Rokstu sagataveja: portals lakuga.lv

Ar mierki snēgt plašuoku īskotu vysaidūs kulturys i viesturis aspektūs, suocūt ar 7. oktobri Latgolys dzeivuotuoji i interesenti aicynuoti pīsadaleit iniciativys “Nezināmā Rēzekne” organizātajā zynuotnis populariziešonys lekceju rudiņa cyklā, kas teik organizāts sadarbeibā ar Rēzeknis Muokslys nomu, informej organizatoru puorstuovs Andris Uškāns.

Pyrmuo lekceja nūtiks sastdiņ, 7. oktobrī, 13.00 stuņdēs. Tū vadeis Latgolys Kulturviesturis muzeja viesturnīks, viesturis doktors i zemis reformys Latgolā pietnīks Vladislavs Malahovskis. Leidz Latvejis agrarajai reformai (1920–1937) sādža, cīms aba sola beja dominejūšais cylvāku dzeivuošonys veids Latgolys laukūs. Itamā lekcejā apsavērs: sādžu izaveiduošonys faktorus i plānuojuma veidus; šņūru zemu izaveiduošonys i saimnīkuošonys principus; sādžu kai saimnīcysku i socialu kūpīnu, kas ar nūraidejumu izaturēja pret vysaidim jaunynuojumim; sādžu sasadaleišonys vīnsātuos procesu i rezultatus.

Nedeļuos iz prīšku paradzāta ari viesturnīka Agra Dzeņa lekceja par arhivu dokumentu izmontuošonu viesturis pietejumūs, pietneicys Ievys Pīguonis stuostejums par apgierba viesturi i tuos aizkulisem godu symtu gaitā, arhitekta Juoņa Krastiņa prīšklasejumu par Latgolys arhitekturys pērlem, iniciativys “Nezināmā Rēzekne” puorstuova Andra Uškāna stuostu par kartografejis viesturi, kai ari viesturnīka Andra Tomašūna pasadaleišonu pīredzē, kū dareit, ka sovā duorzā atrūņ vydslaiku zūbynu.

Vysys lekcejis nūtiks Rēzeknis Muokslys nomā (18. novembra īla 26). Pīsadaleit var vysi interesenti par breivpruoteigim zīduojumim. Kab registrātūs lekcejom, lyugums aizpiļdeit pīsacejuma anketu.

“Nezināmā Rēzekne” ir piļsātplānuošonys, arhitekturys, kulturviesturis i etnografejis pieteišonys entuziasti, kas eistynoj vysaidys lokalū vidi pylnveidojūšys i sabīdreibu izgleitojūšys iniciativys. Nu Facebook lopys, kur cylvāki doluos ar sovim stuostim par Rēzeknis viesturi, “Nezināmā Rēzekne” puorsavārtuse par dūmubīdru grupu, kas nu ituo gods maja gondreiž kotru nedeļu sasateik vysaiduos piļsātys vītuos i dūdās naleluos ekspedicejuos voi puorguojīņuos, atkluojūt sev kū nibejs jaunu par it kai jau tik zynomū Rēzekni. Vīns nu iniciativys mierku ir dūt vareibu prīškstotu par viesturi sajimt nu profesionaļu, deļtuo ari niu teik organizāts lekceju cyklys.