Izpaleidzeiba, breivpruoteiba i loba sirds – Ukrainys kara gods Latgolā

Izpaleidzeiba, breivpruoteiba i loba sirds – Ukrainys kara gods Latgolā

Roksta autore: Marta Puzāka, portals lakuga.lv

24. februars –  dīna, kod pyrma goda pasamūdem ar viesti par Krīvejis ībrukumu Ukrainā. Nivīns tod navarēja īsadūmuot, ka kars turpynuosīs tik ilgi. Tei ir bejuse jauna pīredze vysim – dzeivuot apziņā, ka pavysam natuoļi cīš cylvāki, teik bombardātys sātys, bet mums pošim sūpluok vaļsts, kas ir par karu, par nažieleibu i naciļvieceibu. Tys bejs gods, kas lics daudz puordūmuot, daudz dareit, nūviertēt breiveibu i mīru, i gods, kod kai nikod īprīšk spiejom apsavīnuot i nu vysys sirds atbaļsteit cytu vaļsti i tuos dzeivuotuojus.

Ituo gods laikā cīši apsavīnuoja i solidariziejuos vysa Eiropys Savīneiba, NATO i Rītumu pasauļs, kab izruodeitu atbolstu Ukrainai. Latveja ir vīna nu tūs vaļstu, kas cauru godu davuse gondreiž vysleluokū vysaiduoka veida atbolstu Ukrainai. Tys ir 1% nu vaļsts IKP, ījemūt ūtrū vītu Eiropys Savīneibā i pīsakuopūt tik Igaunejai. Humanuos, ekonomiskuos i militaruo paleidzeibys snīgšonā īsasaisteja kai vaļdeiba, tai navaļstiskais sektors i sabīdreiba kūpumā. Ari vaļdeiba pastreipoj, ka paleidzeibys snēgšona nu Latvejis vys vēļ turpynojās i turpynuosīs tik ilgi, cik tys byus napīcīšams.

Taipoš ari Latgola cīši aktivi izruodejuse atbolstu Ukrainai. Vuokti zīduojumi, reikuoti atbolsta pasuokumi i guojīni, labdareibys akcejis. Latgolā tyka uzjimts ari cīši daudzi biegļu, kuru izmytynuošonā īsasaisteja pošvaļdeibys, uzjiemieji i vītejī dzeivuotuoji, taipoš ari tyka pīduovuotys jaunys dorba vītys.

Zīduotuoju atsauceiba Latgolā bejuse cīši lela, kū apstyprynoj ari Daina Dreimane-Kezbere – breivpruoteiguo zīduojumu vuokšonys koordinatore nu Nagļu, kurai kara suokumā sastdīnēs i svātdīnēs bejs pylns pogolms ar mašinem, kab nūdūtu zīduojumus. Tys aplīcynoj, ka Latgolys cylvāki paleidzēs gryutā laikā i nabyus vīnaldzeigi, ka kaids tics nalaimē. Taipoš zīduot i vuokt zīduojumus ir tys, kū cylvāki dora aiz lobys sirds, na jau atolguojuma.

Karteņā: savuoktī zīduojumi ukrainim, Dainys Dreimanis-Kezberis arhivs

“Ir ari daudz lītu, kū tu vari izdareit vīnkuorši aiz lobys sirds. Kod tu gribi paleidzēt tim, kam ir gryuši, lai jim ir vīgļuok. Lai jim ir kū ēst, lai ir kū apgierbt. Na vysim pasaulī īt labi, vīgli i forši, ” tai intervejā sacejuse Daina.

Ari niu ir īspieja pazīduot voi vysaidā cytaidā veidā atbaļsteit Ukrainu. Vaira izzynoj ITE.

Taipoš ari vītejī uzjāmumi i cylvāki īsasaisteja Ukrainys atbolstā car vysaidim projektim ci vīnkuorši vuocūt naudeņu, organizejūt zīduojumu pījimšonys vītys i tū nūguoduošonu tuoļuok Ukrainā. Kluotyn taidom aktivitatem Latgolys nūvodūs nūtyka sveču līšonys darbneicys, armejis teiklu peišona i cytys darbneicys, kab sovu pošu rūkom taiseitu tū, kas vajadzeigs Ukrainai ceļā iz uzvaru. Taipoš ari Rēzeknis nūvoda školuos nūtika akceja “Mēs PAR mieru”, dažaidu nūvodu sadarbeibys ar sadraudzeibys piļsātom Ukrainā. Nav īspiejams uzskaiteit vysys aktivitatis, kas nūtykušys goda laikā. Tys ir bejs miļzeigs atbolsts nu Latgolys dzeivuotuoju na viņ materialā ziņā, tok ari ar cylvākresursim.

Karteņā: sveču līšonys darbneica Rēzeknē, Gunta Rasima arhivs

Pi cylvākresursu var daskaiteit izpaleidzeibu dorbūs. Iz Latvejis kūpejuo fona Latgola izacēle ar rūbežkontrolis punktim, kur, suocūt nu oktobra suokuma, leidz itai dīnai breivpruoteigī ļauds kotru dīnnakti uzjem vysmoz 100 Ukrainys kara bieglu. Bīdreibu “Tavi draugi” i “Gribu palīdzēt bēgļiem” organizātajā bieglu uzjimšonys projektā pīsasaceja vairuoki vītejī dzeivuotuoji, kas gotovi veļteit vairuokys dīnnakts mienesī, kab paleidzātu bieglim škārsuot rūbežu i duovuot sirds syltumu, kuo jim cīši tryukst. Vacuoka goda guojuma cylvāki, saimis, muotis ar bārnim, veirīši – vysi teik sagaideit, par vysim teik pasaryupeits. Tei ir tei energeja, kas jau gondreiž pusgodu teik nūdūta nu latvīšu ukrainim.

