29. aprelī nūteikūšajam Latgolys kongresam var pīsaceit sovus referatus. Kongresa tema – “Latgaliskuma kods Eiropā: nu volūdys da ekonomikai”. Aicynuojums pīsadaleit kongresā (ar referatu voi stenda referatu) ITE.[...]