Rokstu sagataveja: portals lakuga.lv

Itū sastdiņ, 1. julī, 19.00 stuņdēs jaunajā Rēzeknis kulturvītā “Rancāna pogolms” (par tū vaira skaiti ITE), nūtiks pasuokums, kas veļteits legendarom underground aba pagreidis kinom, kurys nazkod latgaliski īrunuoja DJ Guntix aba Gunārs Indričāns.

“Rancāna pogolms” atsarūn Nikodema Rancāna īlā 41 Rēzeknē, tū izveiduoja i turpynoj atteisteit div saiminīki nu Rēzeknis nūvoda Leņdžu pogosta – kebabneicys “Ausmeņa kebabs” saiminīks Valters Murāns ar sovu saimi i “KUUP coffee” kopejneicys saiminīks Oskars Maculevičs ar saimi.

Itūreiz “Rancāna pogolmā” byus vareiba sasatikt ar daudzim zynomu personažu, kura īrunuotūs filmys palykušys par gondreiž voi legendarim latgaliskuos vidis pagreidys simbolim – ar DJ Guntix. Vokora gaitā DJ Guntix pastuosteis vaira par sovom īrunuotajom kinom “Lykuma draugi”, “Byureits” i cytym šedevrim. Kūpeigi byus vareiba nūsavērt slovonuokūs kinu kadrus, kai ari īsajust DJ Guntix uodā.

Kai stuosta vīns nu pasuokuma organizatoru kebabneicys “Ausmeņa kebabs” saiminīks Valters Murāns: “Guntix tūlaik ar sovu rodūšū darbeibu muzykā i kinuos beja nazkas jauns, naradzāts, humora i izdūmys pylns, i tei ir naatjemama pagreidis kulturys sastuovdaļa, deļtam mums redzējuos forši tū paraudzeit apspēlēt pasuokumā!” Valters ari dasoka, ka pasuokumā paradzātys vysaiduokys foršys aktivitatis, tok par tom varēs dazynuot, atīmūt iz “Rancāna pogolmu”.

Par vokora muzikalū pauzi ryupēsīs grupa “Gandreiž 10nīkā”.