Kulturys īsacejumi nedeļai: islandīšu muzyka, lauku dzeive i kinu miniešona

Kulturys īsacejumi nedeļai: islandīšu muzyka, lauku dzeive i kinu miniešona

Rokstu sagataveja: portals lakuga.lv

Tikū, 8. oktobrī, grupa “Bez PVN” publiski atruodeja jaunuokū dzīsmi “Batuts”, bet itamā nedeļā svātku dīna ir vīnam nu grupys muziķu, bīdreibys “Latgolys Producentu Grupa” vadeituojam i Rēzeknis nūvoda dūmis deputatam Guntim Rasimam, deļtuo taišni Guntis pasadaleis ar sovim īsacejumim aba kai jis pats soka “prīcenim” itai nedeļai.

Islandīšu supergrupys “Sigur Ros” koncerts Reigā

15. oktobri Reigā “Arēnā Rīga” koncertēs islandīšu supergrupa “Sigur Ros” (latgaliski tys nūzeimoj “uzvarys rūze”), kurei vysam pasauļam ir daruodejuse, ka mīreigi var dzīduot sovā (islandīšu) volūdā i atsarast myusdīnu muzykys industrejis viersyunēs. Itys ir lobs pīmārs ari latgaliski dzīdūšim muokslinīkim, kod kaids gudrinīks suoc runuot par angļu, kinīšu ci latvīšu literaruos volūdys nūzeimeibu dzīšmu tekstūs. Ka ari nazyni nivīna islandīšu vuorda, tys nabyus škierslis – “Sigur Ros” muzyka var paceļt dabasūs!

YouTube raidejums/šovs “ATMINI KINU piec kadra”

YouTube kanalā “Im a’mazed” var nūsavērt vairuokus šovus i spēlis latgaliski. Vīns nu taidu ir ari raidejums/šovs, kurā tuo dalinīkim juoatmiņ serials voi kina tik piec vīna kadra. Koč kur dzierdieju, ka tyvuokajā laikā byus ari kaida pavysam svaiga epizode i sapynā ruodejuos, ka itūreiz varātu tikt minātys latvīšu kinys. Bet cikom tei teik gaideita, drūsai var apsavērt jau daīmamuos epizodis i raudzeit atminēt i atguoduot komedejis, multfilmys i serialus.

Ivara Selecka dokumentaluo kina “Zemnieki”

Vīns nu munu meiluokūs dokumentalistu Ivars Seleckis radejs vēļ vīnu dorbu, kurā radzams i Latgolys lauku ritiejums. Koč ari pats naasu vēļ īspiejs itū jaunū dokumentalū kinu “Zemnieki” nūsavērt, asu puorlīcynuots, ka nūteikti tam juobyut koč kam lobam. Kotram īsoku apsavērt i režisora filmu trilogeju “Šķērsiela”. Bet tyvuokī “Zemnieki” seansi bys, pīmāram, 16. oktobrī GORS Kino Rēzeknē, kur eipašajā seansā kluotyn byus ari filmys rodūšuo komanda, 20. oktobrī Rogovkys KN i cytur.

Print Friendly, PDF & Email

Kalenders

Feb
29
Cat
all-day Evijis Styrnys gleznu izstuode “... @ Rēzeknis Centraluo biblioteka
Evijis Styrnys gleznu izstuode “... @ Rēzeknis Centraluo biblioteka
Feb 29 all-day
Mādz saceit, ka dzeive ir sapyns. Izstuodē ir vārojamys gleznys akvareļu tehnikā, kuru var skaiteit par eipaši pīmāruotu sapynu atspaitu radeišonai. Akvareļu kruosys ar sovu plyustūšū caurspeideigumu ļaun mums īsajust sapynu pasaulī, kur vysu dzeivūs[...]