Kulturys īsacejumi nedeļai: lobuokuo izdeveiba sajust Latgolu i 1000+ km izaicynuojums

Kulturys īsacejumi nedeļai: lobuokuo izdeveiba sajust Latgolu i 1000+ km izaicynuojums

Rokstu sagataveja: portals lakuga.lv

Itūnedeļ, 27. aprelī, jau pīktū reizi tiks svieteita Latgolys kongresa dīna, kurā dažaidys organizacejis i aktivisti ir pasaryupejuši par latgaliskom nūtikšonom. Vīna nu tūs byus ari Latvejis Republikys Saeimys svineiguo sēde. Sovys latgaliskuos idejis, kū var dareit na viņ Latgolys kongresa dīnā, bet i cytā laikā itai nedeļai pīduovoj 14. Saeimys nu Latgolys vieliešonu apgobola īvālātuo deputate Leila Rasima.

Izbaudi eistynu Latgolu Pūdnīku dīnuos!

Muols – Latgolys zalts! I Pūdnīku dīnys, kuru kulminaceja ir taišni itamā nedeļā, ir vīna nu lobuokūs izdeveibu sajust eistynu Latgolu. Cepļu kūršona i izjimšona, kū pavoda sarunys latgalīšu volūdā, ka pasaveic (voi ari napasaveic, ka esi kautreiguoks), tod ari kūpeiga dzīduošona i doncuošona, kai ari šmakovkys paraudzeišona (tik atguodynuojums, ka vyss ar māru)! Tys vyss ir vīns cīši pīpiļdeits elpys viļcīns, kū kotram īsoku pīdzeivuot. Eipaši īsoku sastdīni, kod Rēzeknis nūvoda “Cukrasātā” pi pūdnīku Stanislava Viļuma i Violys Annys Bīrinis byus Pūdnīku dīnu centralais nūtykums ar cepļa izjimšonu. Piec tam gribīs saceit: “Laižom iz romantiskū Lūznovys muižu, kas ir vīna nu munu meiluokūs vītu pasaulī!” Muižys “Kulturys škiunī” varēs na viņ apsavērt pūdnīku radeitū, bet ari izstaiguot pavasareigū muižys parku i palikt iz klavīru i elektroniskuos muzykys koncertu, kas tradicionali itymā laikā skaņ komponista i muokslinīka Čurļuoņa zeimē. Vaira dazynuošonai par Latgolys pūdnīku dīnom ITE.

Karteņā: Keramika Viola Anna Bīriņa, īkuortojūt izstuodi Lūznovys muižā, foto Dagnija Bernāne

Īsuoc 1000+ kilometru puorguojīni pa Latgolu!

Pateik īt dobā i vērtīs iz šmukajim Latgolys azarim? Tod izaicynoju spert pyrmū sūli kūpumā 1107 km garajā maršrutā “Ezertaka” aba latgaliski “Azara styga”! Da cyta goda pa gabaleņam, pa kilometram varim pīveikt vysu maršrutu. Tim, kuri gryb vaira kustētīs, pi tuo izbaudūt byušonu dobā i svaigā gaisā, ir eistais laiks suokt! Bonusa punkti tim, kuri ari pyrmūreiz itamā sezonā īleiss kaidā azarā. Maršrutu karte i vaira informacejis ITE.

Karteņā: Leila Rasima puorguojīnī gar Rāznys azaru, foto Baiba Rasima

Īlic sev “aiz auss” komiksu “Sunāns breiveibā”

Napaseņ ir izguojuse vīna cīši šmuka i meila gruomota “Sunāns breiveibā”, kas ir ari pyrmais komikss latgaliski. Koč i gruomota ir cik loba, ka pošlaik jau izpierkta, īsoku īlikt sev “aiz auss” ci sovā “wishlistā”, kab atguoduotu nūpierkt, kod tei byus otkon daīmama (i izdevieji sūlej, ka maja suokumā jau byus). Komikss ir ideala duovona kotram bārnam (a, mož i pīaugušajam!), Laura Melne i Vivianna Maria Stanislavska ir radejušys koč kū eistyn sirsneigu, interesantu i cīši baudomu. Radeisim interesi bārnim par latgalīšu volūdu jau nu bārna kuojis! I kas zyna, varbyut daudzim itei byus par vīnu nu meiluokūs bierneibys gruomotu! Vaira par komiksu ITE.

Karteņā: komikss “Sunāns breiveibā”, foto Leila Rasima
Print Friendly, PDF & Email

Kalenders

Apr
13
Sai
all-day Osvalda Zvejsalnieka pīminis izs... @ Latgolys Kulturviesturis muzejs
Osvalda Zvejsalnieka pīminis izs... @ Latgolys Kulturviesturis muzejs
Apr 13 all-day
Izstuodē tiks eksponātys muokslinīka gleznys nu Latgolys Kulturviesturis muzeja Muokslys kolekcejis, kas puorsvorā atspīgeļoj juo agreimū rodūšū darbeibu 20. g. s. 70. godūs, kai ari 80. godu rodūšajā pylnbrīdā radeituos lelformata figuraluos kompozicejis i portretus.
15:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 13 @ 15:00 – 17:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]