Kasdīna ar kulturys viestim latgaliski. Latgalīšu kulturys ziņu portalam lakuga.lv – 15!

Kasdīna ar kulturys viestim latgaliski. Latgalīšu kulturys ziņu portalam lakuga.lv – 15!

Rokstu sagataveja: bīdreiba “LgSC” i portals lakuga.lv

Ituo gods vosorā paīt 15 godu nu laika, kod sovu darbeibu izsuocs latgalīšu kulturys ziņu portals lakuga.lv – vys vēļ vīneigais medejs pasaulī, kura saturs kasdīnā teik taiseits viņ latgaliski. Portals kotram interesentam pīduovoj izzynuot vysys aktualitatis par latgalīšu kulturys nūtikšonom, procesim i situaceju Latgolā, Latvejā i pasaulī.

Ideja par portalu, kas viesteitu par latgalīšu kulturu, roduos literaturzynuotnīkam i publicistam Valentinam Lukaševičam. Portalam, kuram tyka dūts nūsaukums “Latgalīšu Kulturys Gazeta” (LaKuGa), izveiduotuojs, saiminīks i atteisteituojs ir bīdreiba “LgSC” (pyrma tuo “Latgolys Studentu centrs”). Portals sovu darbu suoce 2007. gods 14. julī, bet 2018. gods 16. janvarī dabuots oficiala medeja statuss i jauns nūsaukums – “Latgalīšu kulturys ziņu portals lakuga.lv”.

Suokumā portals beja vaira kai forums eisom viestim i komentarim, nu niu lakuga.lv ir centraluo vīta, kur meklēt informaceju par latgalīšu kulturys procesim, nūtikšonom i situaceju Latgolā, Latvejā i cytur pasaulī. Portalā teik publicāts tuo komandys i uorštata autoru sagataveits saturs: intervejis, informativuos viests, kulturviesturiska satura roksti, literari pyrmpubliciejumi, analitiski roksti, recenzejis i atskoti, latgalīšu rokstu volūdys apvuiceibu materiali i cyta informaceja – vaira nakai 420 jaunu rokstu godā. Portals itūs godu laikā palics par sova veida Latgolys i latgalīšu kulturys vizitkarti.

Portala vadeituoja Edeite Husare, atsaverūt iz lakuga.lv darbeibu, soka: “Koč ari guojs vysaiž, jo dorbs medeju vidē itymā straujajā laikā nav vīnkuoršs, prīca, ka asam spiejuši nūdrūsynuot latgalīšu kulturys ziņu portala lakuga.lv darbeibu jau cik daudzi godu garumā, kab byutu taida pastuoveiga vītne, kur kotrys grybātuojs var izzynuot vysu, kas aktuals latgalīšu kulturā. Reizē ari prīca, ka lakuga.lv nav viņ portals – aizsuoktys i daudzys cytys latgalīšu kulturys populariziešonys iniciativys, kurūs vydā akceja “Latgalīšu volūdai draudzeiga vīta”, latgalīšu rokstu volūdys konsultacejis, pasauļa diktats latgalīšu rokstu volūdā, latgalīšu rokstu volūdys apvuiceibys i cytys. Lepojamīs, ka portala satura sagataveišonā īsasaista uorštata autori, kurūs vydā kai Latgolys, tai vysys Latvejis kulturys sferā labi zynomi profesionali, portala saturs teik papyldynuots ar pošu taiseitim originalim foto i video materialim, kai ari cīši aktivi raugam viesteit par latgaliskū i socialajūs teiklūs.”

Sovys pastuoviešonys laikā latgalīšu kulturys ziņu portala lakuga.lv uzturiešona i satura radeišona vysod ir bejs bīdreibys “LgSC” bīdru iniciativa i leluokā daļā breivpruoteigais dorbs, vairuokys reizis portala darbeiba bejuse iz pauzis, kod datryucs dareituoju spāka voi finansiejuma, nu niu portala darbeiba stabilizāta, kam lels atspaids ir Vaļsts kulturkapitala fonda mierkprograma kulturys nūzaris medeju atbolstam 2022.–2024. godam, ļaunūt vysmoz dalejā slūdzē pastuoveigi nūdrūsynuot portala redaktora, žurnalista i socialūs teiklu redaktora dorbu. Portala atteisteibai, styprynojūt tuo kapacitati i dažaidojūt saturu, cīši paleidz ari Medeju atbolsta fonds ar tymā apstyprynuotajim projektim.

Kai portala redaktori sovulaik struoduojuši Jurs Viļums, Edeite Husare, Vineta Vilcāne, Laura Melne, Sandra Ūdre, nu niu, nu ituo gods suokuma, lakuga.lv redaktora omotā otkon stuojusēs Laura Melne, bet par portala atteisteibu ryupejās Edeite Husare. Taipat portalā kai žurnaliste struodoj Laura Spundere, bet ar žurnalistikys, foto, video i socialūs teiklu materialim dorbojās Amanda Anusāne.

Portala redaktore Laura Melne soka, ka atsagrīzšona dorbā tymā piec vairuoku godu pauzis dūd vareibu saleidzynuot situaceju tūlaik i niu. “Maņ ir lela prīca, ka vys rešuok cylvākim juoskaidroj, kas tod ir lakuga.lv. Tū zyna kai latgalīši, tai ar kulturys jūmu saisteiti puornūvadnīki. Ūtra prīca – ka latgaliskais mozuok teik uztvarts kai koč kas eipašs voi naīrosts, bet kai normala latvīšu kulturys i volūdys sastuovdaļa. Nui, myusu portala pīvīnuotuo vierteiba ir tys, ka vysi teksti teik publicāti viņ latgaliski, tok pamatā ir lobs i kvalitativs saturs, spieceiga portala komanda i pīsaisteiti sovys jūmys profesionali kai uorštata autori. Latgalīšu volūda nav tik sātys volūda, tamā var raksteit kai nūpītnus literarus dorbus, tai profesionalys recenzejis i apjūmeigys intervejis par vysaidu kulturys nūzaru aktualim problemvaicuojumim.”

Vysu jaunuokū informaceju par latgalīšu kulturu namaineigi var puorskaiteit škārsteikla adresē lakuga.lv, kai ari sekuot portalam leidza tuo socialūs teiklu profilūs Facebook, Instagram, Twitter, Tik Tok i Telegram.

Viests sagataveita, eistynojūt Aktivūs īdzeivuotuoju fonda projekta “Bīdreibys “LgSC” kapacitatis styprynuošona piļsūniskuos sabīdreibys i īdzeivuotuoju leidzdaleibys veicynuošonai i tūs interešu puorstuoveibai Latgolys regionā” aktivitatis.

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]