Kū redzēt i pīdzeivuot Leldīnis breivdīnuos Latgolā

Kū redzēt i pīdzeivuot Leldīnis breivdīnuos Latgolā

Rokstu sagataveja: portals lakuga.lv

Prīškā drupeit garuokys Leldīnis breivdīnys i portala lakuga.lv redakceja sovim skaiteituojim īsoka nasēdēt telpuos i teleponūs, tok dūtīs pastaiguos svaigā gaisā i ļautīs vysaida veida kulturys jaunatkluojumim.

Atguoja Leldīne
Par kolnim, par lejom
Ai meikstim peirāgim,
Ai čosnom ūlom.
Tautysdzīsme

Beidzamī diveji godi bejuši gari i gryuši, deļtam kotrs nu myusu ir peļnejs kaidu atpyutys strēči. Īsokom izvādynuot golvys, sapazeit ar jaunim ļaudim i varbyut ari drupeit padoncuot. Latgolys pusī Leldīnis breivdīnuos 17. i 18. aprelī gaidami vairuoki bali. Tuos ir eipašys nūtikšonys, kod ir vareiba uzviļkt šmukuokū kleitu i glaunuokū uzvalku. Vaira informacejis meklej ITE.

Svaigs gaiss ir vajadzeigs, kab smedzini labi dūmuotu. Deļtam īsokom izmontuot kaidu nu daudzejūs Ludzys nūvoda pastaigu maršrutu, kuri vysi ir apkūpuoti vīnā kartē i daīmami ITE.

Vēļ leidz 30. apreļam Latgolys Kulturviesturis muzejā Rēzeknī ir vareiba apsavērt breineigu izstuodi “Iesākumā bija māls”. Izstuodē apsavīnuojuši deveni pūdnīki, kuri poši daboj muolu kotrs sovā Latgolys pusē.

Kab Leldīnis ūlys byutu eipaši šmukys, īsokom izavielēt pavasareigys kruosys – dzaltonu i zylu. Dzaltonū aba voskonū kruosu var dabuot ½ litrā iudiņa īberūt 3-4 ādamkarūtis kurkuma, uzvuorejūt i piečuok atstuojūt īsaviļkt vysmoz iz puors stuņdem. Sovpus zylū kruosu var dabuot, izmontojūt zylūs (violetūs) kuopustus. Jem vīnu kilogramu smogu kuopusta gaļveņu, sagrīž strēmelēs, īber katlenī, puorlej ar 1,5 litrim iudiņa, dalej 30 g 9% etika, itū maisejumu nūvuorej iz lānys guņs vysmoz 40 minutu. Cytā katlenī izvuorej boltuos ūlys. Kod kuopustu virīņs ir padziss, īgremdej tymā ūlys i pamat iz kaidu laiku. Gaiši zylys ūlys byus jau piec pusstuņdis, ka gryb tymsuoku tūni, juopamat iz garuoka laika.

Latgalīšu kulturys ziņu portals lakuga.lv vielej vysim skaiteituojim saulainu Leldīni!

Karteņa: momenti.lv
Print Friendly, PDF & Email

Kalenders

Jun
20
Cat
15:00 Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Jun 20 @ 15:00 – 16:30
20. junī 15.00 stuņdēs Daugovpiļs Nūvodpietnīceibys i muokslys muzejā tiks atkluota etnografejis izstuode nu muzeja kruojuma “Atpakaļ mājās”. Izstuodē eksponāti autentiski prīškmati, kas tyka lītuoti 20. g. s. pyrmajā pusē – dorbareiki, sadzeivis prīškmati. Etnografejis[...]