Vosorys kursūs “Vosoruošona” školuotuoji varēs styprynuot latgalīšu volūdys i kulturys zynuošonys

Vosorys kursūs “Vosoruošona” školuotuoji varēs styprynuot latgalīšu volūdys i kulturys zynuošonys

Rokstu sagataveja: portals lakuga.lv

Nu 30. juļa da 3. augusta Rēzeknis nūvoda Rogovkā byus latgalīšu volūdys i kulturys vosorys kursi “Vosoruošona 2023”. Kursūs aicynuoti dasasaceit školuotuoji nu vysys Latvejis, kuri školuos jau vuica voi tyvuokajā laikā plānoj vuiceit latgalīšu rokstu volūdu, taipat var dasasaceit pedagogejis studenti i cyti latgalīšu volūdys i kulturys interesenti. Kursu pamata mierkis itūgod ir paleidzēt latgalīšu volūdys školuotuojim lobuok sasagataveit jaunajam vuiceibu godam, informej kursu reikuotuoju puorstuovi.

Latgalīšu volūdys i kulturys vosorys kursūs “Vosoruošona 2023”, kas suoksīs svātdiņ, 30. juļa, piecpušdīnē i byus da catūrtdīnis, 3. augusta, pušdīnis laika, byus vareiba nūstyprynuot zynuošonys latgalīšu rokstu volūdā, izzynuot vaira par metodem, resursim i leidzeklim, kas byutu nūdareigi vuiceibu prīškmata “Latgalīšu rokstu volūda” vuiceišonā školā, padzilinuot zynuošonys par latgalīšu literaturu, Latgolys kulturviesturi i myusu dīnu latgaliskuos kulturys procesim. Taipat kursu daleibnīkim byus vareiba pīsadaleit rodūšajuos nūdarbeibuos, pasadaleit ar sovu i izzynuot cytu školuotuoju pīredzi, sasatikt ar latgaliskuos kulturvidis personeibom, kursu vokoru pasuokumūs, kas byus veļteiti dažaidom latgaliskuos kulturys sferom, dabuot īdviesmi i prīškstotu par latgalīšu kulturys aktualitatem. Kursu nūslāgumā “Vosoruošonys” daleibnīki aicynuoti pīsadaleit ari publiskā diskusejā par latgalīšu volūdys vuiceišonu školuos.

Piec gondreiž 90 godu puortraukuma pilotprojekta veidā 2021. gods rudinī latgalīšu rokstu volūda godus ir atsagrīzuse Latgolys školu programuos vysmoz kai breivuos izvēlis nūdarbeibys. 2022./23. vuiceibu godā latgalīšu volūdu bārni varēja vuiceitīs 26 školuos vysā Latgolā, bet jaunajam vuiceibu godam taidu gataveibu – nūdrūsynuot latgalīšu rokstu volūdys vuiceišonu – izsacejušys vēļ vysmoz 20 školys.

Latgalīšu volūdys, literaturys i kulturviesturis školuotuoju asociacejis vadeituoja Veronika Dundure, kurei ir ari vīna nu vosorys kursu “Vosoruošona” i latgalīšu rokstu volūdys školuos programu autoru, izsver, ka itūšaļt teik struoduots pi tuo, kab latgalīšu volūdys vuiceišonai jaunajā vuiceibu godā byutu vajadzeigais finansiejums i vysuos školuos, kurys grybātu, bārnim byutu vareiba vuiceitīs latgalīšu volūdu, kai ari nūteik sistemetiskys i pastuoveigs dorbs pi školuotuoju apvuiceibu. “Mes apsazynojam, ka latgalīšu rokstu volūdys vuiceišona školuos ir jauna programa i ka jau ītūšaļt datryukst specialistu školuotuoju vydā, kas var vuiceit volūdu, deļtuo vosorys kursi ir vysu lobuokuo bāze kai tim, kuri jau vuica, i tim, kuri vēļ tik par itū dūmoj, sasatikt, pasadaleit pīredzē, izmontuot volūdys specialistu i latgalīšu kulturys ekspertu kluotbyutni, kab vuiceitūs, izzynuotu i byutu gotovi dabuotuos zynuošonys jau jaunajā vuiceibu godā nūdūt tuoļuok sovim školānim. Tok “Vosoruošona” reizē ir ari īdviesmis vīta pošim školuotuojim, jo ite sasateik lobi ļauds ar gaišom dūmom, lobom idejom i gribiešonu vaira izzynuot Latgolu,” aicynojūt iz “Vosoruošonu 2023”, soka Dundure.

Latgalīšu volūdys i kulturys vosorys kursu “Vosoruošona” pamata mierkis itūgod ir paleidzēt latgalīšu volūdys školuotuojim lobuok sasagataveit jaunajam vuiceibu godam. “Vosoruošonā” aicynuoti dasasaceit školuotuoji nu vysys Latvejis, kuri školuos jau vuica voi tyvuokajā laikā plānoj vuiceit latgalīšu rokstu volūdu, taipat var dasasaceit pedagogejis studenti i cyti latgalīšu volūdys i kulturys interesenti, kuri dūmoj par latgalīšu volūdys vuiceišonys īspiejom iz prīšku.

Vosorys kursim “Vosoruošona” var dasasaceit da 5. juļa, aizpyldūt tīšsaistis anketu ite: ej.uz/vosoruosona2023. Vītu skaits kursūs īrūbežuots. Vaira dasacejumu gadīnī prīškrūka byus latgalīšu rokstu volūdys školuotuojim, kuri jau vuica volūdu školā voi plānoj tū dareit tyvuokajā laikā. Ar precizu kursu programu byus vareiba īpasazeit juļa vydā. Piec kursu nūslāguma tūs daleibnīki sajims bet piec kursu beiguos dalinīki sajims 36 stuņžu aplīceibu. Kursu leidzmoksuojums nu daleibnīka itūgod ir 30,00 eiro. Leidzmoksuojums paradzāts dalejis ādynuošonys i palikšonys izmoksu segšonai. Kursu četru pylnu dīnnakšu saturu ar lektorim i nūtikšonom, naktssātu i ūtru daļu ādynuošonys (vysmoz treis reizis dīnā) sadz kursu reikuotuoji i atbaļsteituoji.

Vosorys kursi “Vosoruošona” pyrmū reizi nūtyka 2000. godā, itūgod tei byus jau 14. “Vosoruošonys” sasatikšona. Latgalīšu volūdys i kulturys kursus “Vosoruošona 2023” reikoj Latgalīšu volūdys, literaturys i kulturviesturis školuotuoju asociaceja (LVLKŠA), latgalīšu kulturys kusteiba “Volūda” (bīdreiba “LgSC”) i Nautrānu vydsškola. Nūtikšonu finansiali atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu, Latvīšu volūdys agentura, Rēzeknis nūvoda pošvaļdeiba i Nautrānu apvīneibys puorvaļde.

Īsavieršona īprīškejuos reizis kursūs 2021. gods vosorā ITE.

Print Friendly, PDF & Email

Kalenders

Apr
15
Pyr
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 15 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
Apr
16
Ūtr
12:00 Izruode “Spreideits” @ Daugovpiļs teatris
Izruode “Spreideits” @ Daugovpiļs teatris
Apr 16 @ 12:00 – 13:00
Pyrmū reizi nu teatra skotuvis puosoku luga „Sprīdītis” izskanēs latgaliski! Izruode ir paradzāta kai tim, kurim latgalīšu volūda ir dzymtuo, tai tim, kurim gribīs tū lobuok īpazeit, jo Spreideiša laimis mekliejumi ir labi zynomi i[...]