Daugovpiļs teatrī īstudēs lugu “Sprīdītis” latgaliski

Daugovpiļs teatrī īstudēs lugu “Sprīdītis” latgaliski

Rokstu sagataveja: portals lakuga.lv

Daugovpiļs teātrī nūrit aktiva gataveišonuos jaunajai sezonai. Paradzātys vairuokys pyrmizruodis, pīmāram, Georgija Surkova īstudejumam “Latviešu šausmu stāsti”, Gunāra Priedes lugai “Zilā” Ivara Lūša režejā, taipoš kai vīns nu jaunumu ir ari Annys Brigaderis luga “Sprīdītis” latgalīšu volūdā.

Daugovpiļs teatra viesture aizasuoc jau 19. godu symta 50. godūs, kod Dinaburgā teik nūdybynuots Krīvu dramatiskais teatris – pyrmais teatris Latvejā. Tūlaik teatri nūdybynuoja i uzturēja Daugovpiļs cītūkšņa golvonais iņženers Nikolajs Hagelstroms, kurs beja aizrauteigs teatra cīneituojs. Teatra latvīšu trupa aktivi dorbuojuos storpkaru periodā 20. godu symta 20.–30. godūs, bet otkon atjaunuota tyka piec Latvejis naatkareibys atjaunuošonys.

Niu Daugovpiļs teatrī vīnlaiceigi dorbojās kai latvīšu, tai i krīvu trupys akteri, kas ļaun teatrim īstudēt vysaida žanra izruodis latvyski, krīviski i latgaliski. Ari Daugovpiļs teatra sātys lopa ir daīmama treis volūduos.
Kai stuosta teatra sabīdriskūs attīceibu nūdalis vadeituoja Janīna Ivanova: “Veiduot izruodis latgaliski ir myusu pošu izviele i nūstuoja. Mes redzim, ka saimēs latgalīšu volūdu lītoj gona moz, deļtam ir labi, ka bārni vysmoz teatrī kūpā ar vacuokim dzierd itū volūdu.”

Suocūt nu 2010. goda, Daugovpiļs teatris regulari sovā repertuarā īkļaun izruodis latgaliski. Eipaši apmaklāta i skateituoju īcīneita beja 2010. godā īstudātuo komedeja “Klepernīku pogosta zvaigzne”. Tamā tyka atkluotys Latgolai aktualys temys – nūvodu reforma, bezdorbs, braukšona peļņā iz uorzemem, kluotyn vēļ dalīkūt TV šovu ītekmi iz sabīdreibu. Izruode sajēme ari Latgalīšu kulturys goda bolvu “Boņuks 2010” kai lobuokais pasuokums/projekts. “Klepernīku pogosta zvaigznis” panuokumi īdvasmuoja Daugovpiļs teatri īstudēt nuokušū izruodi latgaliski – monodramu “Rūžys byudu golūs” (2012). Par eipašu nūtikšonu palyka ari Šekspira lugys “Sapnis vasaras naktī” īstudiejums latgaliski “Vosorys saulgrīžu burvesteibys” 2012. godā, kas beja myusu dīnu profesionalajim teatrim absoluti unikala prakse – īstudēt pasauļa klasiku latgaliski. Vāluokajūs godūs Daugovpiļs teatrī sekuojuši ari taidi latgaliskī īstudiejumi, kai “Dabaseibys pūddarneica” (2014), “Nūgrymušuo pile” (2017), “Revidents Sylagolā” (2018) i cytys.

Itamā sezonā Daugovpiļs teatrī latgaliskuos tradicejis napagaist i oktobrī skateituojim byus vareiba apsavērt Annys Brigaderis izruodi “Sprīdītis” latgalīšu volūdā Māra Korsieša režejā. Vaira informacejis teatris sūlej, kod jau suoksīs aktivais dorbs pi izruodis īstudiešonys.

Print Friendly, PDF & Email

Nūtikšonu kalendars

Mar
29
Tre
12:00 Izruode “Spreideits” @ Daugovpiļs teatris
Izruode “Spreideits” @ Daugovpiļs teatris
Mar 29 @ 12:00 – 13:00
Pyrmū reizi nu teatra skotuvis puosoku luga „Sprīdītis” izskanēs latgaliski! Izruode ir paradzāta kai tim, kurim latgalīšu volūda ir dzymtuo, tai tim, kurim gribīs tū lobuok īpazeit, jo Spreideiša laimis mekliejumi ir labi zynomi i[...]
Mar
30
Cat
12:00 Izruode “Spreideits” @ Daugovpiļs teatris
Izruode “Spreideits” @ Daugovpiļs teatris
Mar 30 @ 12:00 – 13:00
Pyrmū reizi nu teatra skotuvis puosoku luga „Sprīdītis” izskanēs latgaliski! Izruode ir paradzāta kai tim, kurim latgalīšu volūda ir dzymtuo, tai tim, kurim gribīs tū lobuok īpazeit, jo Spreideiša laimis mekliejumi ir labi zynomi i[...]