Rokstu sagataveja: portals lakuga.lv

21. i 22. oktobrī Dailis teatrī gasteis Daugovpiļs teatris ar gondreiž kriminalu komedeju latgaliski “Divejis vyrtuvē, naskaitūt nabašnīku”, kura radeita aizvadeitajā sezonā Olega Šapošnikova i Māra Korsieša režejis tandemā, informej teatra puorstuove Janīna Ivanova.

Teatra kritiks Tuoms Čevers recenzejā īstudiejumu raksturuojs kai “izdzeivuošonys dramu par liktiņa pabārnim, kas vys tik speiteigai vysod ceļ golvu iz augšu” i atzeimuojs, ka aktrisem pasadavuši suleigi tāli. Sovpus kritike Kitija Balcare portalā lakuga.lv publicātajā recenzejā (tū var skaiteit ITE) roksta, ka “luga sprāgoj Latgolai lokalizātūs izsacejumūs kai taida osmieleiga apsadzīduošona, kura ļaun itū izruodi saukt par komedeju”.

Izruodis pamatā ir ukraiņu dramaturga Aleksandra Mardaņa luga “Muotis i meitys”, kuru latgaliski puorlykuse i Latgolys realejom pīlāguojuse Kristīne Veinšteina. Tys ir tragikomisks stuosts par divejom sīvītem, kurom liktiņs ir īdalejs naveiksmeigys kartys, tok doba apveļtejuse ar apskaužamu speitu puorvarēt vysys gryuteibys, ari, ka tuos īsagrīž drupeit kriminalā leņkī.

Kod iz kartys lykta tova dzeive iz prīšku, redzīs, ka padareisi vysu, i turi nūceju, ka kaidu dīnu nikas nabyus juonūžāloj – ni lobais, ni slyktais. Tok par vysu ir juomoksoj sova cena, kas šaļtim nav pruotam aptverama. Meilūša muote i meita – lūmys, kurys obejom varūnem juonūspielej. Dreizumā atīs ari gaideitais gosts – vīneigais ituo vokora izruodis skateituojs –, kurs cer iz syltu uzjimšonu. Kod nūskanēs durovu zvons, spēle varēs suoktīs, tok naz parkū ir sajiuta, ka nivīns nagrib tamā pīsadaleit.

Lūmuos: Kristīne Veinšteina i Agnese Laicāne.

Izruodi varēs nūsavērt Dailis teatra Mozajā zālē 21. oktobrī 19.00 stuņdēs i 22. oktobrī 15.00 stuņdēs. 

Beleti iz Daugovpiļs teatra izruodem Reigā jau ir puordūšonā “Biļešu paradīzes” kasēs vysā Latvejā i bilesuparadize.lv.