Turpynojam byut kūpā ar Ukrainu!

Turpynojam byut kūpā ar Ukrainu!

Roksta autore: Marta Puzāka, portals lakuga.lv

Niu jau paguojs gods, kai Ukraina varūneigi aizstuov sovu zemi pret Krīvejis militaruos agresejis uzbrukumim. Pyrma goda, 24. februarī, mes vysi izruodejom atbolstu Ukrainai i tuos dzeivuotuojim, organizejūt labdareibys akcejis, atbolsta pasuokumus i koncertus, vuocūt zīduojumus i vīnkuorši īškeji asūt kūpā. Vysu godu par atbolstu natyka aizmiersts, tok ari niu ir cīši svareigi vys vaira paleidzēt i īsastuot par Ukrainu. 

Atbolsts i labdareiba turpynojās

Latvejis organizaceju, uzjāmumu, pošvaļdeibu i dzeivuotuoju uzjiemeiba reikuot vysaidys akcejis i projektus Ukrainys atbolstam ni iz šaļti nav mazynuojusēs. Ari itūšaļt kotram nu myusu ir vareiba īsasaisteit ci pazīduot kai materialys lītys, tai naudu ukrainim.

Zīduojumi škārsteiklā. Itūšaļt vys vēļ aktivi turpynojās zīduojumu vuokšonys programys Ukrainai platformuos Ziedot.lv i Stopify. Stopify car ikmieneša abonementu pīduovoj zīduot konkretu summu Ukrainys bruņuotajim spākim. Da šam Stopify izmontoj vaira nakai 6 000 abonentu, kūpumā sazīdojūt gondreiž 300 000 eiro.

Taipoš ari platformā Ziedot.lv kotrs nu myusu var zīduot naudu vysaidom kategorejom, pīmāram, elektreibys i iudiņa atjaunuošonai Ukrainā, drēbis ci maļteite karaveirim, paleidzeiba bieglim i jaunīšim i daudz kas cyts. 

Adejumu akceja. Kai aktualys beja sveču līšonys darbneicys, tai niu aktuala ir adejumu akceja. Latvejis Posts sadarbeibā ar bīdreibu “Tavi draugi” i “Mēs Iecavai” da 17. marta aicynoj sevkuru zīduot adeitys zečis, cymdus, šalis i capuris, muguru siļdeituojus i eipašys pūgojamuos zečis pīaugušajim. Syltuos montys dūmuotys Ukrainys kareivim, kab sasiļdeitu jūs i paleidzātu piec īspiejis iļguok nūsaturēt frontē zīmys soltumūs. Adejumus var nūdūt sevkurā Latvejis Posta nūdaļā ar nūruodi iz paceņis: Akcija Adījumi, EKSPRESPASTS, Ziemeļu iela 10, Mārupes novads.

Zīduojumi rūbežpunktim. Ari bīdreibu “Tavi draugi” i “Gribu palīdzēt bēgļiem” breivpruoteigī vys vēļ turpynoj ar lelu atbiļdeibu i sirds syltumu uzjimt biegļus iz Grebņovys i Silinis rūbežkontrolis punktim. Bieglu plyusma cīši mozuoka napalīk, deļtuo sabīdreibys atbolsts i zīduojumi vys vēļ ir cīši vajadzeigi. Itūšaļt aktualī zīduojumi ir treis vīnā ci škeistūšais kopejs, čajs, aplejamuos zupys, putrys i roltoni, taidi soldonumi kai rīksti, capumi šykaladā, taipoš ari ībīzynuotais pīns meikstajuos paceņuos. Nu higienys precem nūdereigys ir dušys želejis, zīpis, velis mozgojamī leidzekli i bārnu pamperi 4/5/6 izmāru. Zīduojumus var nūguoduot pats, braucūt iz Grebņovys ci Silinis rūbežkontrolis punktim.

Atbolsta pasuokumi kara godadīnā

24. februarī vysā Latvejā nūtiks vysaiduoki Ukrainys atbolsta pasuokumi, kab vīnuotu dzeivuotuojus i justu leidza Ukrainys vaļstei i ukrainim, kas jau goda garumā dzeivoj kara cīsšonuos i nataisneibā.

Preiļu viesturis i lītiškuos muokslys muzejā 24. februarī 14.00 stuņdēs tiks atkluota izstuode “Kur gaismas vara, lai nebūtu kara?”, kur byus vareiba apsavērt latvīšu i ukrainu muokslinīku dorbus. Izstuodis dorbi, kas veļteiti Ukrainys karam i tuo skaudrajai dzeivis patīseibai, byus apsaverami da 31. marta.

Ari Rēzekne byus kūpā ar Ukrainu. Vysys dīnys garumā byus vareiba nūlikt sveceiti pi Muorys pīminekļa. Taipoš 18.00 stuņdēs Rēzeknis Festivala parkā nūtiks koncerts “Ukrainas atbalstam”, kur uzastuos na viņ latvīšu muziki, tok ari vairuoki muokslinīki nu Ukrainys. Ari koncerta apmaklātuoji teik aicynuoti pajimt leidza sveceiti.

Daugovpiļs aicynoj atbaļsteit Ukrainu, pīduovojūt apmeklēt vairuokys muokslys izstuodis. 24. februarī 16.00 stuņdēs Vīneibys noma ūtruo stuova foaje tiks atkluota ukrainu muokslinīka Ivana Vitjuka izstuode, kas byus apsaverama da 31. marta. Daugovpiļs pošvaļdeibys ākys pyrmajā stuovā da 13. marta ir apsaverama ukraiņu muokslinīku dorbu izstuode nu Marka Rotko muokslys centra kolekcejis. Taipoš ari da 26. februara vokora tymsajuos stuņdēs Daugovpiļs Vīneibys noms tiks izgaismuots Ukrainys karūga kruosuos.

Ari Reigā 24. februarī vysu dīnu nūtiks vierīneigi pasuokumi Ukrainys atbolstam. Nu reita desmitu pi Breiveibys pīminekla nūtiks dzeivuotuoju mīteņš “Bez tevis nav uzvaras”, tok vokora deveņūs Reigys cyrkā byus labdareibys koncerts “Veltījums Ukrainai”. Dīnys garumā taipoš byus daīmamys aktivitatis Muokslys muzejā, Kongresu nomā i daudzvīt cytur. Vaira informacejis par aktivitatem meklej: podiyi.lv.

Ukrainys tema Lakugā

Ari portals lakuga.lv aktivi viestej par Ukrainys kara atspaidim Latgolys kontekstā. Latgolā ir cīši daudz sirsneigu i drūsmeigu cylvāku, kas aktivi paleidz nalaimē tykušajim, īsastuoj par Ukrainu i nūsūda Krīvejis kara nūzīgumus. Izzynoj cylvākstuostus, paskaiti par dzeivi pīrūbežā taidā geopolitiskā situacejā i izzynoj vaira par Ukrainys temom:

Print Friendly, PDF & Email

Kalenders

Apr
12
Pīk
15:00 Andra Kalinina izstuodis “Klusā ... @ Latgolys Kulturviesturis muzejs
Andra Kalinina izstuodis “Klusā ... @ Latgolys Kulturviesturis muzejs
Apr 12 @ 15:00 – 16:00
Vuordam “doba” skaidrojūšajā vuordineicā ir div nūzeimis – vysupyrma, tys apzeimej vysa apleik eksistejūšuo uorejū veidūlu ainaviskā izpratnē, pa ūtram, par “dobu” teik sauktys ari kaidys paruodeibys golvonuos eipašeibys, kas varātu izsaceit tūs byuteibu. Reflektejūt[...]