Kulturys īsacejumi nedeļai: Ontans i juo Zīmeļlatgola

Kulturys īsacejumi nedeļai: Ontans i juo Zīmeļlatgola

Rokstu sagataveja: portals lakuga.lv

Ituos nedelis vydā vuordadīnu kalendarā var īraudzeit, ka svātki Ontonam. Deļtuo par kulturys īsacejumim itūreiz pasaryupiejs Baļtinovys vydsškolys direktors aba vīns nu Latgolys slovonuokūs Ontanu (tai byus Zīmeļlatgolā), kurs itū gūdu dabuojs ar sova laiks spylgtū lūmu Baļtinovys dramatiskuo kolektiva “Palādas” Danskovītis lugu “Ontans i Anne” uzvadumūs. Imants soka, ka niu jau kaidu laiku vys tik vaira nav iz skotivis, bet pateikami asūt, ka jū vys vēļ atguodoj kai Ontanu.

Karteņā: Ontans i Pīters (Imants Slišāns i Jāzeps Jermacāns nu Baļtinovys amaterteatra “Palādas”) Danskovītis lugu “serialā” “Ontans i Anne” (aptyvai 2015. goda foto).

Izalauzt nu “Pīcu pantu”

Latgaliskuo izalausšonys ustoba “Pīci panti” Škilbānu pogosta Upītē laikam reklamu naprosa. Beidzamā laikā gona populara, ari školāni nu daudzu Latgolys školu īpazynuši “Pīcus pantus”, izmontojūt vaļsts programmys “Latvijas Skolas soma” pīduovuojumu. Lai gon Upīte tepat sābrūs Baļtinovai, izmieginovu itū izalausšonu tikai pyrma dažu dīnu. Tys beja eists baudejums breivai sastdīnei! Rūsynoju aizbraukt iz Upīti, iz izalausšonys ustobu “Pīci panti”, kur atraktivā veidā, puorbaudūt sovu erudiceju, vieļ vaira pasmeļt nu latgaliskuo olūta, vaira īpazeit dzejnīku, nūvodpietnīku, unikalu latgalīšu personeibu Ontonu Slišānu. Paļdis par “Pīcim pantim” Andrim Slišānam! Prīca par vysim tim cylvākim, kuri ar aizrauteibu veidoj Upītes kulturtelpu, kuri davuši jaunu dzeiveibu nazkod slāgtajai Upītes školai, kas puordzymuse par unikalu latgalīšu kulturys centru Zīmeļlatgolā. A vysa ituo suokums i pamats – Ontons Slišāns! Tagad juo bārni i mozbārni turpynoj, eimūt plašumā i dziļumā! Prīca!

Karteņā: Izalauzšonys ustoba “Pīci panti”

Aizraunūšais kriminalromans “Bruoli”

Ka naesi izlasejs, tod izlosi Alda Bukša romanu “Bruoli”. Ari tys – sveicīņs nu Zīmeļlatgolys! Aldis Bukšs – myusejais, baļtinovīts, pyrma 20 godu beidzs Baļtinovys vydsškolu. Jau nu školys godu aizrauteigs, erudits cylvāks, Latvejis i Latgolys patriots! Kūpā ar klasisbīdrim jī sovulaik beja spūža komanda latgalīšu volūdys i kulturviesturis olimpiadēs, beja “Vosoruošonuos” i vysur kur cytur. Tei degsme i patriotismys nikur nav zuds! Kod Aldis izduovynova gruomotu, tū izlaseju pusūtrā dīnnaktī. Teišam aizaruovu! Spraigs sižets, dzeiva volūda. Tī sasavej jauna cylvāka liktiņa lineja, Latgola i Eiropa, viesture i šudīna, ir geografiski akcenti, globaluos lītys i dzymtuos vītys izjiuta. Saīt aizadūmuot, kaidys ir myusu izvēlis, kaidys myusu vierteibys? Latvejis Radejis Latgolys studeja i latgalīšu kulturys kusteiba “Volūda” ar Kristapu Rasimu kai muokslinīcyskū vadeituoju i režisoru tagad eistynoj projektu, lai “Bruoļus” radeitu radioīrokstā. Breineigi! Dūmoju, ka ir vārts Alda Bukša “Bruoļus” izlaseit vieļ reizi, a tod gaideit, kod varēs klauseitīs radiobolsūs.

Karteņā: Alda Bukša kriminalromans “Bruoli”, foto Vineta Vilcāne/portals lakuga.lv

Ontona Slišāna jubilejis goda suokums ar “Čipierkstneiti”

18. janvars – Ontona dīna!  Itamā dīnā Rekovys kulturys centrā īpazeisem jaunū golda spēli latgaliski “Čipierkstneits”. Zyni, kas ir čipierkstneits? Ari itys vuords īt nu Ontona Slišāna savuoktūs boguoteibu kruojuma. Itys vuords ir ari vīnys nu daudzūs Ontona gruomotu nūsaukumā. Čipierkstneits latvīšu literarajā volūdā varātu byut “šķipsna”, taids māra daudzums, kū var sanimt četrūs pierstūs. 18. janvara – Ontona dīnys –pasuokums īvoda dzejnīka (ailinīka), literata, publicista, nūvodpietnīka, folklorys dryvys kūpieja, Latgolys sabīdryskuo darbinīka Ontona Slišāna  jubilejis godu: 2023. goda 28. decembrī jam palyktu 75 godi.

Karteņā: golda spēle “Čipierkstneits”, foto Edeite Husare/portals lakuga.lv
Print Friendly, PDF & Email

Kalenders

Apr
12
Pīk
19:00 Grupys “Galaktika” albuma prezen... @ Smiļtinis piļsātys kulturys centrs
Grupys “Galaktika” albuma prezen... @ Smiļtinis piļsātys kulturys centrs
Apr 12 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]
Apr
13
Sai
all-day Osvalda Zvejsalnieka pīminis izs... @ Latgolys Kulturviesturis muzejs
Osvalda Zvejsalnieka pīminis izs... @ Latgolys Kulturviesturis muzejs
Apr 13 all-day
Izstuodē tiks eksponātys muokslinīka gleznys nu Latgolys Kulturviesturis muzeja Muokslys kolekcejis, kas puorsvorā atspīgeļoj juo agreimū rodūšū darbeibu 20. g. s. 70. godūs, kai ari 80. godu rodūšajā pylnbrīdā radeituos lelformata figuraluos kompozicejis i portretus.