“Sirsneigais moments, kas ite dominej – tys ir tys, par kū cylvāki soka “paļdis”. Cylvāki reši kod soka paļdis par čaju, vaira soka par tū, ka ir tik lobi cylvāki. Lela daļa ukraiņu atzeist, ka tei ir pyrmuo paleidzeiba, kū jī vyspuor sajam. Jī ir sajāmuši drūsmi izaraut nu tuos zonys. Cīši aizkustynūši. Pīmiņu momentu, kod vaicuoju: “Kū jius dabuojot myusu punktā?” Tai nanūpītnai, smejūtīs. I jī maņ atbiļd: “Jius mums īdevet ceļu iz nuokūtni.” I maņ suoka īt raudīņs…”  tai par rūbežkontrolis nūzeimeigumu stuostieja breivpruoteiguo Laura Čaupale.

Karteņā: bieglu paleidzeibys punkts Grebņovā, foto lakuga.lv

Ari Monta Vecozola, kas ir bīdreibys “Tavi draugi” koordinatore, beja izasacejuse par tū, cik Latgolā ir fantastiski i izpaleidzeigi cylvāki. “Es, ka gūdeigi, vys vēļ asu cīši aizkustynuota par Latgolys īsaisti, atbolstu i fantastiskajim cylvākim! Nabeja saguojs tik cīši sasadorbuot. Varbyut mums vajag bīdreibys filiali Latgolā! Cīši spieceigi i sirdsylti cylvāki!” (Montys cytats nu Ingys Zagorskys Facebook īroksta)

Taipoš itūgod naiztryuka bez atbolsta pasuokumu i koncertu. Vīns nu leluokūs beja Latvejis sabīdryskūs medeju labdareibys maratona “Dod pieci!” koncerts Latgolys viestnīceibā “Gors” pyrma goda nūslāguma. Koncerta reikuošonai Latgolys sirdī – Rēzeknis “Gorā” nabeja najaušeiba.

“Tod, kod plānuojom ituo gods “Dod pieci” akceju, saprotom, ka mes pyrmū reizi gribim izīt uorpus Reigys. Tod ar Tomu Grēviņu runuojam – kur, iz kuru pusi? Es saceju, ka, ja mes gribim sataiseit koncertu, tod zynu breineigu vītu, kur koncerts byus cīši kvalitativs, skaists i lobs. I tys byus “Gorā”, kur es ari zynuoju, ka byus pretimnuokūši cylvāki i vadeiba, kas saceis: “Nui, braucit gostūs!”” stuosteja Latvejis Radejis 5 direktors, muziks i raidejumu vadeituojs Kārlis Kazāks intervejā ar LRT žurnālisti Ausmu Sprukti-Kozuli.

Taipoš jau nu kara suokuma Rēzeknis dzeivuotuoji aktivi izruodeja atbolstu, sasateikūt pi Latgolys Muorys pīminekla mīteņā, organizejūt cytus labdareibys pasuokumus kai, pīmāram, koncertprograma Ukrainys atbolstam “Ausmeņa Kebabs” terasē, kur uzastuoja Latgolā atpazeistami muziki. Pasuokumā ar uzjāmumu “Ausmeņa Kebabs” i “KUUP” atbolstu tyka sazīduoti vaira nakai 800 eiro i vairuokys kastis ar apgierbu i puortyku.

Vēļ vīna līta, kas itymā godā bejuse pozitiva – tys ir nasalaužamais Ukrainys tautys gors. Ukrainys karaveiri vysam pasauļam ir daruodejuši, ka Krīvejis “ūtrei pasauļa leluokuo armeja” ir sakaunama. I, ka tauta, kas ir vīnuota, spēs puorvarēt sevkurys gryuteibys. Taipoš ari Latgolai i Latvejai kūpumā ir juosagloboj vīnuots gors i izpaleidzeiguo sirds, kab dreižuok iz zemis byutu mīrs i uzvarātu taisneiba.

Print Friendly, PDF & Email

Kalenders

Feb
24
Sai
14:00 Koncertizvadums “Atgriežamies La... @ Latvejis Nacionalais teatris
Koncertizvadums “Atgriežamies La... @ Latvejis Nacionalais teatris
Feb 24 @ 14:00 – 16:00
Latgolys cylvāku spāks i humora dzierksts, kai ari vaira nakai 100 nūspālātys “Latgola.lv” izruodis īdrūsynuojušys autorus taiseit koncertizvadumu “Atgriežamies Latgolā”. Itamā kompanejā ir apsavīnuojuši režisors Valdis Lūriņš, komponists Valdis Zilveris, dzīšmu tekstu autors Jānis Peters,[...]
18:00 Koncertizvadums “Atgriežamies La... @ Latvejis Nacionalais teatris
Koncertizvadums “Atgriežamies La... @ Latvejis Nacionalais teatris
Feb 24 @ 18:00 – 20:00
Latgolys cylvāku spāks i humora dzierksts, kai ari vaira nakai 100 nūspālātys “Latgola.lv” izruodis īdrūsynuojušys autorus taiseit koncertizvadumu “Atgriežamies Latgolā”. Itamā kompanejā ir apsavīnuojuši režisors Valdis Lūriņš, komponists Valdis Zilveris, dzīšmu tekstu autors Jānis Peters,[...]
19:00 Grupys “Galaktika” albuma prezen... @ Līpuojis koncertzāle "Lielais dzintars"
Grupys “Galaktika” albuma prezen... @ Līpuojis koncertzāle "Lielais dzintars"
Feb 24 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]