Naaizmiersti par Ukrainu, turpynoj atbaļsteit!

Naaizmiersti par Ukrainu, turpynoj atbaļsteit!

Rokstu sagataveja: Marta Puzāka, portals lakuga.lv

Nu jau paguojuši gondreiž deveni mieneši, kai īrostū dzeivi ītekmej tyvumā nūteikūšuo karadarbeiba. Dīnā, kod agresorvaļsts Krīveja ībruka Ukrainā, suocēs aktivi labdareibys i atbolsta pasuokumi nalaimē tykušajim ukrainim. Dīvamžāļ niu asam pīroduši pi itūs apstuokļu, tok lobī dorbi vys vēļ turpynojās i sevkurs nu myusu var padareit kū nibejs, kas ītu par lobu kai Ukrainai, tai juos tautai.

Sekoj leidza vītejom dareišonom

Par vītejūs ļaužu zīduojumim Ukrainai Latgolā vys vēļ naaizmierst – atbolsta vuokšona turpynojās vysaidu organizaceju, uzjāmumu voi individualu iniciativu vadeibā. Novembrī Preiļu nūvoda dzeivuotuojim beja vareiba zīduot puortyku, pīdarumus školai i syltys zīmys driebis bīdreibys “Agendum” aba Twitter konvoja organizātajā autobusu zīduošonai Ukrainai, kab zīduotu na viņ transportu školānim, tok ari pyrma ceļa tū pīpiļdeitu ar vysaidim nūdereigim lobumim.

Karteņā: bārni pi zīduojumu autobusa “Pliča sāta” dārzā, foto nu Igora Pliča arhiva

Taipoš ari itūnedeļ ir vareiba vest zīmys driebis i opovus, puortyku, higienys i medicinys precis iz kopejneicu “Raibais asaris”.

Sekoj leidza informacejai par atbolsta i zīduojumu vuokšonys punktim, kab izmontuotu īspieju i sev sūpluokajā apleicīnī veiktu lobu dorbu Ukrainys atbolstam.

Īrokumu sveču taiseišona

Vysā Latvejā arviņ leluoku atsauceibu sajem blindažys aba īrokumu sveču taiseišonys darbneicys. Poštaiseitī gaismekli ir lels paleigs karadarbeibys skortajim ukrainim, kab rast gaismeņu tim, kam atslāgta elektreiba, sasasiļdeit soltajā laikā voi uzsiļdeit čaju i puortyku. Eipaši svecis nūder kareivim, taidys nazkod lītuotys īprīškejūs karūs. Tuos sylda i dag vairuokys stuņdis.

Itūšaļt daudzos piļsātuos, pošvaļdeibuos i īstuodēs teik organizātys sveču līšonys darbneicys. Ka navari pīsadaleit voi tovā apleicīnī taidys nanūteik, tod var nūzīduot labdareibys bīdreibai “Tavi draugi” voska puorpalykumus nu sātā izdadzynuotūs sveču voi pats organizēt darbneicu tyvuokūs cylvāku lūkā i piečuok nūgoduot svecis iz bīdreibys atsarasšonys vītu Reigā, Ventspiļs īlā 50. Īrokumu svecis teik taiseitys metala buņdžuos ar lelu daudzumu gofrāta kartona i parafina.

Karteņā: Latgolys Atteisteibys centra organizātuo īrokumu sveču taiseišona Rēzeknē, foto nu Gunta Rasima personeiguo arhiva

Platforma “Stopify”

Cylvāki, eipaši jaunīši, cīši aktivi abonej vysaiduokus muzykys, kinu i serialu servisus, pīmāram, Netflix ci Spotify. Ikmieneša abonementa suma nasaruoda cīši lela. Par taidu naudu var nūpierkt div kopejis piļsātys centrā. Tai piec leidzeiga principa var abonēt na jau serialu, bet drūseibu, aizsardzeibu i breiveibu Eiropā, par kū niu ceinejās Ukraina nažieleigā kaujis laukā.

Caur platformu “Stopify” ar ikmieneša zīduojumu var abonēt atbolstu Ukrainys bruņuotajim spākim. Par 6,99 eiro voi leluoku zīduojuma sumu var paleidzēt nūdrūsynuot Ukrainys armejai vajadzeigū ekipiejumu i cytys svareigys lītys. Par armejis vajadzeibom informej Ukrainys viestnīceiba Latvejā, sovpus par zīduotajim leidzeklim vajadzeigū guodoj “Ziedot.lv” darbinīki, kas piečuok dūt arī atskaitis zīduotuojim. Tei ir loba īspieja, kai kotrs varim dzeivuot ar sajiutu, ka dorom koč kū lobu, peļnejom karmys pluseņus, na jau tik pasivi veramīs viests i dūmojam vysaiduokys dūmys.

Breivpruoteigais dorbs iz rūbeža

Jau viestejom, kas itūšaļt nūteik iz Latvejis-Krīvejis rūbeža Grebņovys rūbežkontrolis punktā. Tī aktiva breivpruoteigūs darbeiba nūtiks da goda beigu, deļtuo vys vēļ ir vareiba īsasaisteit paleidzeibā bieglim kai ar dorbu, tai ar zīduojumim.

