Jau itūnedeļ Latgalīšu kulturys goda bolvys “Boņuks 2021” padūšonys ceremoneja

Jau itūnedeļ Latgalīšu kulturys goda bolvys “Boņuks 2021” padūšonys ceremoneja

Rokstu sagataveja: portals lakuga.lv

Sastdiņ, 5. martā, Latgalīšu kulturys goda bolvys “Boņuks 2021” apbolvuošonys ceremonejā tiks gūdynuoti desmit pārnejuo goda svareiguokī i spylgtuokī nūtykumi, aktivitatis i cylvāki latgaliskajā kulturā, kai ari bolvu par myuža īguļdejumu latgalīšu kulturys atteisteibā sajims kordirigents Juoņs Gruduls. Bolvys padūšonys ceremonejis translaceju nu Latgolys viestnīceibys GORS varēs vērtīs LTV1 21.05 vokorā, viestej bolvys reikuotuoju atsyuteituo informaceja.

Itūgod bolvys par aktivitatem, dorbu i sasnāgumim latgaliskajā kulturā tiks padūtys jau četrpadsmitū reizi. Latgalīšu kulturys goda bolvys mierkis arviņ ir apkūpuot lobuokū, spylgtuokū i svareiguokū padareitū i nūtikšonys pārnejā godā latgaliskajā kulturā, gūdynojūt aktivuokūs latgalīšu kulturys puorstuovus, popularizātuojus, kai ari veicynuot i rūsynuot jaunradis i kulturys daudzveideibys atteisteibu iz prīšku. “Boņuks 2021” gūdynuos par snāgumu i padareitū 2021. godā.

Piec bolvys reikuotuoju, Latgolys viestnīceibys GORS komandys, saceituo kas gods bolvys padūšona izavierš par sirsneigu, vierteigu i reizē ari ar humora pīpiļdeitu sasatikšonu, pi tuo itūgod ar skateituojim byus vareiba sasatikt kluotīnē, GORĀ, na viņ pi televizejis ekranu, kai tys beja pārnejuo goda ceremonejā. Beletus iz ceremoneju kluotīnē vēļ var nūpierkt ITE.

Bolvys padūšonys ceremoneju ūtrū godu vadeis komikis Jānis Skutelis. Skateituojus kluotīnē i translacejā TV prīcēs grupys “Bez PVN”, “Muosys”, “Jakob Noiman Band”, “Varang Nord”, “Saucējas”, muzikis Ūga, Patrisha i Dināra Rudāne, kai ari koncertā “Celīs bruoļ!” topušais ansamblis, kurā apsavīnuojuši zynomi latgalīšu muziki.

Itūgod bolvai tyka padūti 109 pretendentu dasacejumi, kurūs izviertēja žurejis komiseja, tuos sastuovā īkļaunūt kai pārnejūs godu bolvys sajiemiejus, medeju puorstuovus, bolvys reikuotuoju puorstuovus, latgaliskuos kulturys sabīdryskūs aktivistus i attīceigūs sferu pīaicynuotūs ekspertus, kurūs kasdīna nav saisteita ar latgaliskū kulturu. Itūšaļt ir zynomi 30 bolvys nominanti, bet 10 bolvys sajiemiejus varēs izzynuot bolvu padūšonys ceremonejā.

Latgalīšu kulturys ziņu portals lakuga.lv sadarbeibā ar Latvejis Sabīdryskūs medeju portalu LSM.lv ari itūgod aicynoj sabīdreibu nūskaidruot publikys simpateju, kam tiks padūta “Žyka“ statuete. Itamā reizē “Žyka“ statuetis autore ir ari poša “Boņuka“ statuetis autore keramike Vēsma Ušpele (pūdnīku darbneica “Malny Wylky“). Par sovu simpateju vēļ da 1. marta 23.59 var nūbuolsuot ITE.

Latgalīšu kulturys goda bolva “Boņuks“ pyrmū reizi tyka padūta tyka padūta 2009. godā, bet nu 2013. bolvu reikoj Latgolys viestnīceibys GORS komanda, sasadorbojūt ar bīdreibu “Partitūra“. “Boņuks 2021“ nūtikšonu atbolsta Vaļsts kulturkapitala fonda Latgolys kulturys programa ar A/S “Latvijas valsts meži“ i Latgolys regiona atteisteibys agenturys atbolstu, kai ari Rēzeknis vaļstspiļsātys dūme, Daugovpiļs vaļstspiļsātys dūme, Leivuona nūvoda i Rēzeknis nūvoda pošvaļdeibys, Latvejis Televizeja, latgalīšu kulturys ziņu portals lakuga.lv, Latvejis Radejis Latgolys studeja, SIA “Atrakcijas Sēlijā“, SIA “Latgales ziedi“, kopejneica ZĪDS, bīdreiba “LgSC“. Vaira par bolvu skaiti: https://bonuks.lv/.

Print Friendly, PDF & Email

Nūtikšonu kalendars

Aug
18
Cat
20:00 Ūgys koncerts @ "Kaņepes Kultūras centrs"
Ūgys koncerts @ "Kaņepes Kultūras centrs"
Aug 18 @ 20:00 – 22:00
“Kaņepes Kultūras centra” duorzā – Ūgys koncerts. Pi puļts DJ MARTIN BIRCH.   Ūga īvalk klauseituoju Rēzeknis hiphopa kulturys kusteibā. Tei ir īlu muzyka, mīlesteiba i vīnuoteiba storp ituos kulturys pīkūpiejim. Vīneiguo sīvīte, kura repoj[...]