Kulturys īsacejumi nedeļai: brauc ar ritini, klausīs metalu i izzynoj patmalis
Rokstu sagataveja: portals lakuga.lv
Ituos nedelis īsacejumus sagatavejs Rihards Olups – OpenStreetMap (OSM) kūpīnys daleibnīks ar saknem Latgolā. Rihards aizaraun ar kartiešonu, i lelu daļu Latgolys (i na tik) breivi papyldynojamajā pasauļa kartē OSM ir sakartējs jis. Aizguojušajā nedeļā Rihards gasteja Rēzeknē i pasuokumā “Kartēt var pat piena galdus. Iemācies OpenStreetMap kartēšanas pamatus” dalejuos zynuošonuos ar vītejū kūpīnu, kab tei piečuok paruodeitu vysaidys interesantys vītys Latgolā. Kab byutu idejis, kū kartēt, Rihards lakuga.lv skaiteituojus aicynoj izbraukt ar ritini pa Latgolu, klausūtīs metalu i apsaverūt patmalis.
Siestīs iz ritiņa!
Velobraukšonys popularitate aug vysā pasaulī i arī Latvejā. Lobs mierkis byutu izbraukt kaidu nu Latgolys velomaršrutu – EiroVelo maršruta EV11 (nu Atenom Grīkejā da Nordkopa Norvegejā) Latgolys daļu, Pīrūbeža velomaršrutu, “Apkārt Latgales jūrai – Rāznas ezeram” ci kaidu cytu. Vysus var atrast ITE.
Ir muzyka, ir dzeiva volūda!
Kaida ir dzeiva volūda? Ka tamā natryukst pagan-folk-viking metala grupu, tei nūteikti ir dzeiva. Ka teik taiseiti klipi, par kurim var saceit: “Gotovs? Nā, itam tu naz voi esi gotovs!”, vēļ jū vaira.
“Varang Nord” itūgod pasaryupēja par kuorteigu metalu ar taidu klipu.
Izzynoj patmalis Latgolā car “Vieju gruomotu”!
Cik patmaļu sasaglobuojs Latvejā, cik Latgolā? Kur tuos ir? Pīduovoju apbraukt vysys Latgolys patmalis, pa ceļam skaitūt par vieja vuordim, vātrom, vieja tortu receptim i daudzi kū cytu munys mamys “Vieju gruomotā”.
Paruodi sovu Latgolu cytim!
“Vaļsts, kurys nav kartē, napastuov” – tai roksta suomu autore Sofi Oksanena [1]. Voi Latgola ir kartē? Kuram pīdar Latgolys karte? Ka ir dzīsmis latgaliski, kai ar kartem? Julī iniciativu “Nezināmā Rēzekne” i “Pīna goldu viestnīceiba” aktivisti reikuoja pasuokumu, kurā dalinīki nu Ludzys, Leivuona, Rēzeknis i cytu piļsātu na tik vuicejuos kartēt, tok ari atgiva kontroli puor karti. Tai kai atsauceiba beja lela, tyka sūleits, ka dreiži byus vēļ itaida veida sasatikšonys. Kod i kur? Sekojit “Nezināmajai Rēzeknei” i “Pīna goldu viestnīceibai” i paruodit cytim, kur ir Loceiša sola, Ješa azars i Kozukolns.
[1] https://upnorth.eu/your-silence-will-not-protect-you/
