Suokusēs uzjimšona Daugovpiļs teatra akteru kursā

Suokusēs uzjimšona Daugovpiļs teatra akteru kursā

Rokstu sagataveja: portals lakuga.lv

Daugovpiļs teatris aicynoj jaunīšus, kurūs vylynoj skotive i aktermuoksla, pīsasaceit vuiceibom Stanislava Broka Daugovpiļs Muzykys vydsškolys izgleiteibys programā “Teātra māksla”, kurā diveju godu laikā tiks sagataveits jauns akteru kurss, informej teatra puorstuove Janīna Ivanova.

2021. godā Stanislava Broka Daugovpiļs Muzykys vydsškolā sadarbeibā ar Daugovpiļs teatri tyka suokta jauna izgleiteibys programa “Teātra māksla” ar mierki sagataveit profesionalus akterus, kuri piec specialitatis dabuošonys varātu pīsavīnuot Daugovpiļs teatra akteru trupai. Itūvosor pyrma diveju godu uzjimtajam akteru kursam jau gaidoms izlaidums, i niu suokta uzjimšona jaunam kursam, kuri aktera profeseju suoks vuiceitīs ituo gods 1. septembrī.

Izgleiteibys programys “Teātra māksla” ilgums ir diveji godi, pīškiramuo specialitate – akters. Kai pedagogi ir pīsaisteiti Daugovpiļs teatra i cytu Latvejis i uorzemu teatru akteri i režisori. Leidz ar aktermeistareibu itamā izgleiteibys programā audziekni vuicuos skotivis kusteibu i deju, vokalu i instrumenta spēli. Vuiceibu procesa laikā jaunīši teik aktivai īsaisteiti na tik Daugovpiļs teatra izruožu īstudiešonys procesa nūvāruošonā, bet ari izruodēs.

Izgleiteibys programā “Teātra māksla” teik uzjimti jaunīši nu 18 godu vacuma. Īsnēgt sovu pīsacejumu i dokumentus var Stanislava Broka Daugovpiļs Muzykys vydsškolā da 28. juņa. Grupys nanūkomplektiešonys gadīnī papylduzjimšona plānuota augustā.

Īstuojpuorbaudejumūs tiks puorbaudeitys reflektantu muokslinīcyskuos i muzykaluos dūteibys. Kotram reflektantam byus juonūrunoj nu golvys treis atškireiga žanra i styla literarus dorbus latvīšu volūdā: prozys fragmentu (stuosts voi monologs nu lugys), fabulu i dzeju. Taipat reflektantam bez pavadejuma byus juonūdzīd sagataveita dzīsme piec sovys izvielis.

Vysi interesenti, kas gryb vuiceitīs aktermuokslu Stanislava Broka Daugovpiļs Muzykys vydsškolā, aicynuoti paziņuot par tū Daugovpiļs teatram, rokstūt iz e-postu pr@daugavpilsteatris.lv, kai ari īpasazeit ar uzjimšonys nūsacejumim školys sātyslopā.

Print Friendly, PDF & Email

Kalenders

Apr
13
Sai
all-day Osvalda Zvejsalnieka pīminis izs... @ Latgolys Kulturviesturis muzejs
Osvalda Zvejsalnieka pīminis izs... @ Latgolys Kulturviesturis muzejs
Apr 13 all-day
Izstuodē tiks eksponātys muokslinīka gleznys nu Latgolys Kulturviesturis muzeja Muokslys kolekcejis, kas puorsvorā atspīgeļoj juo agreimū rodūšū darbeibu 20. g. s. 70. godūs, kai ari 80. godu rodūšajā pylnbrīdā radeituos lelformata figuraluos kompozicejis i portretus.
15:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 13 @ 15:00 – 17:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]