Čehs Pāvels Snasels izdūd gruomotu par sovu pīredzi Latgolā

Čehs Pāvels Snasels izdūd gruomotu par sovu pīredzi Latgolā

Rokstu sagataveja: portals lakuga.lv

27. novembrī ceļu pi skaiteituoju suoks Pāvela Snasela gruomota “Welcome to Latgale, my heart”, informej pats autors. Tei ir dzejūļu i stuostu gruomota angliski, kurā var skaiteit par autora ceļuojumim iz Latgolu; juo dūmom i redzīnim par Latgolu i Latveju; Latgolys kulturys tradiceju i vidis gūdynuošonu; Pāvela personeigū dzeivi i attīceibom ar Latgolu i Latveju.

Gruomota ir par Čehejis pylsūņa vāruojumim i īspaidim Latgolā vīna goda garumā. Pyrmī īspaidi lyka viļtīs, tok pa drupeitei, lobuok īpazeistūt Latgolys dobu, tradicejis, cylvākus, veidojās cyts prīškstots par tū, kas ir Latgola. Jam ir sovpateiga pīredze, atkluojūt unikalū kulturu i sateikūt vysaiduokus cylvākus. Tai kai Pāvelam jau ir prīškstots par Latveju i Latgolu, jis dolās ari sovūs īspaidūs i puordūmuos par situaceju niu i problemom.

Gruomotys golvonais mierkis ir popularizēt Latgolu kai turisma golamierki i styprynuot latgaliskū identitati. Tuos mierkauditoreja ir angliski runojūšī ceļuotuoji i skaiteituoji nu Leitovys, Latvejis, Igaunejis, Suomejis i Čehejis. “Welcome to Latgale, my heart” izdūta div versejuos – e-gruomotā i fiziskajā kopijā. Fiziskūs kopiju skaits ir īrūbežuots – leidz 200 kopiju. Gruomota ir tik suokums tam, kū Pāvels Snasels i juo uzjāmums “Welcome to Latgale IK” gryb dareit.

“Welcome to Latgale, my heart” izdūšonys tīšsaistis pasuokums byus 27. novembrī 19.00. Vysa informaceja par gruomotu, tymā skaitā, kai tū nūpierkt, i pasuokumu atrūnama autora Instagram profilā.

Gruomotys autors Pāvels Snasels. Karteņa nu personeiguo arhiva

Pāvels Snasels ir nu Čehejis. Jam ir 26 godi i pyrma treis godu jis atbrauce iz Latveju, kab studātu Latvejis Universitatē Baļtejis jiurys regiona studeju magistranturā, kur aizasuoce juo aizaraušona ar Latgolu. Universitatis projekti, interese par regionu i liktiņs Pāvelu atvede iz Latgolu, kur jau pusūtru gadu jis dzeivoj Daugovpilī. Piec puorsaceļšonys jis suoce raksteit gruomotu “Welcome to Latgale, my heart”, kab sekuotu sovom div golvonajom dzeivis kaisleibom – Latgolai i rakstnīceibai.

Uzjāmums “Welcome to Latgale IK” tyka dybynuots ar vīnu golvonū mierki – styprynuot latgaliskū identitati caur turismu i muokslu. Tys popularizej Latgolu kai turisma golamierki, kab uzlobuotu regiona ekonomiskū situaceju, kai ari styprynuotu tuo identitati ar storptautyskuos viereibys paleidzeibu. Tuo mierkis ir īkļaut Latgolu pasauļa turisma kartē. Uzjāmums atbolsta Latgolys rakstnīkus i muokslinīkus jūs sapynu eistynuošonā, snādzūt vajadzeigū paleidzeibu i vadeibu vysā muokslinīcyskajā, uzjiemiejdarbeibys i administrativajā procesā. Tuo mierkis ir nest Latgolys muokslu i literaturu pasaulī i nūstyprynuot tymā stabilu poziceju.

Print Friendly, PDF & Email