Rokstu sagataveja: portals lakuga.lv

Svātdiņ, 17. julī, suocūt nu 15 stuņdem leidz pat vālam vokoram Rēzeknis nūvoda Lūznovys muižā byus, īspiejams, nasteidzeiguokuo vosorys svātdīne, boguotynuota ar muokslu i garšu festivalu “Muokslys pikniks”. Itūgod sūluos byut plota i daudzveideiga programa, kurys vydā ari vairuokys latgaliskys nūtikšonys.

Itymā godā muokslu i garšu festivals “Muokslys pikniks” atsagrīzs pyrma pandemejis laika apmārā i nūskaņuos ar vairuokom skotivem, daudzveideigom meistardarbneicom i vareibu pīdzeivuot i īsasaisteit vysaida veida muokslys nūtikšonuos.

Itūreiz paradzāta ari dyžan storptautyska programa, gostūs brauks “The Bullseyes” (Pūleja), Marias Mazzottas (Italeja), grupa “Albaluna (Portugale). Gostus īprīcynuos ari Juoņa Ivanova Rēzeknis muzykys vydsškolys džeza programys audziekni. Cikom vokoru nūslēgs energiskuo latvīšu grupa “Very Cool People” ar dzīduotuoju Paulu Saiju.

Vīna nu piknika tradiceju ir ari muižys parkā asūšuo keramikys cepļa izjimšona, kas itūgod byus boguotynuota ar Mārtiņa Eihis režisātū Rēzeknis teatra “Joriks” izruodi “Muols”. Izruode, kurā pīsadola akteri Juoņs Kronis i Liena Šmukste, viestej par Latgolys pūdnīceibys tradicejom. Leidz ar cepļa izjimšonu par izruodis dalinīkim unikali paliks ari pūdnīku sātys “Cukrasāta” saiminīki Stanislavs Viļums i Viola Anna Bīriņa.

Kotrā “Muokslys piknika” festivalā apmaklātuojim ir vareiba pošym radeit voi byut par daļu nu muokslys pīdzeivuojuma. Ituo gods festivalā pīsadola vaira nakai desmit vysaida veida meistarklasis. Byus vareiba veiduot sapynu giusteituojus, vieja zvonus, pierleišu rūtys, karūdzeņus i cytus šmukumus. Naiztryukstūša daļa ir ari Latgolys muokslineicu apvīneibys V.I.V.A. pleners, kū itūgod papyldynuos ari muokslineicu meistarklase.

Festivals svātdiņ īsasuoks ar muziķa i muokslinīka Vinsenta Flikigera (Šveice) izstuodis “Noir sur blanc un citas krāsas” nūslāgumu, kurā varēs īsavērt ari Latgolys zeimiejumu i stuostu gruomotā “Trusīni vessim reitā pi puiša”.

Leidz ar muzykys i muokslys programu, naiztryukstūša daļa ir vysaida veida garšu i sajiutu pīdzeivuošona. Ituo gods “Muokslys piknikā” eipaši varēs īpazeit Latgolys “jaunuos garšys”, par kurom pasaryupēs vītejī uzjiemieji. Pasuokuma apmaklātuojim byus vareiba nūbaudeit “KUUP” kopeja grauzdātovys kopejus i gordumus, IGGI kokteiļus, zemnīku saimisteibys “Liepkalns” i “Dabas virtuve” garšys, īpazeit “Obelisk Farm” kanipu garšu pasauli i cytus lobumus. Apmaklātuoji aicynuoti jimt leidza ari sovus piknika grūzus, kurus pasuokuma laikā varēs nasteidzeigi baudeit daudzejuos piknika zonuos.

Vysu plotū pasuokuma programu meklej ITE.