Pyrmizruodi pīdzeivuojs pyrmais latgalīšu serials “Fati” (+FOTO)

Pyrmizruodi pīdzeivuojs pyrmais latgalīšu serials “Fati” (+FOTO)

Rokstu sagataveja: Edeite Husare, portals lakuga.lv

Vakar, 30. novembrī, Reigā eipašā seansā “Kino māja” pyrmizruodi pīdzeivuoja pyrmais latgalīšu serials “Fati”. Serials ir četrys serejis gars. Ituo gods golā, 29. decembrī, i cyta gods suokumā, 5. janvarī, serialu byus vareiba nūsavērt ari LTV1 eterā, bet piečuok tys byus daīmams izklaidis platformā TET. Kinuteatrī seriala seanss byus viņ vēļ 10. decembrī Rēzeknē, Latgolys viestnīceibā GORS.

Seriala “Fati” pyrmizruodē kluotyn beja kai seriala idejis autori, fiļmiešonys grupa, atbaļsteituoji, Latvejis Televizejis i TET, tai ari medeju puorstuovi i aicynuotī gosti, kuri varēja par reizi nūsavērt vysys četrys seriala serejis. Televizejis skateituojim kotrā nu ruodeišonys reižu byus vareiba viertīs pa divejom serejom.

Pyrmizruodis vokoru atkluoja kinys leidzproducents i atbaļsteituojs Pīters Ragaušs, kurs pasasmejūt saceja, ka da ituo ir taisejs daudzys “garlaiceiguos” kinys – “Piļsāta pi upis” ir Vīsturu Kairišu, dokumentaluos filmys ar Arni Slobožaninu, bet ar itū ideju asūt koč kas svaigs i sovaižuoks.

“Fatu” komanda pyrmizruodis vokorā pasasaceja vysim, kurī nūticēja idejai i struoduoja, kab tei īsadūtu, kai ari aicynuoja turpynuot atbaļsteit dorbu, kab varātu eistynuot ari seriala ūtrū sezonu. Sovutīs seriala idejis autors Arņs Slobožanins izsvēre, ka jam bejuse svareiga Dīnavydlatgolys leluoka īsaiste latgalīšu kulturys procesūs: “Es ceru, ka itys dorbs byus kai sova veida uzruovīņs Daugovpiļs kinu industrejai! Maņ lela prīca, ka niu ir ari pyrmais latgalīšu serials, bet byutu labi, ka iz prīšku mes iztiktu bez tuo vuorda “pyrmais”, jo mes vīnkuorši taiseitu lītys i byutu pošsaprūtami, ka tuos nūteik latgaliski – filmys, muzyka, seriali i vysa kas cyts. I vēļ ite beja svareigi īsaisteit Dīnavydlatgolu, kas, pa munam, ari ir cīši latgaliska vīta, nu reizem nasaprasta i da gola naizmontuoti tuos latgaliskī resursi. Bet tai tys beja da ituos dīnys vokora!”

Piec seriala pyrmizruodis “Kino māja” vaļdeja prīceiga i gandarejuma pylna atmosfera. Seriala komandai atzineigus vuordus saceja kai atbaļsteituoji i sadarbeibys partnerti, tai ari pyrmizruodis gosti.

Zane Valeniece, Latvejis Televizejis Filmu īpierkšonys nūdalis vadeituoja piec seriala pyrmizruodis saceja: “Cīši breineigi ir tys, ka serialā ir sagiuta Latgolys sajiuta, koč kaids latgalīša kods. Es nazynu, voi eistyn tī tai ir, bet koč kai tai varātu byut izatāluojuse. Poša naasu nu Latgolys, deļ tuo beja puora vītu, kur saprūtu, ka latgalīši izteicīņus sajādz lobuok jau nu kūpejuo konteksta, bet tī beja tik suleigi i breineigi. Ari latgalīšu volūda ir nūturāta perfektā leiminī, ka nav sajiutys, ka tei ir puorspeilāta. Itys mums vysim beja eksperiments, bet gribīs televizejis skateituojim dūt ari cyta veida izklaidi i itei ir kvalitativa izklaide, koč kas jauns i originals. Seriali taišni ir tys žanrys, kur var eksperimentēt ar vysa kū!” Juos kolege Latvejis Televizejis juriste Dace Spunde pībiļst: “Maņ ruodejuos cīši vīgli, humora pylni, koč kas taids, kas, pa munam, itūbreid cylvākim varātu byut cīši vajadzeigs.”

