Rokstu sagataveja: portals lakuga.lv

23. julī 15.00 stuņdēs Maltys viesturis muzejs aicynoj iz gruomotys “Jura Gaigala varavīksne” attaiseišonys svātkim. Tei izguojuse ar Maltys pogosta puorvaļdis idejiskū i finansialū atbolstu, sasadorbojūt ar Latgolys Kulturviesturis muzeju, muokslinīka meitu Daci i vairuoku jūmu specialistim.

432 puslopu bīzajā izdavumā apkūpuotys i ar daudzom karteņom atkluotys muokslinīka spylgtuokuos daudzveideiguos dzeivis nūtikšonys, kai ari apsaveramys ap 300 tautysdzīšmu ilustracejis. Izlase veiduota, atlosūt sižetiski daudzveideiguokūs nu vaira nakai 700 zeimiejumu, kas apkūpuoti deveņūs pošrūceigai nūformātūs albumūs, kū muokslinīks sataisejs vīnā eksemplarā.

Sadarbeibā ar Maltys Bārnu i jaunīšu centru prezentacejis dīnā byus apsaverami Latgolys bārnu zeimiejumi, kas radeiti muokslinīka Jura Gaigala stylā i tyka īsnāgti 2021. godā reikuotajā vizualuos muokslys konkursā “Tāva sāta myužam svāta”, veļteitā muokslinīka 90. jubilejam.

Sovpus kūpā ar muokslinīka meitu ir sagataveits puorsteigums Jura Gaigala talanta cīneituojim – nu 18. juļa da 31. augusta byus apsaverami 17 juo akvareli, kas da ituo nav tykuši izstuodeiti. Taipat tiks deponātys treis gleznys nu Latgolys Kulturviesturis muzeja kruojuma, kuruos raksturoj muokslinīka dzymtuos pusis vītys – Dzementovu, Lyskys upeiti i Prezmys patmalis. 

Taipat da augusta beigu byus apsaverama Gaigalu dzymtys muzejam duovuotu prīškmatu izstuode. Par pīmāru, spēlis “Mikado” latgaliskais variants – nu 100 cysu, kū sataisejs pats muokslinīks i spielējs bierneibā. Zeimeigs ir J. Gaigala portmonejs (moks dokumentim i naudai) ar metala monogramom ar inicialim, tuos ir bejušys ari iz studeju laika portfeļa, kas ari ir muzeja kruojumā. Vēļ byus apsaverami dzymtys viesturiskī dokumenti, tymā skaitā t.s. “Maltys miļjonara” Ruvina Vainštoka izdūts kasis orders, velosipeda pierkuma leigums ar slovonuo ebreja parokstu i cyti.

Tai kai muokslinīks ir bejs cīši ražeigs i deveigs i juo gleznys ir tykušys cīši daudzuos sātuos Latgolā, Maltys viesturis muzejs izdūmuojs reikuot vēļ nabejušu aktivitati – Jura Gaigala gleznu ekspresizstuodi – iz pasuokumu aicynoj pajimt leidza kaidu sovā sātā asūšu J. Gaigala gleznu, kab tū paruodeitu plotuokai publikai (piec pasuokuma tū varēs nest atpakaļ iz sātu). Kotram ituos aktivitatis dalinīkam izduovuos jaunū gruomota, kas teik izdūta nalelā tiražā, partū byus daīmama īrūbežuotai.