Rokstu sagataveja: portals lakuga.lv

Itei nedeļa latgalīšu kulturā aizīt Latgalīšu kulturys goda bolvys “Boņuks” zeimē – bolvys svineiguo ceremoneja vysod ir vareiba sasatikt, atguoduot i pasaprīcuot par tū, kas bejs, kai ari īsavērt tymā, kas latgalīšu kulturā byus itūgod. Ar sovim īsacejumim nedeļai itūreiz aicynuojom pasadaleit “Boņuks” reikuotuoju – Latgolys viestnīceibys GORS – pasuokumu producenti, kurei ir ari bolvys projekta vadeituoja, Dairu Lāci.

“Boņuks” i jubilejis sasatikšona

Pyrmais muns īsacejums tai i byus vysu godu cīši gaideis pasuokums – Latgalīšu kulturys goda bolva “Boņuks”. Itūgod bolvys sajiemieji tiks nūskaidruoti jau pīcpadsmitū reizi i kai jau jubilejis reizē prīca byus sasatikt ar latgaliskuos kulturys ļaudim, pīdzeivuot breineigu muokslinīku uzastuošonys, gūdynuot pārnejuo gods lobuokūs dareituojus. Tū vysu ari itūgod varēs pīdzeivuot naviņ kluotīnē, nu ari sevkurā vītā pasaulī ar Latvejis Televizejis paleidzeibu verūtīs TV ekranā voi škārsteiklā ltv.lv, LSM.lv i replay.lv. Ceremonejā itūgod uzastuos grupa “Bez PVN” i Valters Pūce, grupa “Tautumeitas” i Renārs Kaupers, projekts “Latgalian Evergreens” i Biruta Uozuoliņa, grupa “Rupuči” i cyti, bet tuos vadeišona šūreiz byus aktera Jāņa Kruoņa rūkuos. Vaira par bolvu: bonuks.lv.

Kruosys i “Kuozys”

Jau pīktdiņ, 3. martā, Daugovpiļs Marka Rotko muokslys centrā tiks atkluota jaunuo pavasara izstuožu sezona ar pīcom jaunom dorbu kolekcejom. Kai izbejušu kuozu vadeituoju mani vīnaldzeigu napamat vīns nu dorbu, kurs byus tī apsaverams – Daugovpilī (tuo laika Dinaburgā) dzymušuo gleznuotuoja Žaka Šapiro (eistajā vuordā Jakova Šapiro) muokslysdorbs “Kāzas”. Ar naparostom formom i spylgtom kruosom breineigi teik uzbūrta i nūdūta sajiuta, kū pīdzeivuot kuozuos. Ari Latgolā. Kod cikom zīma speiteigi nikur nasasteidz, bet gribīs pavasara sauli, putynu dzīsmis i kruosys, juobrauc tuos maklātu iz Rotko centru! Vaira par jaunū izstuožu sezonu ITE.

Nikur bez gruomotu

Asu kaisleiga gruomotu skaiteituoja, deļtuo muna sirds nūteikti prīcuotūs par vareibu nūbraukt, aizliduot, nūtīt iz “Latvejis Gruomotu izstuodi 2023” Kīpsolā, Reigā. Izstuodē var sasatikt ar rakstnīkim, pīsadaleit lasejumūs, kur poši autori skaita sovus dorbus, sabyut gruomotu atkluošonys pasuokumūs, dabuot autografus, kai ari tik daudzi vareibu – pierkūt voi apsamainūt – tikt pi jaunu gruomotu sovai sātys bibliotekai. Vaira par izstuodi ITE.