Rokstu sagataveja: portals lakuga.lv

“Ir suocīs līpu mieness, kod gaisā smuordoj soldais aromats. Na tik bitis aktivi dorbojās mada vuokšonys dorbūs, tok itūgod vysa Latveja ir aktiva, jo taišni itūnedeļ nūrit XXVII Vyspuorejī latvīšu Dzīšmu i XVII Deju svātki. Svātku atmosfera ir jiutama ik iz sūļa,” tai itū nedeļu raksturoj vokaliste Gunta Greisle. Jei na tik aktivi aizaraun ar muzyku, tok pavysam naseņ īsuokuse karjeru kulturys sferā kai jaunuo kulturys pasuokumu organizatore Dekšuoru tautys nomā.

Dzīšmu i Deju svātku pīduovuotuo programa

Nu 1. da 9. juļa Reigā nūteik XXVII Vyspuorejī latvīšu Dzīšmu i XVII Deju svātki. Ka ir īspieja, byutu juoaizbrauc iz golvyspiļsātu, lai tī nūgiutu svātku saviļņuojumu. Ari itūgod daļa Latgolys pīsadola svātkūs. Brauc klauseitīs, vērtīs i atbaļsteit sovejūs kai daņčūs, tai dzīsmēs i teatrī!

Vaira par Latgaliskūs nūtikšonu svātku laikā var skaiteit ite: Brauc tepat sātā īškā i pasveicynoj sovejūs! Latgaliskūs nūtikšonu izlase dzīšmu i deju svātkūs – lakuga.lv

Tok vysa pylnuo programa ite: XXVII Vispārējie latviešu Dziesmu un XVII Deju svētki (dziesmusvetki.lv)

Pikniks pi Dekšuoru pogosta muorka

Cik breineigi ir byut kūpā, prīcuotīs i atsapyust piec dorbu! Napaseņ tika labīkuortuots Dekšuoru muorks, pi kura niu var jauki tikt pi D vitamina davys atpyutys krāslūs, nūsamauduot i sareikuot breineigu pikniku ar saimi voi draugim.

Donoru dīna Viļānūs

7. julī nu 9.00 da 12.00 Viļānu Kulturys nomā byus Donoru dīna. Mēs kūpā varim paleidzēt leidzcylvākim, kurim ir duorga kotra ašņa lase. Tik puordesmit minutu laika var izgluobt dzeiveibu pat vairuokim cylvākim.