Rokstu sagataveja: portals lakuga.lv

Izguojs žurnala “A12” jaunais augusta/septembra numers, ar kuru reizē žurnals svietej ari sovu 10 godu jubileju. Jaunuokajā “A12” numerī sarunys ar Daugovpiļs Marka Rotko muokslys centra vadeituoju i muokslinīku Māri Čačku, Lelbornis muižys saimineicu Nuoru Poišu, muziki Artūru Uškānu, īsavieršona latvīšu diasporys dzeivē Bergenā, Norvegejā, kai ari stuosti, kai Latgola uzjam biegļus nu Ukrainys.

Jubilejis žurnala īvodā tuo redaktore Ināra Groce soka: “Desmit godus asam ceļuojuši, sasatykuši, meklējuši redzīņus i styprū cylvākūs, kab, stuostūt eistyni i dzili, raiseitu skaiteituojūs rodūša liduojuma sajiutu, rastu rysynuojumus sabīdreibys i laika mastajim izaicynuojumim. Sovūs Latgolys ceļūs asam puorsalīcynuojuši, ka rodūšu i uzjiemeigu ļaužu mums gona, – kai atsagrīžūt Latvejā nu uorzemu, tai atjaunojūt lauku eipašumus, atrūnūt jaunus uzjiemiejdarbeibys veidus, laikmeteigi voi tradicionali kūpūt kulturu, paleidzūt tim, kurim itūšaļt paleidzeiba vajadzeiga vysvaira. Vēļ nazynim, kaida byus cyta žurnala “A12” desmitgade, nu turim nūceju sasatikt ar cylvākim, kuru dūmys, dorbi i dzeivis liduojums sylda pasauli. I ka itam pasauļam byus gaiši i mīreigi dabasi.”

Žurnala “A12” augusta/septembra numerī skaitit:

• Dvēsele Ukrainai – kai Latgola uzjam biegļus;
• Kai īsaisteit diasporys jaunīšus latvyskumā – pīredzē pasadola Bergenys latvīšu bīdreibys “Bergausis” aktivistis;
• Piļneiba, kū sasnēgt – saruna ar Daugovpiļs Marka Rotko muokslys centra vadeituoju, muokslinīku Māri Čačku;
• Cylvāks i juo īla – izplateituokī personu vuordi Latgolys īluos;
• Kai atdzymst Lelbornis muiža – atkluoj tuos saimineica Nuora Poiša;
• Kai muzikis nu Latgolys var okupēt Reigu – Artūra Uškāna dzeive muzykā;
• Muzejs i tehnologejis – par aktualitatem muzeju dzeivē stuosta Rakstnīceibys i muzykys muzeja kulturys pasuokumu organizatore Katrīna Kūkuoja;
• Latgaliskums vuiceibu saturā – Latgalīšu volūdys, literaturys i kulturviesturis školuotuoju asociacejis vadeituojis Veronikys Dunduris skatejums;

Kai īrosts žurnalā “A12” ari portala lakuga.lv sagataveituo informaceja par jaunumim latgaliskajā muzykā – itūreiz izdavumu par Latgolys daņčim, kai ari jaunuokūs gruomotu apskots. Žurnalā var puorskaiteit ari portala komandys gataveituos intervejis – lakuga.lv redaktoris Laurys Melnis sarunys ar Katrīnu Kūkuoju i Veroniku Dunduri.

Žurnals “A12” ir vareiba izzynuot par dzeivi i ļaudim Latgolā i pasaulī, puorskaiteit dažaidus dzeivisstuostus, pīsadaleit viesturiskūs ceļuojumūs laikā i telpā, kai ari byut atkluojumu i puordzeivuojumu dalinīkim. Vaira par vareibu abonēt voi nūpierkt (kai digitalā, tai taustomā veidā) žurnalu ite: https://a12.lv.