Serialā var dzierdēt i redzēt ari latgalīšu hiphopa izpiļdeituoju Ūgu, kurai itaida veida fiļmiešona beja pyrmuo pīredze, jo īprīšk pīsadaleits viņ muzykys klipu fiļmiešonā. Ūga atsazeist, ka jau seņ gribiejuse, kab kaidu reizi kaids juos muzyku izmontuotu ari kinā, i leidza ar “Fatim” pīsapiļdejs juos itys mozais sapyneits – serialā skaņ juos dzīsme. Ūga stuosta: “Muna lūma serialā beja vīnkuorša – beja juosataisa balleite! Es pīsadaleju fiļmiešonā jau zam vokora, bet fiļmiešonys komanda struoduoja vysu dīnu, par kū jūs apbreinoju. Naīrosts pošai ruodejuos, ka juobrauc fiļmētīs iz Daugovpili – parosti vyss Rēzeknē nūteik, bet niu Daugovpilī i tys ir kruta!”. Par īspaidim piec seriala nūsavieršonys Ūga soka: “Īprīšk beju redziejuse puora fragmentu, kurī jau maņ patyka. Niu redzieju vysu – beja vītys, par kurom gribieju zynuot, kas tod tī eistineibā nūtyka! Tagad redzieju i beju šokā – maņ cīši patyka! Vyss tai dabiski i dzeiveigi izaver. Eistyn gondreiž vysam nūticieju!”  

Karteņā: Ūga seriala “Fati” pyrmizruodē, foto Edeite Husare/portals lakuga.lv

Režisors Vīsturs Kairišs nūsmej, ka pyrmajūs īspaidūs var pasadaleit kai vīnkuoršs skateituojs i latgalīts: “Kai režisors es nikod navarātu sataiseit taidys kinys, i tys maņ roda apbreinu par tū vīglumu, kas ir serialā! Šaļtim aizasmieju da osoru. Dūmoju, ka itei ir patriotiska kina i taišni itaidā veidā latgalīšu patriotismu var veicynuots vaira, nakai taisūt speciali dūmuotys patosa pylnys patriotiskuos kinys. Labi, ka seriala komanda tik drūsmeigi struoduoja ar humoru! Maņ patyka cīši! Vajadzātu “Fatus” vēļ paruodeit kinuteatru seansūs kai tys beja šudiņ. Serials ni ar kū nav švakuoks par cytom izklaidis kinom, pat daudzi autentiskuoks. Profesionali, saprūtams, ir kur augt i augt, nu beistūs, ka, augūt profesionali, varātu pagaisynuot tū “teirū montu”, kas ite ir tik breineiga! Koč kū itaidu vajadzātu ari iz prīšku atbaļsteit – specifiskū latgalīšu humoru, patriotismu. Ite ir sajiuta, ka es asu taids latgalīts – varit par mani smītīs voi kū dareit, bet taids es asu!”

Vīnu nu golvonūs lūmu – školneicu Martu – serialā spēlej Daugovpiļs teatra aktrise Zanda Mankopa. Jei īprīšk beja redziejuse seriala malnū variantu, bet piec pyrmizruodis iz leluo ekrana jei soka: “Itys ir emocionali, jo es par reizi atguodoju tū vysu fiļmiešonys procesu, kas beja fantastiskys! Saprūtams, ka niu ir interesanti redzēt, kai vyss ir salikts, jo mes jau fiļmiejom na tai, ka vyss īt piec kuortys. Itei ir muna pyrmuo kinu pīredze, deļtuo tys beja vēļ aizraunūšuok. Cīši lela prīca, ka mani paaicynuoja i beja īspieja pīsadaleit itadā avanturā!” Latgalīšu volūda Zandai nav dzymtuo, bet seriala vajadzeibom vajadzēja īsavuiceit: “Puse nu mane ir latgalīte – vysa munys mamys rodu puse vysa ir nu Latgolys, vosoruos bierneibā dzierdieju, koč kur dzili vydā beja. Maņ cīši pateik latgalīšu volūda, vysu saprūtu, nu runuot beja pagryuši. Bet tei gryba dareit beja leluoka, tys deve motivaceju īsavuiceit!”

