Rokstu sagataveja: bīdreiba “LgSC”

Bīdreiba “LgSC” sadarbeibā ar latgalīšu kulturys ziņu portalu lakuga.lv aicynoj iz ostoņom latgalīšu rokstu volūdys tīšsaistis bezmoksys nūdarbeibom, kab kotrys interesents varātu izzynuot vaira par latgalīšu rokstu volūdu i īsavuiceit tuos pamatprincipus.

24. majā 19.00 trešuo nūdarbeiba, tuos tīšraide ITE.

Trešuos nūdarbeibys tema: kas i parkū latgalīšam divreiz nav juoatkuortoj i kas nu latgalīšu volūdys nav pagaiss. Sovus vaicuojumus par nūdarbeibys temu var aizdūt tīšraidis komentaru sadaļā, nūdarbeibys vadeituoja iz tim atbiļdēs.

Latgalīšu rokstu volūdys nūdarbeibys voda vīna nu zynūšuokūs latgalīšu rokstu volūdys specialistu, latgaliskūs gruomotu korektore, pīredziejuse volūdys nūdarbeibu vadeituoja i volūdys eksperte Muora Mortuzāne-Muravska. 

Volūdys nūdarbeibys byus divejūs periodūs – pavasara i rudiņa. Pavasara periodā latgalīšu rokstu volūdys vuiceišonuos paradzāta kotru ūtrū ūtardīni, suocūt nu 26. apreļa 19.00 stuņžu. Nūdarbeibys planavuotys ari 10. majā, 24. majā i 7. junī, bet rudiņa periodā 6. septembrī, 20. septembrī, 4. oktobrī i 18. oktobrī.

Latgalīšu rokstu volūdys kursu nūtikšonu finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.