Bolvu nūvodā nūteik latgaliskais jaunīšu seminars “Atzolys 2022”

Bolvu nūvodā nūteik latgaliskais jaunīšu seminars “Atzolys 2022”

Rokstu sagataveja: portals lakuga.lv

Bolvu nūvoda Rekovys vydsškolā catūrtdiņ, 11. augustā, suocās i da svātdīnis, 14. augusta, nūtiks latgaliskais jaunīšu seminars “Atzolys”, kura aizdavums ir īpazeistynuot seminara dalinīkus ar dažaidajom īspiejom dorbuotīs latgaliskajā vidē, paruodeit breivpruoteiguo dorba īspiejis, vuiceitīs latgalīšu volūdu, kai ari izzynuot Latgolys kulturvidis vaicuojumus.

Latgaliskajā seminarā “Atzolys”, kuru reikoj bīdreiba “LgSC”, pīsadola 18 jaunīši nu dažaidu Latgolys vītu i ir ari vīns dalinīks nu Reigys, jaunīšu videjais vacums ir 17 godu. Pyrmuo seminara dīna tyka aizvadeita kūpeiguos īpasazeišonys i sasalīdiešonys aktivitatēs ar Ievu Johansson nu izaugsmis platformys “MeYou.One” i medeju meistarklasē ar Lauri Zalānu, kur jaunīši vuicejuos, kai struodoj žurnalisti i producenti, saprota atškireibu storp uztycamom i vylta viestim, kai ari klausejuos Laura profesionalajā ceļā i pīredzē video satura taiseišonā.

Ūtrajā dīnā atzolīšim beja latgalīšu rokstu volūdys nūdarbeibys ar Māru Mortuzāni-Muravsku, bet Socialuos uzjimiejdarbeibys asociacejis vadeituoja Regita Zeļa paleidzēja izzynuot tū, kū var dūt īsasaisteišona breivpruoteigajā dorbā, kai ari pastuosteja par socialuos uzjiemiejdarbeibys byuteibu. Seminara ūtrajā dīnā jaunīšim par literaturzynuotnīku, izcylū sabīdryskū darbinīku Mikeli Bukšu stuosteja Bolvu centraluos bibliotekys vadeituoja Ruta Cibule, bet par raksteišonu latgaliski, Zīmeļlatgolys viesturis epizodem i īsasaisteišonu latgalīšu aktivitatēs stuosteja kriminalromana “Bruoli” autors Aldis Bukšs. Pošā vokorā par sovu muokslinīka i mozuo uzjiemieja ceļu Latgolā stuosteja keramike Lība Ločmele, ļaunūt atzolīšim ari praktiski pasadorbuot ar keramikys materialu.

Trešajā seminara dīnā “Atzolys” dalinīkim byus vareiba sasatikt ar latgalīšu reperi Ūgu, izzynuot vaira par latgalīšu muzyku i kūpā īraksteit dzīsmi “Bigmaar’s Records” īrokstu studejā Upītē. Tī piečuok ari praktiski iz vītys varēs izzynuot vaira par Upītis kulturtelpu – pīdzeivuot izalauzšonys ustobys “Pīci panti” aizdavumus i vuiceitīs rūkdorbus. Seminara catūrtajā, kas byus i nūslādzūšuo dīna, atzolīšus gaida debašu nūdarbeiba, kurā varēs paraudzēt spākus, diskutejūt par sev aktualim latgaliskuos kulturvidis vaicuojumim, kai ari izzynuot vaira par latgalīšu navaļstiskajom organizacejom, īspiejom īsasaisteit tamuos, kai ari kūpejū pylsūniskū īsaisti dažaidu sabīdreibai svareigu vaicuojumu rysynuošonā.

Seminara reikuotuoji i nūdarbeibu vadeituoji ir prīceigi par jaunīšu rodūšumu, ospruoteibu, savuokteibu, organizatoriskajom i sasadorbuošonys spiejom. Taipat teik turāta nūceja, ka piec “Atzolu” nūslāguma seminara dalinīki nūbrauks ar lobom sajiutom, gandarejumu par pīdzeivuotū i gribiešonu aktivuok īsasaisteit latgaliskuos kulturvidis nūtikšonuos.

Pyrmū reizi seminars “Atzolys” nūtyka 2004. godā i tai sešus godus piec kuortys da 2009. gdoa, piečuok ar puortraukumim 2014. i 2016. godā. Kab aktivi īsasaisteitu latgalīšu kulturys procesūs, seminars sovulaik bejs kai atspierīņa punkts ari daudzim itūšaļt latgaliskajā kulturtelpā zynomajim aktivistim. Seminara “Atzolys” mierkis ir veicynuot jaunīši aktivu īsasaisteišonu demokratejis i piļsūnyskuos sabīdreibys veiduošonā, jūs izgleitojūt vaicuojumūs, kurī saisteiti ar socialekonomiskajim faktorim i Latgolys regiona vierteibom, jo eipaši latgalīšu rokstu volūdu.

Seminara nūtikšonu finansiali atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu, kai ari Latgolys kulturys programa, kurū eistynoj Vaļsts kulturkapitala fonds i Latgolys regiona atteisteibys agentura ar AS “Latvijas valsts meži” atbolstu.

Print Friendly, PDF & Email

Nūtikšonu kalendars

Sep
27
Ūtr
19:00 Latgalīšu rokstu volūdys nūdarbeiba @ tīšsaistē
Latgalīšu rokstu volūdys nūdarbeiba @ tīšsaistē
Sep 27 @ 19:00 – 20:30
Bīdreiba “LgSC” sadarbeibā ar latgalīšu kulturys ziņu portalu lakuga.lv aicynoj iz ostoņom latgalīšu rokstu volūdys tīšsaistis bezmoksys nūdarbeibom, kab kotrys interesents varātu izzynuot vaira par latgalīšu rokstu volūdu i īsavuiceit tuos pamatprincipus. Latgalīšu rokstu volūdys[...]
Sep
29
Cat
15:00 Viesturis šaļteņu pītura “Latvij... @ Latgolys Kulturviesturis muzejs
Viesturis šaļteņu pītura “Latvij... @ Latgolys Kulturviesturis muzejs
Sep 29 @ 15:00 – 17:00
Itūšaļt Latvejā ir pyrma vieliešonu laiks, kod pylsūni lem, par kuru nu deputatu kandidatu sarokstim atdūt sovu bolsu. Ari pyrma 100 godu 1922. goda 7. i 8. oktobrī riezeknīši, kai ari vysys Latgolys i Latvejis[...]