Grupa “Tautumeitas” sataisejuse videoklipu dzīsmei “Vīna ūtrai”

Grupa “Tautumeitas” sataisejuse videoklipu dzīsmei “Vīna ūtrai”

Rokstu sagataveja: portals lakuga.lv

Etno muzykys grupa “Tautumeitas” sataisejuse videoklipu dzīsmei “Vīna ūtrai”, kas daīmama grupys jaunuokajā albumā “Skrejceļš”.

“Itei ir dzīsme, kū veļtejom vīna ūtrai pateiceibā par vysu kūpā pīdzeivuotū gondreiž ostoņu godu garumā. Asam palykušys par saimi, kas atbolsta i stutej vīna ūtru, kod vajadzeigs. Sovpus prīcys i laimis šaļts kūpā pīdzeivojam ar seškuorteigu jaudu,” par dzīsmi stuosta grupys “Tautumeitas” vadeituoja Asnate Rancāne. Leidzeigi par dzīsmi intervejā portalam Lakuga.lv stuosta ari juos grupys dalineica Aurēlija Rancāne: “Kotra nu myusu ir cytaiduoka, ar sovu ūdzeņu. Mes tai cīši veiksmeigai vīna ūtru papyldynojam. Myusu dzīsme “Vīna ūtrai” i jaunais videoklips tai ir taišni par itū temu – kai asam bejušys i vysod byusim vīna ūtrai. Taida eipašuo meitiņu draudzeiba – muoseiba.” Interveju ar Aurēliju var puorskaiteit ITE.

Tautysdzīsme, kas dzieržama dzīsmis pantūs, “Tautumeitu” pyurā jau ir nu studeju laiku. Tys ir izcyls latvīšu “teicieju dzīšmu” paraugs (multifunkcionals rečitativs ar rudimentaru burdonu), kas kūpā ar aranžātū pavadejumu dabuojs hip-hopam rakstureigu stilistiku. Tok poša tautysdzīsme īt nu Dygnuojis (Sielejā), i tuos originalū verseju var nūsaklauseit 2008. godā izdūtajā latvīšu tradicionaluos muzykys antologejā. Dzīsmis teicieja beja Milda Bružuka (dzymuse 1899. godā), bet tei īraksteita 1989. godā.

Dzīsmis videoklipā ir izmontuoti atmiņu kadri nu grupys kūpeigai pīdzeivuotuo kai zeimeiguos “Tautumeitu” uzastuošonuos reizēs, tai kūpeigūs ceļuojumūs, dzimšonys dīnuos, kuozuos i ari pavysam kasdīniškuos šaļtīs. “Verūtīs itūs video, slaukom prīcys osorys,” stuosta Asnate. “Vēļ vaira par muzykalū mums vysod ir bejuse svareiga ciļvieciskuo saskaņa – labesteiba, empateja i sirsneiba.”

26. augustā Saulkrostūs, Skultis ūstā “Tautumeitas” snēgs vierīneigu koncertu, kab nūsvieteitu jaunuo albuma “Skrejceļš” izīšonu. Koncertā varēs dzierdēt ari vairuokus eipašūs gostus, tūs skaitā īsiļdeituojus – fanka, indī, blūzroka i alternativuo džeza muzykys grupu “The Coco’nuts”. Taipat koncertā pīsadaleis ari ukraiņu-latvīšu muziķu apvīneiba “Shakima Trio”, kuru veidoj ukraiņu dzīduotuoja, folkloriste, improvizātuoja i vejūļneica Shakima Garunts, gitarists, klarnetists, komponists, “loop station” virtuozs Jānis Ruņģis i basgitarists, producents Ainārs Majors. Par breivu koncertu varēs apmeklēt Ukrainys piļsūni, kuri niu roduši patvārumu Latvejā.

Vaira par “Tautumeitu” jaunuokū albumu “Skrejceļš” var puorskaiteit muzykys žurnalista Kaspara Zavileiska apskotā portalā Lakuga.lv ITE.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]