Myužeibā nūguojuse žurnaliste i rakstneica Monika Zīle

Myužeibā nūguojuse žurnaliste i rakstneica Monika Zīle

Rokstu sagataveja: portals lakuga.lv

Dīvamžāļ septembra vyds atguojs ar skumu viesti – myužeibā nūguojuse žurnaliste i rakstneica Monika Zīle (20.07.1941.–14.09.2023.), kurei desmit godu garumā sasadorbuoja ari ar Daugovpiļs teatri latgaliskūs izvadumu taiseišonā.

Monikys Zīlis dzymtuo puse beja Rēzeknis nūvoda Čornajas pogosta Petuški. Koč i jau jauneibā dzeivis celi rakstneicu i žurnalisti nūvaduši iz Kūrzemis pusi, vys tik latgalīšu volūda i saikne ar dzymtū pusi natyka pagaisynuota.

Zīle sovulaik bejuse laikroksta “Paduomju Jaunatne” i žurnala “Sieviete” golvonuo redaktore, garus godus nūstruoduojuse “Latvijas Avīzē”. Bejuse ari Latvejis Republikys Saeimys deputate. Taipat nu 1980. goda rakstejuse ari prozu i lugys – beja vairuoku romanu, stuostu kruojumu i lugu, kai ari TV seriala scenereja autore. Par sovim dorbim vairuokys reizis sajāmuse ari AKKA/LAA Autortīseibu bezgaleibys bolvu.

Koč ari jau bejuse peņsejā, Monika Zīle vys tik vēļ turpynuojuse raksteit komentarus “Latvijas Avīzei” i pārņ intervejā portala lakuga.lv redaktorei Laurai Melnei sacejuse: “Navar zynuot, cik ilgi es tū variešu dareit. Iz tū juosaver tai mīreigi, filozofiski. Vosorā maņ byus 82 godi, tys nav moz. Varu byut pateiceiga nazynu kam, drūši viņ sovu seņču saknei, kas maņ paleidz uzturēt dorba ritmu i naļaun gulēt gultā i vērtīs grīstūs. [..] Vysi muni seņči bejuši cīši darbeigi. Taipat jī vysod mekliejuši dzeivis gaišū pusi, lai cik gryuši byutu guojs. Pasaprīcuot koč par tū, ka pavasarī pučeitis izdeigušys – taidys cīši vīnkuoršys lītys.”

Latgolai cīši nūzeimeiga beja Monikys Zīlis desmit godu garuo aktivuo sadarbeiba ar Daugovpiļs teatri, veidojūt izruožu latgaliskūs īstudiejumus, kurūs vydā “Spreideits”, kas pavasarī sajēme Latgalīšu kulturys goda bolvu “Boņuks 2022”, “Pa Laimes lāča pēdām”, kuru tikū vēļ septembra suokumā varēja redzēt LTV1 eterā rubrikā “Teātris.zip”, “Revidents Sylagolā”, “Vosorys saulgrīžu burvesteibys” i “Rūžys byudu golūs”, monodrama, saraksteita speciali aktrisei Maijai Kuorklišai. “Asu teatram par tū cīši pateiceiga. Pyrmkuort, tys uztur manis pošys latgaliskumu, bet prīca redzēt, ari kai teatris tū kūp,” tai Monika saceja intervejā.

Portalā sovulaik varēja puorskaiteit ari Monikys Zīlis dorbu latgaliski “Muna spāka dzīsme”. Tys daīmams ITE.

Leidzjiuteiba rakstneicys i žurnalistis tyvynīkim, i myužeiguo gaisma, lai spūdra pošai Monikai!

Print Friendly, PDF & Email

Kalenders

Jul
12
Pīk
all-day Fotoizstuode “Piecgarša” @ Storptautyskuo lidūsta "Reiga"
Fotoizstuode “Piecgarša” @ Storptautyskuo lidūsta "Reiga"
Jul 12 all-day
Pyrmūdiņ, 17. junī, īzeimejūt Juoņa dīnys nedeļu, Reigys storptautyskajā lidūstā tyka atkluota bīdreibys “Latgolys etnografiskuo viestnīceiba” latvīšu tautystārpim i tymūs apviļktajom mozajom lelem – Annužom – veļteituo fotoizstuode “Piecgarša”. Izstuode Reigā ir starts vasalai streipei[...]
18:00 Daņči @ Veseleibys sola
Daņči @ Veseleibys sola
Jul 12 @ 18:00 – 21:00
Daņči @ Veseleibys sola
18:00 Rēzeknis nūvoda dīnys @ Rēzeknis nūvods
Rēzeknis nūvoda dīnys @ Rēzeknis nūvods
Jul 12 @ 18:00 – Jul 14 @ 23:45
Rēzeknis nūvoda dīnys @ Rēzeknis nūvods