Kulturys īsacejumi nedeļai: dzeja latgaliski cytaižūs formatūs

Kulturys īsacejumi nedeļai: dzeja latgaliski cytaižūs formatūs

Rokstu sagataveja: portals lakuga.lv

Septembra tradiceja ir Dzejis dīnu laiks, deļtuo kulturys īsacejumūs itai nedeļai latgalīšu kulturys ziņu portala lakuga.lv redakceja atguodynoj izbaudeit latgaliski raksteitūs dorbus na viņ tradicionalajā gruomotys formatā i sasatikšonuos ar autorim, nu ari drupeit cytaižūs veidūs, kas lītojami sevkurā laikā i vītā.

Dzejis minuts kotrai dīnai video formatā

2018. godā bīdreiba “Latgolys Producentu Grupa” aizsuoka latgalīšu literaturys populariziešonys akceju “Dūmoj ar komatim!”, kurei turpynuojuos ari 2019. godā. Tymā ar video paleidzeibu latgalīšu kulturys aktivisti pīgrīze viereibys latgaliski radeitim literarim dorbim i tekstim – ir daīmami vaira nakai 20 muokslys video, kurūs dažaidu laiku latgalīšu autoru dorbus skaita sabīdreibā zynomi ļauds. Video ir vīna dzejūļa garumā i, ka suoksit vērtīs šudiņ pa vīnam dzejūļam, video byus gona gondreiž i da septembra gola! Vysi “Dūmoj ar komatim!” video nūsaverami ITE.

Ontona Kūkuoja dzejis i Kristapa Rasima muzykys sasatikšona stuostā par mīlesteibu

Svietejūt Ontona Kūkioja (1940–2007) 80 godu jubileju, Jura Soikāna Ludzys muokslys škola i bīdreiba “Teātris azotē” 2020. godā radeja dzejis video izruodi “Pa mīlesteibu brīnūt, kuojis nasaļ”, kurā Kūkoja dzeja nu dzejūļu kruojuma “Mīlesteiba, Lelais Līpu kolns” (1995) izskanēja ari Kristapa Rasima radeitajā muzykā. Pats izruodis stuosts ir par puisi (Kristaps Rasims) i meitini (Jolanta Znuotiņa), kuri runoj atškireiguos – latgalīšu i zeimu – volūduos. Dzejis kruojumu “Mīlesteiba Lelais Līpu kolns” skaita par vīnu nu skaistuokūs mīlesteibys dzejūļu kruojumu latgaliski, kas sovulaik izguojs cīši mozā tiražā i dreiži tics par bibliografisku rešumu. Drupeit vaira nakai pusstuņdi garuo dzejis video izruode byus aizkustynūšs pīdzeivuojums i emocionals leidza puordzeivuojums. Vaira par izruodi Sandrys Ūdris recenzejā ITE.

Digitaluo dzeja latgaliski

Pasaplašynojūt socialūs teiklu īspiejom, ari dzeja myusu laikūs teik tyvuoka socialūs teiklu lītuotuojim. Ka nasaīt atrast šaļtenis dorbim gruomotu ci video formatūs, vys tik varbyut saīt kaida sekuņde tai socialajūs teiklūs. Ir vairuokys latgalīšu myusu laiku dzejis autoris, kurūs dorbi puorskaitami dažaidūs socialajūs teiklūs i tīpat var sekuot leidza ari jaunuokūs dorbu publikacejom. Socialajā teiklā “Facebook” taida ir Marija Dzeisla, Instagram dorbus publicej Dagneja, mygluojs i Gunta Ločmele, bet, gaidūt jaunuokuo dzejis kruojuma “pierobežas” izīšonu, platformā TikTok var sekuot leidza Ligijis Purinašys dorbim.

@leegeeya šņak #pierobežaspiezīmes #latgalian #latvianpoetry #pierobežas #poetry #latvian #latgaliannature ♬ original sound – pierobežas piezīmes

Print Friendly, PDF & Email

Nūtikšonu kalendars

Sep
26
Pyr
17:00 LTG i ES. Dzeivuos sarunys. Eiro... @ Latgolys Centraluo biblioteka
LTG i ES. Dzeivuos sarunys. Eiro... @ Latgolys Centraluo biblioteka
Sep 26 @ 17:00 – 20:00
Pyrmūdiņ, 26. septembrī, “Europe Direct Dienvidlatgale” centrs, bīdreiba “LgSC” i Eiropys Savīneibys informacejis punkts Daugovpilī aicynoj iz Eiropys Volūdu dīnai veļteitu nūtykumu “LTG i ES. Dzeivuos sarunys” Daugovpilī, Latgolys Centralajā bibliotekā. Pasuocīņa laikā dzeivuos bibliotekys[...]
Sep
27
Ūtr
19:00 Latgalīšu rokstu volūdys nūdarbeiba @ tīšsaistē
Latgalīšu rokstu volūdys nūdarbeiba @ tīšsaistē
Sep 27 @ 19:00 – 20:30
Bīdreiba “LgSC” sadarbeibā ar latgalīšu kulturys ziņu portalu lakuga.lv aicynoj iz ostoņom latgalīšu rokstu volūdys tīšsaistis bezmoksys nūdarbeibom, kab kotrys interesents varātu izzynuot vaira par latgalīšu rokstu volūdu i īsavuiceit tuos pamatprincipus. Latgalīšu rokstu volūdys[...]
Sep
29
Cat
15:00 Viesturis šaļteņu pītura “Latvij... @ Latgolys Kulturviesturis muzejs
Viesturis šaļteņu pītura “Latvij... @ Latgolys Kulturviesturis muzejs
Sep 29 @ 15:00 – 17:00
Itūšaļt Latvejā ir pyrma vieliešonu laiks, kod pylsūni lem, par kuru nu deputatu kandidatu sarokstim atdūt sovu bolsu. Ari pyrma 100 godu 1922. goda 7. i 8. oktobrī riezeknīši, kai ari vysys Latgolys i Latvejis[...]