Bārnu gruomotu par Lūznovys muižys kulturviesturiskū montuojumu var skaiteit ari latgaliski

Bārnu gruomotu par Lūznovys muižys kulturviesturiskū montuojumu var skaiteit ari latgaliski

Rokstu sagataveja: portals lakuga.lv

Pošuos goda suokuos bīdreiba ESTO sadarbeibā ar Lūznovys muižu izdavuse izgleitojūšu eisstuostu i aizdavumu gruomotu bārnim “Es dzīvoju muižā! Mūzis”, informej muižys puorstuove Inga Žirgule. Gruomota vīgli uztveramā plykspuorņa Mūža eisstuostu formatā ļaun īpazeit Lūznovys muižys, kas calta 20. godu symta suokuos, apbyuvē vēļ sasaglobuojušu, kai ari jau pagaisynuotū kulturviesturiskū montuojumu.

Skaitūt Lūznovys muižā dzeivojūšuo plykspuorņa Mūža nakts pīdzeivuojumu eisstuostus, izkruosojūt kuormu malnboltuos fasadis i atdzeivynojūt kruosys muižys parka dobys ainovuos, kai ari rysynojūt krystvuordu meiklis, bārnim byus vareiba īpazeit Lūznovys muižys kompleksa i citys Rāznys nacionaluo parka viesturiskuos ākys i tūs nazkodejū nūzeimeibu – jaunū i vacū muižys āku, stali, kaļvi, Zosnys bazneicu, klieti, vacū školu, muokslinīku nomu i cytys. Taipat iz gruomotys pādejuo vuoka ir karte, kurā nu objektu var izveiduot sovu maršrutu i dūtīs realā kulturviesturis montuojuma izpietis pastaigā. Gruomotys mierkauditoreja ir pyrmsškolys i jaunuokūs klašu školys vacuma bārni.

“Es dzīvoju muižā! Mūzis” var byut paleigs ari ekskurseju gidim i školuotuojim, kuri tū varēs izmontuot vysaidom nūdarbeibom, apvīnojūt kompetenču pīejai rakstureigū holistiku: viesturis izzynuošona, nūvoda vuiceiba, leidza dorbuošonuos, zeimiešona, interesis radeišona par prīškmatim i objektim i cytys dareišonys. Gruomota var byut vierteiga laika pavadeišonai vysai saimei kūpā – kai pīaugušajim, izavielejūt orientiešonūs dobā i kartis treneņus, atrūnūt kartē īzeimātūs objektu atsarasšonys vītu, tai bārnim, īpazeistūt viesturi car plykspuorņa Mūža stuostim i aizdavumim. Izdavums sagataveits latvyski, latgaliski, angliski i ukrainiski, kas reizē ir vierteiba vītejuos identitatis styprynuošonai i aktualitatei, kai ari izmontuojama latvīšu i latgalīšu volūdys vuiceibu procesā itūšaļt Latvejā dzeivojūšajim ukraiņu bārnim.

Foto: Edeite Husare/portals lakuga.lv

Jaunuos gruomotys idejis autore i projekta vadeituoja ir Inga Žirgule, tekstu autore Līga Čevere, redaktore Anna Rancāne, angliski tekstu tulkuoja Iveta Graudiņa, ukrainiski – Daiga i Valērijs Stavski, bet latgalīšu rokstu volūdā puorlyka Ilga Šuplinska. Gruomotys zeimiejumu i vuoka dizaina autore ir Līga Romančuka, bet maketātuojs – Māris Justs.

Gruomota “Es dzīvoju muižā! Mūzis” izdūta ar Rēzeknis nūvoda pošvaļdeibys Rodūšūs dorbu konkursa i Lūznovys pogosta puorvaļdis finansialu atbolstu. Gruomotys prezentaceja plašuokai publikai paradzāta 18. februārī 15.00 stuņdēs Lūznovys muižā. Tī sevkurs grybātuojs gruomotu varēs nūpierkt ari sev.

Print Friendly, PDF & Email

Nūtikšonu kalendars

Feb
4
Sai
vysu dīnu TLMS “Dzīpariņš” 45 darbeibys go... @ Latgolys Kulturviesturis muzejs
TLMS “Dzīpariņš” 45 darbeibys go... @ Latgolys Kulturviesturis muzejs
Feb 4 vysu dīnu
Jaunū izstuožu godu Latgolys Kulturviesturis muzejs īsuoc kūpā ar ilggadejū i vysod atsauceigū sadarbeibys partneri – Tautys lītiškuos muokslys studeju “Dzīpariņš”. Tei nūdybynuota jau 1978. godā i apvīnoj sevī vysaidu paaudžu rūkdarbneicys, kurys saista kūpeiga[...]