Izdūts Bronislavys Martuževys dzejis kruojuma “Rakstītāja” faksimils

Izdūts Bronislavys Martuževys dzejis kruojuma “Rakstītāja” faksimils

Rokstu sagataveja: portals lakuga.lv

Izdevnīceibā “Latvijas Mediji” izdūts Bronislavys Martuževys dzejis kruojuma “Rakstītāja” faksimilizdavums, informej B. Martuževys fonda vaļdis prīšksādātuoja Anna Egliena. Sagataveišonys pūsmā miļzeigu dorbu kotrys lopys, kotra mytrumā izplyudušuo dzejūļa rūkroksta digitalajā apstruodē veice Ivars Noviks, bet piecvuordu gruomotai pīraksteja profesore Janīna Kursīte.

Itū kruojumu Bronislava Martuževa sakuortuoja laikā nu 1946. gods novembra leidz 1951. gods 14. februaram, kod globuojuos pagreidē sovā sātā “Lazdiņas”. Tys ir unikals i kai jaunuos dzejneicys literaruos tapšonys aplīcynuojums, i ari kai laikmata kulturviesturiskuo līceiba. “Rakstītājā” īraksteitys ari tūs godu tautys liktiņgaitys, tys ir veļtejums tim, kuri napasadeve. Šudiņ tys sasasauc ari ar ukrainim i jūs titaniskū ceiņu pret barbariskajim krīvu okupantim – īnaidnīks tūreiz i niu ir vīns i tys pats.

Vairums itūs dzejūļu ir publicāti vysaidūs kruojumūs, tok tī jī pagaisynoj laikmata konturys. Daudzus ir izmontuojuši komponisti – Mārtiņš Brauns, Jānis Lūsēns, ari poša Martuževa. Sigvards Kļava ar Latvejis Radejis kori 2014. godā izveiduoja koncertizvadumu “Rakstītāja”.

Kruojuma attaiseišona tiks svieteita Lubuonā dzejneicys 99. dzimšonys dīnā 2023. gods aprelī, tod ari varēs tū nūpierkt. Niu izdūts 200 eksemplaru, partū gruomotu veikalūs tys nabyus nūpierkams.

Kruojums izdūts ar “Latvijas valsts mežu” i Vaļsts kulturkapitala fonda atbaļsteituos Latgolys kulturys programys 2022 paleigu.

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]