Kulturys īsacejumi nedeļai: nu Daugovpiļs leidz Pekinai

Kulturys īsacejumi nedeļai: nu Daugovpiļs leidz Pekinai

Rokstu sagataveja: portals lakuga.lv

Pyrma 84 godu februara pyrmajā nedeļā Daugovpiļs teatris puorsacēle iz jaunizcaltū Vīneibys nomu. Tī jis atsarūn ari myusu dīnuos, i itymā nedeļgolā Daugovpiļs teatrī tiks spālāta muzykala puosoka pīaugušajim latviski i latgaliski “Pa Laimis luoča pādim” (“Pa Laimes lāča pēdām”). Tys ari vīns nu Daugovpiļs teatra aktrisis Kristīnis Veinšteinys ituos nedelis kulturys īsacejumu. Vēļ Kristīne aicynoj apmeklēt muokslys izstuodis, kai ari nalaist garum kaidu pasauļa mārūga nūtikšonu, kas suoksīs jau pīktdiņ.

Zīmys olimpiskūs spēļu atkluošonys ceremoneja 4. februarī

Tys ir grandiozs pasauļa mārūga pasuocīņs, kas nūteik reizi četrūs godūs, itūreiz Pekinā. Kai vysod, atkluošonys ceremoneja sūluos byut spylgts, napīradzāts kulturys sareikuojums. Ari maņ pošai jau nu mozūtnis lobuok pateik taišni zīmys olimpiskuos spēlis. Drūši viņ deļtuo, ka Latvejai pīstuov tī garī zīmys vokori, kod vysi kūpā gamanej, skaitūt puorsokys voi spielejūt golda spēlis, voi gluži pretieji, kod, īraugūt iz zemis nūkrytušu pirmū snīga puorslu, valkam uorā sliepis voi ragavenis i aidā iz tyvuokū kolnu voi mežeņu aba vuicomēs jaunus sliduošonys elementus iz piļsātys apladuojušajom ītvem i celim. Itūgod mes, latgalīši, drūsai varam turēt eikšus par sovejū – Denisu Vasiļjevu nu Daugovpiļs. Kai saceja pots Deniss – iz Pekinu dūsīs na tik sportists daiļsliduošonā, bet ari muokslinīks. Lai tūp!

Pekinys olimpiskūs spēļu logo

Zīmys izstuožu sezona Marka Rotko centrā Daugovpilī

Pasasokūt ite dzymušajam muokslinīkam Markam Rotko, myusu piļsātys cītūksnī ir rodusēs breineiga muokslys telpa – centrs na tik M. Rotko dorbim, bet ari cytim slovonim i na tik slovonim nūvodnīkim, Latvejis i pasauļa muokslinīkim. Itamā izstuožu sezonā apsaverami pīci atškireigi izstuožu projekti nu Latvejis, Lītovys, Igaunejis i Vuocejis muokslinīku: “X: Brīvā telpa//X: Ego”, “Micēlija”, “Tūkstoš sapņu jūra”, “Ūdens”, “Kronis”. Izstuodis pīduovoj sajust maineigu scenografeju i īspieju pīredzēt teatralu baudejumu. Tuos var apmeklēt da 10. apreļa. Ļausimēs muokslīnīku radeitajai pasauļa daudzveideibai!

Migle Kosinskaite, Pēters Krosmans. “Ģertrūdes sapnis”. Dorbs nu izstuodis “X: Ego”

Akteru slimeibys deļ izruodis itūnedeļ atcaltys! Izruode “Pa Laimis luoča pādim” Daugovpiļs teatrī 5. i 6. februarī

Cik bīži pādejā laikā mes asam saukuši tolkā Laimis luoci, kab sakūptu kaidu sātu, pogolmu, pogostu, nūvodu voi piļsātu? Dūmoju, ka dīzgon bīžai. Deļtuo aicynoju vysus atbraukt iz Daugovpiļs teatri i kūpā ar treis jautrom i glaunom luoča brauciejom dūtīs tyvūs i tuolūs ceļūs piec luoča i juo nastuos laimis – gon jautruos Valta Pūcis dzīsmēs, gon patīsūs Monikys Zīlis nūstuostūs, kam pamatā myužam jaunais Andreja Upīša stuosts par Syunu cīma zānim. Kai soka vīna nu golvonūs varūņu – laimi jau pasaulī naatrassi, tei juomeklej te – sirdī. Tū ari vysim nūvieleju!

Skots nu izruodis “Pa laimis luoča pādim”. Kartenis autore: Džeina Saulīte

Kalenders

Feb
10
Pyr
18:00 Starpbrīdis – Andrim Keišam 50 @ Muzykys noms "Daile"
Starpbrīdis – Andrim Keišam 50 @ Muzykys noms "Daile"
Feb 10 @ 18:00 – 20:00
Andris Keišs: “Jau divdesmit ostoitū godu es i iz skotivis, i kameru prīškā izdzeivoju svešys dzeivis. Tys aizjam lelu daļu munys dzeivis. Ka vokorūs, izruožu laikā, tuos svešuos dzeivis teik dzeivuotys, tod nu reitu mieginuojumūs[...]
19:00 Izruode “Mazpiļsāta” @ Valmīrys kulturys centrys
Izruode “Mazpiļsāta” @ Valmīrys kulturys centrys
Feb 10 @ 19:00 – 21:00
“Pannas Teātris” skateituojim pīduovoj izruodi – slovonuokuos myusu dīnu Latgolys lugu autoris Danskovītis jaunuokū komedeju. Izruodis režisors Juris Rijnieks liks akterim Zanei Daudziņai, Aldim Siliņam, Elīnai Vānei, Jānim Skanim voi Jurim Lisneram runuot ari latgaliski[...]