Tīšsaistē varēs nūsavērt Alberta Budžis pīmiņai veļteitūs nūvodpietnīceibys lasejumus

Tīšsaistē varēs nūsavērt Alberta Budžis pīmiņai veļteitūs nūvodpietnīceibys lasejumus

Rokstu sagataveja: portals lakuga.lv

26. janvarī 11.00 stuņdēs Bolvu Centralajā bibliotekā nūtiks Albertam Budžem veļteitī nūvodpietnīceibys lasejumi, informej Bolvu Centraluos bibliotekys bibliografe nūvodpietnīceibys laseitovā Sarmīte Vorza. Klauseituojim byus vareiba dasaslēgt tim tīšsaistis platformā Jitsi.

Lasejumi, kurī nūtiks jau ūtrū reizi, ir veļteiti pravesta Alberta Budžis (1930–1957–2017) atcerei. Tūs mierkis ir veicynuot pietnīku interesi par Bolvu nūvoda kulturviesturiskū izpieti, kai ari popularizēt jau topušus pietejumus par itū arealu.

Lasejumūs pravests Mārtiņs Klušs stuosteis par latgalīšu volūdu 21. gs. suokumā Rūmys katuoļu bazneicā bazneicā Latgolā, profesore Lideja Leikuma i profesors Aleksejs Andronovs – par Mikeļa Bukša dorbu bibliografeju, profesore Skaidreite Kalvāne – par naseņ atrostū Puordaru rūkroksta gruomotu. Bolvu Centraluos bibliotekys vacuokuo bibliotekare Ināra Bobrova īpazeistynuos ar informacejis īgiušonys i datu apstruodis metodem, veidojūt Bolvu regiona kulturviesturis datu bazi, Bolvu nūvoda muzeja viesturneica runuos par tielnīku Leo Jāni Briedīti (1922–2007), nūvodpietnīks Ivars Logins stuosteis par Bolvu regiona vītvuordim i ar tim saisteitim artefaktim. Nūvodpietnīks Aldis Pušpurs īpazeistynuos ar zynomim cylvākim nu Susaju pogosta, nūvodpietneica Līga Delvere runuos par Bonifacovys muižys viesturi, bet Škilbānu viesturis pietneica Mārīte Šakina – par Škilbānu muižu. Lasejumu nūslāgumā – viesturneicys i muzejneicys Ritys Gruševys prīšklasejums par naformalū izgleiteibu muzejā kai pietnīceibys sastuovdaļu i tuos rezultatim, kai ari Baļtinovys vydsškolys školuotuojis Valentīnys Kašys stuostejums par Brīžucīma pogosta školu viesturi.

Dasasliegšonys saite klauseituojim: https://meet.jit.si/Novapetniecibaslasijumi

Print Friendly, PDF & Email