Rokstu sagataveja: portals lakuga.lv

Eiropys Volūdu dīnā, 26. septembrī, latgalīšu kulturys kusteiba “Volūda” i organizaceja “Loesje Latvija” aicynoj iz rodūšū plakatu tekstu raksteišonu, kas pyrmū reizi storptautyskuos “Loesje” kusteibys viesturē byus latgaliski. Rodūšuos raksteišonys darbnieca, kurā taps iz darbeibu, puordūmom voi pasmaideišonu aicynojūši plakatu teksti, byus Rēzeknē, Rēzeknis Centralajā bibliotekā, i tamā bezmoksys varēs pīsadaleit kotrys grybātuojs.

Rodūšuos raksteišonys darbneicā Rēzeknē, izmontojūt “Loesje” tehniku, tuos dalinīkim byus vareiba īpasazeit ar “Loesje” plakatu veiduošonys kusteibu, tuos vierteibom, pīsadaleit vairuokūs rodūšuos raksteišonys īsasiļdeišonys aizdavumūs, kai ari pošim radeit saukļus, kas piečuok tiks izmontuoti malnboltūs “Loesje” plakatu taiseišonā.

Storptautyskuo organizaceja “Loesje” rodusēs 1983. godā Nederlandē, bet niu tei puorstuovāta vaira nakai 25 pasauļa vaļstīs i vaira nakai 15 godu – nu 2006. gods – ari Latvejā, tok pyrmū reizi iz darbeibu, puordūmom voi pasmaideišonu aicynojūšī plakati tiks sataiseiti ari latgaliski.

Rodūšuos plakatu tekstu raksteišonys darbneica ūtardiņ, 26. septembrī, 15.00 stuņdēs suoksīs ar eisu latgalīšu rokstu volūdys nūdarbeibu, kuru vadeis “Volūdys” kustynuotuoji i kurā varēs izzynuot 10 īsacejumus lobuokai raksteitprasmei latgaliski, bet piec tuo kūpā radeišonys metodē, kas ir vīns nu “Loesje” rodūšuos raksteišonys svareiguokūs elementu, taps malnboltūs plakatu teksti, kas piečuok tiks izdrukavuoti ari eistūs plakatūs. Darbneicys laikā dalinīki sēdēs aplī, dalīkūt kluotyn i padorūt lobuoku vīns ūtra raksteitū, itaidā veidā kūpeigi rodūt jaunus i šaļtim ari pošim dalinīkim puorsteidzūšus tekstus, kaidus vīns pats dalinīks navarātu radeit. Lai pīsadaleitu darbneicā, eipašys raksteišonys prasmis voi literaruo pīredze nav vajadzeiga. Kūpejais darbneicys garums byus ap treis stuņdem. Vaira par plakatim i “Loesje Latvija” var izzynuot ite: loesje.org/latvia.

Plakatu tekstu darbneica ir vīns nu spēlis “Latgalīšu volūdai draudzeiga vīta – ite Rēzekne!” pasuokumu i tuo nūtikšona 26. septembrī taiseita, atzeimojūt Eiropys Volūdu dīnu, kas Eiropā teik svieteita nu 2001. gods, dagrīžūt viereibys Eiropys volūdom, volūdu daudzveideibai i tūs īsavuiceišonai. Darbneicā radeitī latgaliskī plakati 14. oktobrī byus apsaverami latgalīšu volūdys diktata raksteišonys i spēlis nūslāguma pasuokumā Latgolys Muzykys i muokslys vydsškolā, bet piečuok, da oktobra gola, apsaverami Rēzeknis Centraluos bibliotekys telpuos.

Spēle “Latgalīšu volūdai draudzeiga vīta – ite Rēzekne!” ir vīna nu akcejis “Latgalīšu volūdai draudzeiga vīta” aktivitašu. Akcejis, kuru eistynoj latgalīšu kulturys kusteiba “Volūda” i portals lakuga.lv, mierkis ir rūsynuot kasdīnys saziņa vaira izmontuot latgalīšu volūdu, kai ari veicynuot sabīdreibys izpratni par latgalīšu volūdys vierteibu i radeit pozitivu attīksmi pret tū. Akcejis dalinīkus var atpazeit piec eipašu uzleimu ar tekstu “Latgalīšu volūdai draudzeiga vīta”. Vaira dazynuošonai par spēli ite: lakuga.lv/ltgdraudzeigs-rezekne/, bet par akceju ite: lakuga.lv/ltg-vita/.

Spēle i cytys “Latgalīšu volūdai draudzeiga vīta – ite Rēzekne!” aktivitatis teik taiseitys ar Rēzeknis vaļstspiļsātys pošvaļdeibys agenturys “Rēzeknis Kulturys i turisma centrs” Mozūs kulturys i turisma projektu konkursa atbolstu. Akceja “Latgalīšu volūdai draudzeiga vīta” ir vīna nu latgalīšu kulturys kusteibys “Volūda” projekta “Latgaliskuos kulturvidis styprynuošona: sabīdreiba, izpratne i īsaiste” aktivitašu, kurys 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.