Decembrī Daugovpiļs teatrī byus pyrmizruode “Spreideišam” latgaliski

Decembrī Daugovpiļs teatrī byus pyrmizruode “Spreideišam” latgaliski

Rokstu sagataveja: portals lakuga.lv

6. decembrī Daugovpiļs teatrī gaidoma pyrmizruode īstudiejumam “Spreideits”, kurā pyrmū reizi Annys Brigaderis puosoku luga izskanēs latgaliski, informej teatra puorstuove Janīna Ivanova. Izruodē vysai saimei mozuo laimis maklātuoja pīdzeivuojumus boguotynuos dejis i dzīsmis, kai ari latgalīšim rakstureigais sirds syltums i dzeivisprīca. Izruodis režisors ir Māris Korsiets, lugu latgaliski puorlykuse Monika Zīle.

Iz izruodi teik aicynuoti vysi – kai tī, kurim latgalīšu volūda ir dzymtuo, tai tī, kurim vīnkuorši gribīs tū lobuok īpazeit. Spreideiša pīdzeivuojumim boguotais ceļš, meklejūt Laimis zemi, ir labi zynoms i lelajim, i mozajim, partū režisors Māris Korsiets ir puorlīcynuots – ka i kaids vuords var byut ari nazynoms, nūteikūšais iz skotivis byus vīglai uztverams i saprūtams.

Bāgūt nu gryutuo dorba i pamuotis bruozīņu, Spreideits dūdās plošajā pasaulī meklēt sovu laimi. Ceļā jam juoteik golā ar vairuokim puorbaudejumim, i juo apjiemeiba i lobuo gryba vysod atsamoksoj. Tok svešajā zemē apsūleituo boguoteiba naspiej jam duovuot ilgi maklātū laimi, i mozais, varūneigais ceļuotuojs saprūt, ka nikur nav tik labi kai sātā, tūs cylvāku lūkā, kurim jis eistyn ryup.

Izruodis “Spreideits” kostimu muokslinīks ir Egils Viļumovs, scenografs – Kristaps Skulte, muzykaluo nūformiejuma autors – Stanislavs Šimanskis, horeografe – Anna Blakunova, gaismu muokslinīks – Sergejs Vasiļjevs.

Spreideiša lūmā īsadzeivuos aktrise Zanda Mankopa, puorejuos lūmuos: Agnese Laicāne, Kristīne Veinšteina, Maija Korkliša, Vanda Gibovska, Ritvars Gailums, Margers Eglinskis, Jūlija Ļaha, Egils Viļumovs, Māris Korsiets, Inese Ivulāne-Mežale, Kristīna Zaharova, Raimonds Paegle, Svetlana Morozova, Aleksandra Koguce, Alisa Matvejeva, Anna Blakunova, Artjoms Afanasjevs, Jevgenijs Mihailovs.

Suocūt nu 2010. goda, Daugovpiļs teatris regulari sovā repertuarā īkļaun izruodis latgaliski. Eipaši apmaklāta i skateituoju īcīneita beja 2010. godā īstudātuo komedeja “Klepernīku pogosta zvaigzne”. Tamā tyka atkluotys Latgolai aktualys temys – nūvodu reforma, bezdorbs, braukšona peļņā iz uorzemem, kluotyn vēļ dalīkūt TV šovu ītekmi iz sabīdreibu. Izruode sajēme ari Latgalīšu kulturys goda bolvu “Boņuks 2010” kai lobuokais pasuokums/projekts. “Klepernīku pogosta zvaigznis” panuokumi īdvasmuoja Daugovpiļs teatri īstudēt nuokušū izruodi latgaliski – monodramu “Rūžys byudu golūs” (2012). Par eipašu nūtikšonu palyka ari Šekspira lugys “Sapnis vasaras naktī” īstudiejums latgaliski “Vosorys saulgrīžu burvesteibys” 2012. godā, kas beja myusu dīnu profesionalajim teatrim absoluti unikala prakse – īstudēt pasauļa klasiku latgaliski. Vāluokajūs godūs Daugovpiļs teatrī sekuojuši ari taidi latgaliskī īstudiejumi, kai “Dabaseibys pūddarneica” (2014), “Nūgrymušuo pile” (2017), “Revidents Sylagolā” (2018) i cytys.

Pyrmizruode nūtiks 6. decembrī 12 stuņdēs, nuokušuo izruode – 7. decembrī 12 stuņdēs.

Beleti – “Biļešu paradīzes” kasēs vysā Latvejā i škārsteiklā.

Print Friendly, PDF & Email

Kalenders

Apr
13
Sai
all-day Osvalda Zvejsalnieka pīminis izs... @ Latgolys Kulturviesturis muzejs
Osvalda Zvejsalnieka pīminis izs... @ Latgolys Kulturviesturis muzejs
Apr 13 all-day
Izstuodē tiks eksponātys muokslinīka gleznys nu Latgolys Kulturviesturis muzeja Muokslys kolekcejis, kas puorsvorā atspīgeļoj juo agreimū rodūšū darbeibu 20. g. s. 70. godūs, kai ari 80. godu rodūšajā pylnbrīdā radeituos lelformata figuraluos kompozicejis i portretus.
15:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 13 @ 15:00 – 17:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]