Runuot vīnu dīnu tikai latgaliski – vīnkuorši voi izaicynuojums?

Runuot vīnu dīnu tikai latgaliski – vīnkuorši voi izaicynuojums?

Roksta autore: Amanda Anusāne, portals lakuga.lv

Pyrma vairuoku mienešu portals lakuga.lv sovim Instagram konta sekuotuojim aizdeve vaicuojumu, voi jī Latgolā ar svešinīku aizsuoc sarunu latgaliski – 16 nu 56 aptaujis dalinīku atbiļdēja “nui”. Bīži vīņ ari es ar svešinīku automatiski suocu sarunu latvyski, koč i latgalīšu volūda ir muna dorba i saimis volūda. Kab nūskaidruotu, voi aizsuokt sarunu i runuot tik latgaliski ir vīnkuorši voi vys tik izaicynuojums, izdūmuoju sataiseit nalelu eksperimentu. Tymā pīsadaleišu es, roksta autore Amanda Anusāne, Šmakovkys muzeja vadeituojs Raivis Malnačs i atzolīte Buorbola Anna Bierzeņa. Itymā eksperimentā vīnu dīnu raudzeisim runuot tikai latgaliski Reigā, Daugovpilī i Rēzeknē.

Kai Buorbolai guoja Reigā?

Buorbola Anna Bierzeņa ir latgaliskuo jaunīšu seminara “Atzolys 2022” dalineica, kura seminarā sev pastateja nūsacejumu, ka vīnu dīnu nedeļā jei runuos tikai latgaliski – vysleidza kur atsarostu i vysleidza ar kū. Tai maņ ari roduos ideja par itū eksperimentu. Piec vairuoku mienešu vaicuoju Buorbolai, kura dzeivoj i vuicuos Reigā, kai jai īt ar itū ideju i voi ar kaidys dīnys īspaidim jei varātu pasadaleit portalam lakuga.lv.

Buorbola par vīnu nu dīnu, kod jei runuoja tik latgaliski: “Cylvāki školā i saimē nimoz nav puorsteigti, ka es runoju latgaliski, ak jau partū, ka nu mane tys ir gaidoms, muns bruoļs i tāvs ari runoj latgaliski. Puorsvorā vysi mani ari saprūt, par tū ir prīca, ka cylvāki mani var uztvert. Tok ir frazis voi vuordi, kurus kaids ari nasaprota, par pīmāru, Šmuki izaver!, videļca, lizeika, luova. Kopejneicā mani saprota švaki, kod saceju “nui”, iz mane pasavēre lelom acim i nasaprota – ite “jā” voi “nē”.”

Iz vaicuojumu, kai jai beja runuot tikai latgaliski, voi nasagribēja kaidu reizi puorsaslēgt iz latvīšu volūdu i voi jei vēļ atkuortuos itū eksperimentu, Buorbola atbiļd: ”Uj, dažu reizi suoku runuot latvyski, bet, kai dagivu sevi, tai ar reizi raudzeju puorsaslēgt iz latgalīšu volūdu. Maņ beja gryuši, partū, ka apleik vyss nūteik latvīšu volūdā. Pat, ka mani saprūt, tod nav nivīna, kas varātu maņ atbiļdēt latgaliski. Prūtams, ka es turpynuošu runuot latgaliski, tei jau nabyutu es, ka tū nadareitu!”

Daugovpilī ari runoj latgaliski

Par latgalīšu volūdu vīnu dīnu Daugovpilī stuosta Raivis Malnačs: “Dīna suokuos ar īsapierkšonu tierdznīceibys centrā “SOLO”, kur guoju pierkt zīmys apovus. Tūs meklieju divejuos vītuos. Pyrmajā veikalā iz munim aicynuojumim latgalīšu volūdā beja, es pat saceitu, satraucūša puordevieja reakceja – vīnu breidi tyka raudzeits puorīt gon iz latvīšu, gon angļu volūdu. Kai nūprūtu, puordeviejam latgalīšu volūda leidzynuojuos leitovīšu, kuru ir dzierdiejs puora reizis dzeivē. Nanūsavīnuojuši par zīmys apovu asameibu veikalā, guoju iz nuokušū veikalu. Tī komunikaceja guoja raiti, bez aizagiušonys – kai izaruod, darbinīka vacuoki īmūt nu natuolu lauku, kur kasdīnā lītoj latgalīšu volūdu. Atrads zīmys apovus, guoju izpieteit situaceju iz īlys.”

Iz īlys Raivis raudzeja nūskaidruot, kur atsarūn tyvuokuo tramvaja pītura, eksperimentu skaita par izadavušu, divejūs nu desmit dialogu jis atbiļdi sajēme: “Nu desmit izspālātūs dialogu divejūs gadīņūs īdzeivuotuoji iz munu vaicuojumu latgaliski atsasauce teirā latvīšu volūdā. Puorejūs gadīņūs lyudze puorīt iz krīvu volūdu voi nareagēja.”