Bīdreibys “Tavi draugi” i “Gribu palīdzēt bēgļiem” vys vēļ meklej breivpruoteigūs komandys bīdrus, kas kasdīnā atsarūn pīrūbeža tyvumā i varātu paleidzēt rūbežkontrolis punktu darbeibā, uzjemūt Ukrainys biegļus. Itūšaļt teik pīduovuots apmoksuots pusslūdzis dorbs piec grafika dīnys voi dīnnakts maiņuos kaidā nu paleidzeibys punktu Grebņovā, Silinē, Terehovā voi Vīntuļūs. Sovu pīteikumu dorbam iz rūbeža syuti iz epostu monta@tavidraugi.lv. Pīteikumā nūruodi rūbežpunktu, kurā gribi dorbuotīs i eisu aprokstu par sevi.

Karteņā: paleidzeibys punkts Grebņovys rūbežkontrolis punktā, foto Amanda Anusane, portals lakuga.lv

Aktivi teik aicynuoti ari zīduotuoji, kab nūdrūsynuotu vysu vajadzeigū iz rūbeža. Bīdreibai itūšaļt cīši vajadzeigi bārnu pamperi (vysu izmāru) i rūtaļlītys, syltuos zīmys jakys i opovi, vīgluo medicina, kai ūgleitis, Smecta, ašņaspīdīņa miereituoji, pluoksteri, marlis saitis, taipoš ari deči, spylvyni, gultys veļa, dvīli, sausuo puortyka. Zīduojumus nūteikti vari nūguoduot pats, braucūt gostūs iz Grebņovys rūbežpunktu, kur var pavadeit koč puors stuņdis, breivpruoteigi paleidzūt na tik rūbežškārsuotuojim, tok ari bīdreibys darbinīkim.

Zīdoj virtuali

Kai īprīšk, tai ari niu platformā ziedot.lv kotrs grybātuojs var zīduot leidzeikļus vysaidom kategorejom piec sovu interešu. Daudzys nu kategorejom ir veļteitys taišni vysaiduokim atbolsta veidim Ukrainai, pīmāram, driebis ci malteite karaveirim, atbolsts bieglim, breivpruoteigajim Ukrainā i daudz kas cyts. Taipoš platformā ir vareiba zīduot ari kasgadejam labdareibys maratonam “Dod pieci!”.

Jau deveitū godu maratons nūtiks eisai pyrma Zīmyssvātku, nu 16. da 22. decembra. Itūgod maratona mierkis ir aicynuot sabīdreibu atbaļsteit Latvejā tykušūs ukraiņu bārnus. Nedelis garumā vysu dīnnakti sevkuram byus vareiba zīduot ar dzīsmi. Vīna dzīsme Latvejis Radejis 5 Pieci.lv eterā par minimalū zīduojumu pīcu eiro vierteibā Ukrainys biegļu bārnim ļaus dzeivuot vēļ vīnu dīnu Latvejā bez sirenu i spruodzīņu.

Zīduojumi paleidzēs nūdrūsynuot bārnu pamatvajadzeibys Latvejā – školys pīdarumi, dators, veseleibys uzlobuošona, psihologisks atbolsts, zīmys opovi, apgierbs i cytys akuti vajadzeigys lītys.

Latvejā itūšaļt ir vaira nakai 35 tyukstūšys biegļu i apmāra trešdaļa nu tūs ir bārni, puorsvorā vacumā nu 2 da 17 godu. Daudzom ukraiņu saimem dzeive biegļu gaituos Latvejā beja juosuok nu nullis – juomeklej pagaidu dzeivisvīta, dorbs, škola i jauni draugi. Kluotyn puordzeivuojumim i jaunajai videi vēļ ari naziņa par tū, kod varēs atsagrīzt sātā i voi vyspuor byus, kur atsagrīzt. Maratons aicynot sabīdreibu apsazynuot, ka mums tei ir privilegeja – dzeivuot mīrā i breiveibā. Paleidzūt ukrainim, mes paleidzam poši sev.

Sekoj leidza kvalitativai informacejai

Turpynoj skaiteit informaceju par nūtikšonom Ukrainā, tok izavielej tūs olūtus, kas eistyn ir puorbaudeiti i oficiali. Niu cīši daudz škārsteikla platformuos izaplota muoņu viests i propaganda, deļtuo esi viereigs i natyci vysam, kū redzi. Sekoj leidza ukrainim socialajūs medejūs, Latvejis i uorzemu žurnalistim, kas viestej par jaunumim nu pošys Ukrainys, kai ari skaiti oficialūs Ukrainys puorstuovnīceibu kontus:

Prūtams, naaizmiersti ari solidarizētīs ar ukraiņu tautu, viesturi i kulturu. Verīs dokumentaluos kinys, dzīdi dzīsmis, īpazeisti jūs muokslu i cyta veida daiļradi. Kūpā mes asam spāks, deļtuo kotrys atbolsts ir svareigs. Slava Ukrainai!

Print Friendly, PDF & Email