Izklaidis platformys TET, kurā vysys seriala serejis varēs nūsavērt par reizi piec TV pyrmizruodis, puorstuove Ilze Korjusa saceja, ka da ituo beja beja redziejuse pyrmuos divejis serejis: “Maņ ruodīs, ka itys ir veiksmeigs produkts i tycu, ka byus ari labi vieršonuos ruodeituoji, jo vysmoz myusu platformā kriminaluos komedejis verās daudzi. Itys beja eksperiments kai ar volūdu, tai režisora debeju, nu mes raugom atbaļsteit ari debeju dorbus, pi tuo ite beja cīši puorlīcynūšs lobu akteru sastuovs.”

Karteņā: ekranuzjāmums nu seriala “Fati”

Seriala “Fati” izpyldproducente, scenareja autore i ari seriala aktrise Kristīne Veinšteina atsazyna, ka, saprūtams, ka iz leluo ekrana serials izavēre daudzi īspaideiguok nakai īprīšk datora ekranā malnais variants, kū beja redziejuse. Jei soka: “Maņ prīca, ka mums izadeve! Prūtams, ir mozuos lītenis, kū varēja cytaižuok, kū niu nu molys lobuok radz nakai, kod esi vydā, bet es prīcojūs, ka puiši īsadreikstēja taiseit serialu i vyss tyka itai eistynuots! Tai kai beju īsaisteita tik daudzi dažaiduos lūmuos ap serialu, maņ vosorys nabeja vyspuor, bet tei beja breineiga pīredze, nikod tai nabeju struoduojuse. Pasavuiceit nu pīsaisteituos Reigys komandys beja foršs gryudīņs nuokūtnei i pošim atsateisteit – ka Reigā dora itai, pasaulī dora tai i mums Latgolā ari vajadzātu!” Taipat Kristīne atzeimoj, ka fiļmiešonys komandai asūt idejis jau ūtrai seriala sezonai i izsoka cereibu, ka vyss saīs i byus vēļ lobuok. Par seriala scenareju i varūnim Krisīne pībiļst: “Serials ir vīglys, bet ir ari, par kū padūmuot – par myusu cylvākim, par Latgolys cylvākim. Seriala ideja beja Arņa i tod mes jū apaudzējom. “Fatu” varūni ir nu dzeivis: nu ir školuotuoji pīkusuši i reizem naapmīrynuoti ar dzeivi, ir sīvys, kas komandej, i mamys ari ir taidys, kaidys juos reizem ir – dažaidys.”

Vaira par seriala “Fati” tapšonu var izzynuot portala lakuga.lv reportažā nu seriala fiļmiešonys laika augustā Daugovpilī ITE.

Papyldynuots:

Sastdiņ, 10. decembrī, četruos stuņdēs vokora seriala komanda aicynoj iz eipašu “FATU” seansu Rēzeknē, Latgolys viestnīceibā GORS, kas byušūt vēļ vīneiguo īspieja publiski nūsavērt serialu pyrma televizejis pyrmizruodis. Beleti iz seansu ITE.

Seriala “FATI” pamatfakti:

  • Producenti: Arņs Slobožanins (Latgolys Producentu Grupa) i Pīters Ragaušs
  • Izpyldproducente: Kristīne Veinšteina
  • Režisors: Vadims Bogdanovs
  • Idejis autori: Arņs Slobožanins, Pīters Ragaušs, Vadims Bogdanovs
  • Scenareja autori: Ieva Pastare, Vadims Bogdanovs
  • Muzyka: Apvīneiba “Ausmeņa Records”, “Cegly”, Arnis Slobožanins, Mārcis Lipskis, Jurgis Lipskis, Amanda Lapa, Ūga
  • Golvonajuos lūmuos: Ritvars Gailums, Māris Korsiets, Zanda Mankopa, Liena Šmukste, Kristīne Veinšteina, Jurijs Djakonovs
  • Izdūts: 2022. godā, 4 serejis kotra 26 minutu garumā.
  • Pyrmizruode televizejā: 29. decembrī LTV1
Print Friendly, PDF & Email

Nūtikšonu kalendars

Feb
4
Sai
vysu dīnu TLMS “Dzīpariņš” 45 darbeibys go... @ Latgolys Kulturviesturis muzejs
TLMS “Dzīpariņš” 45 darbeibys go... @ Latgolys Kulturviesturis muzejs
Feb 4 vysu dīnu
Jaunū izstuožu godu Latgolys Kulturviesturis muzejs īsuoc kūpā ar ilggadejū i vysod atsauceigū sadarbeibys partneri – Tautys lītiškuos muokslys studeju “Dzīpariņš”. Tei nūdybynuota jau 1978. godā i apvīnoj sevī vysaidu paaudžu rūkdarbneicys, kurys saista kūpeiga[...]