Rokstu sagataveja: portals lakuga.lv

Grupa “Gandreiž 10nīkā” publiciejuse jaunu dzīsmi “Beha iz kreita”, kas ir jau ūtrei nu itūrudiņ gaidomuo grupys ūtruo albuma, portalu lakuga.lv informej grupys puorstuovs Juoņs Kuzminskis.

“Gandreiž 10nīkā” stuosta, ka jaunuo dzīsme ir veļteita vysim BMW fanim i vīnkuorši tusātuojim. Tei īraksteita, miksāta i masterāta “Hodila Records” studejā Valmīrā. Īrokstā pīsadaleja Juoņs Kuzminskis (bolss, gitara), Ingars Gusāns (bass) i Mareks Gusāns (bungys).

Grupys ūtrais albums ir paradzāts kai albumu trilogejis trešuo daļa. Pyrmuo daļa beja “Gandreiž 10nīkā” debejis albums “Nasoki nikuo”, kas izguoja 2017. gods vosorā (vaira par tū var puorskaiteit ITE). Albumā varēja dzierdēt devenis grupys izpiļdeituos dzīsmis, tymā skaitā ari “Putneni”, “Ješka” i “Traktoru pavielnīks”. Vysu dzīšmu muzykys i tekstu autors beja Juoņs Kuzminskis (dzīsmē “Ehti” tyka izmontuoti ari Ontona Slišāna vuordi), aranžiejumu i mix veiduoja Vitālijs Grišunovs. Par trilogejis byušonu sovulaik Kuzminskis stuosteja, ka taids formats izvālāts, partū ka “Gandreiž 10nīkā” beja sasakruojs ap 30–40 dzīšmu, kū salikt vīnā diskā nabyutu pruoteigi. Deļtuo izlamts, ka kotra albuma daļa tiks prezentāta atseviški.

Gatavejūt ūtrū albumu, grupai pasamejs sastuovs – niu sūpluok ar vokalistu i gitaristu Juoni Kuzminski, “Gandreiž 10nīkā” kai bundzinīks muzicej Mareks Gusāns, bet basgitarists ir Ingars Gusāns. Obeji jaunī grupys daleibnīki ir radzāti jau ari cytuos latgalīšu muzykys apvīneibuos, par pīmāru, “Sovvaļnīks”, “Borowa Mc”, “Fak’n’turīs” i cytuos. Julī grupa publicēja pyrmū dzīsmi nu tūpūšuo albuma – “Panki doncoj”.