Pats Raivis stuosta, ka Šmakovkys muzejā latgalīšu volūda ir kasdīna – kolegi sovā storpā tī runojūt latgaliski. Vīta ir ari akcejis “Latgalīšu volūdai draudzeiga vīta” sarokstā. “3. februarī muzejā īsaroda grupa nu Reigys, kura gribēja ekskurseju latvīšu volūdā. Eksperimenta nūlyukūs (ari kasdīnā pīduovuojam ekskursejis latgaliski, kas klientim izraisa cīši lelu interesi) suoku ekskurseju vadeit latgaliski. Reidzuoni jau beja sajiusmā nu pyrmūs pasaceitūs teikumu, i saprotu, ka drūsai varu turpynuot taidā pošā gorā. Pozitivys emocejis i perfekta atgrīzeniskuo saite – kas var byut lobuoks par itū. Interesanta situaceja beja dīnys izskaņā, kod muzejā īsaroda apmaklātuoji nu Leitovys – kai izaruoda, latgalīši ar leitovīšim var sasaprast gona labi – kai ni kai radnīceigys volūdys,” tai Raivis.

Raivis skaita, ka eksperiments konkretajā dīnā izadeve iz vysim 100% i sacynoj, ka kūpumā latgalīšu volūda Daugovpilī ir sastūpama, tū var pamaneit Šmakovkys muzejā, Gubernatorā, Artilērijas pagrabos i cytur.

Voi Latgolā vysim obligati juorunoj latgaliski? Mekleju atbiļdis Rēzeknē

Es poša sevi bīži izaicynoju runuot latgaliski ar svešinīkim, tok ni vysod tys izadūd veiksmeigi, tok maņ pošai ir interesanti – atbiļdēs latvyski voi latgaliski? Piec kotrs taidys reizis i ari piec ituo eksperimenta sacynuoju, ka maņ vysvīgļuok runuot latgaliski ir naformaluokā vidē.

Eksperimenta dīnā problemys maņ nasaguoduoja runuot latgaliski servisā, eipaši, kod zynu, ka tī struodoj darbinīki, kuri ari runoj latgaliski. Ar veikala-salona “Lāde” darbinīkim nikod naasu komuniciejuse cytaižuok, kai tik latgaliski. Itūreiz vajadzēja sasazynuot e-postā i teleponiski, kas ari, prūtams, nu obeju pušu nūtyka latgaliski. “K-SENUKAI” veikalā darbinīki maņ ari vysod atbiļd latgaliski, pierkūt lampu eksperimenta dīnā, ari nikas nasamaineja. Dagvīlys uzpiļdis stacejā “Circle K” itūreiz vys atbiļdi nasajiemu latgaliski, tok cytys reizis ari tī mani apkolpoj latgaliski. Īguoju veikalā “Rimi” piec pīna ar dūmu, ka vys jau maņ atbiļdēs latvyski, tok, gaidūt ryndā, dzierdieju, ka puordeviejis sovā storpā sasarunoj latgaliski, ar reizi nūdūmuoju – breineigi! Vysgryušuok maņ īt ar runuošonu latgaliski školā – Rēzeknis Tehnologeju akademejā, koč ari škola ir akcejis “Latgalīšu volūdai draudzeiga vīta” sarokstā i cīši saisteita ar latgaliskū, tok es poša nasajiutu ārtai i navaru izkuopt nu sovys komforta zonys. Ari itamā reizē vyss muns eksperiments apsastuoja pi “Loba dīna!”.

Kūpumā eksperiments nūritēja veiksmeigai, saprotu, ka vyss atkareigs nu tuo, kai i ar kū esi pīrads sasarunuot i kaids cylvāks tev stuov prīškā. Eksperimenta dīnā nikuo jauna deļ seve naatkluoju, tok saprotu vīnu, ka nav sevi juopīspīž vysuos situacejuos runuot latgaliski, ka jiutu i grybu, tod runoju, ka nasajiutu labi – runoju latvyski. Tok aicynoju laseituoju bīžuok izmontuot latgalīšu volūdu saziņā, jo tikai tai mes vysi varēsim justīs ārtuok, kod cytureiz komunicēsim latgaliski.

Print Friendly, PDF & Email

Kalenders

May
21
Ūtr
15:00 Izstuodis “Juoņs nu Dzeņagola” a... @ Latgolys Kulturviesturis muzejs
Izstuodis “Juoņs nu Dzeņagola” a... @ Latgolys Kulturviesturis muzejs
May 21 @ 15:00 – 16:30
Izstuode byus veļteita muokslinīkam i literatam Juoņam Trūpam (1924-1989), pīmynūt jū symtgadē. Koč i sovys dzeivis leluokū daļu J. Trūps ir pavadejs trymdā, dzeivuodams ASV natuoli nu golvyspiļsātys Vašingtonys, vystik vysu sovu rodūšū darbeibu, breivū[...]