Rokstu sagataveja: portals lakuga.lv

Izdevnīceibā “Latvijas Mediji” izguojuse Lindys Vorpis dokumentaluo gruomota “Viņpus upes. Abrene atmiņu stāstos”. Tamā apkūpuotys 18 bejušūs abrinīšu atminis par kasdīnu, sabīdreibu, attīceibom i izvielem.

Gruomotā var puorskaiteit atmiņu stuostus par teritoreju, kas myusu dīnuos palykuse par pagaisynuotuos zemis simbolu – Abrini: Abrinis (Jaunlatgolys) piļsātu i sešim Abrinis (Jaunlatgolys) apriņka austrumu pogostim – Kacānu, Upmalis, Lynovys, Pūrmolys, Augšpiļs i Gauru. Izdavumu papyldynoj kartenis nu abrinīšu i jūs radinīku personiskuo arhiva, kai ari nu muzeju i arhivu kruotivu.

“Linda Vorpe gruomotā “Viņpus upes. Abrene atmiņu stāstos” drūsmeigai i ar sapratni ļaun skaļuok īsaskanēt vysaidim bejušūs abrinīšu da ituo nasadzierdātajim bolsim, kas atguodynoj turēt cīnā pīradzātū, sovu paguotni, koč i kaida tei byutu, reizē ari reflektejūt par 21. godu symtā pījimtajim politiskajim lāmumim i ļaunūt kotram skaiteituojam palikt pi sova redzīņa,” viertej literate Ligija Purinaša.

Gruomotys autore Linda Vorpe ar Abrinis tematu aizaruovuse, rokstūt bakalaura dorbu Latvejis Universitatē par abrinīšu identitati atmiņu stuostūs. Piec tuo palykuse napadareita dorba sajiuta – tai jei breivajā laikā suokuse apzynuot i intervēt bejušūs abrinīšus. “Tei tema maņ ruodejuos cīši svareiga Latvejai i tim cylvākim, kas tī beja dzeivuojuši. Saprotu, ka gribīs tū pastuosteit tuoļuok,” pārņ intervejā portalam lakuga.lv stuosteja Linda. Vysu sarunu ar jū var puorskaiteit ITE.

“Viņpus upes. Abrene atmiņu stāstos” zynuotnyskais redaktors ir viesturnīks Kaspars Zellis, projekta vadeituoja – Jūlija Dibovska, muokslineica – Aija Andžāne, literaruo redaktore – Juta Valdmane, bet latgalīšu rokstu volūdys vaicuojumūs konsultēja portala lakuga.lv redaktore Laura Melne.