Rokstu sagataveja: portals lakuga.lv

Turpynojūt raudzeit sekuot leidza nūtikšonom Ukrainā i puordzeivojūt par Krīvejis armejis ībrukuma raiseitajom brīsmem, raugam izzynuot vaira par Ukrainu i tuos kulturu ari latgaliski. Pīduovojam īpasazeit ar ukraiņu dzīsmi, kurys vuordu autors ir portalā jau pīmynātais ukraiņu Raiņs Tarass Ševčenko (1814–1861). Juo ryndys atdzejuojuse žurnaliste, redaktore i latgalīšu rokstu volūdys specialiste Maruta Latkovska.

Maruta, stuostūt par atdzejuojuma ideju, soka: “Itei ir dzīsme ar Tarasa Ševčenko vuordim i tū breineigi izpylda Kijivā dzymušais dzīduotuojs Ivans Kozlovskis (1900–1993), kuram ir suleigs tenors. Munam veiram Nikolajam Latkovskam ari beja lobs bolss i ari tenors. Deļtuo itys maņ ir taids koč kas eipaši tyvs, bet itymā laikā ari spāku dūdūšs, jo vysi te mes asam saisteiti ar tik daudzom saitem – volūdu īskaitūt, ka vaira navarim i navarēsim vīns bez ūtra iztikt. Dīvs, sorgoj Ukrainu!”