Moskovys i Lomonosova īlys Reigā rūsynuos puorsaukt par Latgolys i Valerijis Seilis īlom

Moskovys i Lomonosova īlys Reigā rūsynuos puorsaukt par Latgolys i Valerijis Seilis īlom

Rokstu sagataveja: portals lakuga.lv

Ūtardiņ, 23. majā, nūtyka Latvejis Republikys Saeimys Cylvāktīseibu i sabīdryskūs lītu komisejis Latgolys apakškomisejis sēde, kurā tyka sprīsts par Publiskuos atminis centra rūsynuojumu vairuokys Moskovys īlys Latvejā puorsaukt par Latgolys īlom, bet Lomonosova īlu Reigā par Valerejis Seilis īlu.

Sasatikšonys mierkis beja aicynuojums Latgolys apakškomisejis deputatim īt tolkā, kab vierzeitu iz prīšku vaicuojumus par vītvuordu puorsaukšonu, likvidejūt komunistiskuo totalitaruo režima sekys. Itamā reizē aicynuojums beja Moskovys īlys Reigā, Salaspiļs i Rūpažu nūvodūs puorsaukt par Latgolys īlom, Lomonosova īlu Reigā puorsaukt par Valerijis Seilis īlu, bet niulinejū Latgolys īlu – par Latgaļu īlu, kas byutu pagūdynuojums senejai baltu ciļtei, sūpluok Reigā jau asūšajom Kuršu i Zemgaļu īlom.

Apakškomisejis sēdē sūpluok nu Latgolys Saeimā īvālātajim deputatim, pīsadaleja Publiskuos atminis centra, Reigys dūmis, Latgolys kongresa lāmumu izpiļdis padūmis, Vaļsts volūdys centra i cytu organizaceju, kai ari medeju puorstuovi.

Saguojušajim beja vareiba nūsaklauseit Publiskuos atminis centra vaļdis prīšksādātuoja Kārļa Kangera aicynuojumu īlu nūsaukumu maiņai, atzeimojūt, ka Rēzeknis i Daugovpiļs vaļstspiļsātys sevkuru vītvuordu puormeišonu ir nūraidejušys, tok cytuos pošvaļdeibuos, kurūs vydā ir ari Leivuona, Kruoslovys i Rēzeknis nūvodi, vītvuordu puorsaukšonys dorbu ir gondreiž golā. Itūšaļt diveju godu laikā asūt īsadevs dabuot 22 īlu nūsaukumu puormeišonu, tok tī asūt viņ 15 % nu vysu 145 vītvuordu, kas īsnēgti puormeišonys vajadzeibys sarokstā Vaļsts prezidentam. Publiskuos atminis centrys aicynuoja Latgolys apakškomiseju vierzeit nūsaukumu maiņu īprīšk nūsauktajom Moskovys īlom Reigā, Salaspiļs i Rūpažu nūvodūs, kai ari Lomonosova īlai i Latgolys īlai.

Sēdis turpynuojumā beja Saeimys deputatis Annys Rancānis prezentaceja par Valerijis Seilis dzeivi i dorbu nūzeimi Latgolys i Latvejis viesturē. Sovpus Publiskuos atminis centra puorstuove, tīseibu zynuotneica Kristīne Jarinovska izsvēre vītvuordu nūzeimi sabīdreibys zynuošonu i apzinis veiduošonā, kai ari papyldynuoja Rancānis stuostu par Valerijis Seilis personeibu i juos gūdynuošonys svareigumu. Taipat Jarinovska atzeimēja, ka itūšaļt publiski vītvuordus gūdynuoti ir viņ daži nu Latgolys sabīdryskūs darbinīku, kurim bejuse lela nūzeime Latgolys breiveibys i pošapzinis veiduošonuos procesūs.

Uzklausūt redzīņus i pamatuojumus, Latgolys apakškomisejis vadeituojs, Saeimys deputats Edmunds Teirumnīks saceja, ka tys, kū Saeimā īvālātī Latgolys deputati niu var dareit, ir sagataveit viestuli i aicynuot Reigys vaļstspiļsātys dūmi padareit īlu nūsaukumu maiņu. Tok nu kluotyn iz vītys i tīšsaistē asūšūs Reigys dūmis puorstuovu – Edvarda Ratnieka i Lindys Uozuolys (Ozola) – varēja saprast, ka dūme par itū rūsynuojumu varātu lemt, nu jī nabeja puorlīcynuoti, voi dūmis koalicejā tam saīs vajadzeigais vairuokuma atbolsts.

Taipat kluotyn asūšī Saeimys deputati vīnuojās, ka raudzeis rūsynuot likumprojekta, kas ļautu vaļstei nūsaceit izjāmuma apstuokļus vītvuordu puorsaukšonai, nasaverūt iz pošu pošvaļdeibu īsaisti, vierzeišonu.

Atguodynuosim, ka pārņ piec bīdreibys “Latgolys Saeima” rūsynuojuma Reigys dūme Moskovys duorzu Latgolys prīškpiļsātā puorsauce par Latgolys parku. Vaira par tū ITE. Reizē ar Moskovys duorza puorsaukšonu bīdreiba aicynuoja tū dareit ari ar Moskovys īlu, tok atbolstu itai idejai nasajēme. Taipat apakškomisejis sēdē Latgolys kongresa lāmumu izpiļdis padūmis prīšksādātuojs Agris Bitāns saceja, ka beja raudzejs itaidu iniciativu rūsynuot bolsuojumam leidzdaleibys platformā manabalss.lv, tok tī ari sajimts iniciativys idejis nūraidejums.

Print Friendly, PDF & Email