Izdūts Valentina Lukaševiča eseju kruojums “Casnāgu maizeitis”

Izdūts Valentina Lukaševiča eseju kruojums “Casnāgu maizeitis”

Rokstu sagataveja: portals lakuga.lv

Izguojs rakstnīka, literaturzynuotnīka Valentina Lukaševiča eseju kruojums “Casnāgu maizeitis”, kas skaiteituojim ļaus da šam īcīneitū latgalīšu dzejis autoru īpazeit ari kai publicistu, informej latgalīšu gruomotu izdevieja SIA “Cymuss” puorstuovi. Gruomota ir na viņ aforismu pylns redzīņs iz lītom, kas nikod napuorīt, bet ari nūzeimeigs danasums latgalīšu esejistikai i latgalīšu rokstu volūdys lītuojuma boguotynuošonai voi pat drūsmeigs sūļs preteimā latgalīšu literaturys ainovys revitaliziešonai.

Gruomotā “Casnāgu maizeitis” apkūpuotys 39 autora esejis, kas īprīšk publicātys drukuotajā periodikā i elektroniskajūs medejūs. V. Lukaševičs ir bejs ikmieneša kolumnists laikrokstā “Latvijas Avīze” (2004–2008) i latgaliski rakstejs puordūmys par sovim nūvāruojumim, tuo laika aktualitatem i puordzeivuojumim, daguojs da plašuoku atziņu par sabīdreibā voldūšajom tendencem i lykumsakareibom, tymā skaitā ari par latgalīšu volūdu i literaturu. Eseju apkūpuošona gruomotā tom dūd jaunu dzeivi, snādzūt vareibu vīnuvīt puorskaiteit puordūmu pylnū V. Lukaševiča tekstu radeitū pasauli, kas reizē i nūjauc, i paplašynoj uztveris i saprasšonys rūbežus.

Koč i V. Lukaševiča publicistikys dorbi da šam skaiteituojim ir bejuši mozuok zynomi, autora vuords komentarus naprosa. V. Lukaševičs ir latgalīšu pyrmūs postmodernūs romanu “Seppuku iz saulis vādara” (1995) i “Valerjana dzeive i redzīni” (1996) leidzautors kūpā ar Oskaru Seikstu, autors vērtinei dzejis gruomotu: “Kuozynda” (2005), “Vot taidi vot i batvini” (2006), “Bolti burti” (2011), “Pādi navā svāti” (2020). Vīna nu autora dzejūļu gruomotu “Bolti burti” sajāmuse Latvejis Literaturys goda bolvys LaLiGaBa specialū bolvu. V. Lukaševičs ir īcīneits ari kai sižetu autors Latvejis Radejis 1 kasnedelis programai “Kolnasāta” i LTV1 raidejumam “Cytaidi latviskais”.

Fragments nu gruomotys “Casnāgu maizeitis” vizualizaceju, autore Zane Vucena.

Kai soka pats V. Lukaševičs, jam apleik asūšajā pasaulī pateik tys, kas ir interesants i dabisks reizē: “Gruomotys ir tys pats, kas sapyni. Tik sapynus mes navarim izavielēt, bet gruomotys varim gon. Pādejā laikā maņ vysvairuok pateik proza. Beja laiks, kod vairuok patyka dzejūli, a tagad pateik mozuok i mozuok. Aiški, ka nazkas izamaineja i manī, bet – golvonais – maņ ruodīs, ka cīši izamaineja poezeja. Rokstu, kod gribīs. Kai sovys slapņuos, nateiruos zečis izžmīgdams. Kai skali klīgdams meža vydā, bo zyni – dyžan napatrauciesi. Kai butelē īlīkūt gruomateņu i īsvīžūt okeanā. Apmāram tai. Piec saraksteituo nūdrukuošonys napamatu nikaidu manuskriptu, papeira striemeļu, bloknoteņu, mapeišu i tt. Vysu musornīkā.”

Kruojuma “Casnāgu maizeitis” redaktore — Ilze Sperga. Gruomotys izdeviejs — SIA “Cymuss”. Kruojuma izdūšonu finansiali atbolsta Latgolys kulturys progama: Latgolys regiona atteisteibys agentura, Vaļsts kulturkapitala fonds i AS “Latvijas valsts meži”.

Print Friendly, PDF & Email

Kalenders

Jul
16
Ūtr
17:00 Rezidejūšūs muokslinīku publisku... @ Rotko muzejs
Rezidejūšūs muokslinīku publisku... @ Rotko muzejs
Jul 16 @ 17:00 – 18:30
16. julī 17.00 stuņdēs Rotko muzejā sevkuram byus vareiba īpasazeit tyvuok ar ostonim storptautyskim muokslinīkim publiskajuos prezentacejuos, kurymuos jī īpazeistynuos ar sevi i sovu dailradi.   Nedelis garumā, nu 12. da 19. juļa Eiropys Savīneibys[...]