Jau septeitū reizi varēs raksteit diktatu ari latgaliski

Jau septeitū reizi varēs raksteit diktatu ari latgaliski

Rokstu sagataveja: portals lakuga.lv

Oktobra vydā teik svieteita Vaļsts volūdys dīna i dīnu pyrma tuos, 14. oktobrī, puorbaudeit sovys zynuošonys i prasmis latgalīšu rokstu volūdā aicynuos ari septeitais diktats latgalīšu volūdā. Diktats skanēs Latvejis Radejis 1 eterā raidejumā “Kolnasāta” sastdīnis vokorā 18.20 stuņdēs, kai ari video formatā byus nūsaverams Sabīdryskūs medeju portalā LSM.lv i latgalīšu kulturys ziņu portalā lakuga.lv. Taipat itūreiz diktatu varēs pīraksteit kluotīnis pasuokumā Latgolys viestnīceibā “Gors” Rēzeknē. Ituo gods diktatā aktrise Katrīna Griga skaiteis speciali diktatam raksteitū literatis i žurnalistis Laurys Melnis tekstu. Diktatu organizej Latvejis Radejis Latgolys multimedeju studeja, latgalīšu kulturys kusteiba “Volūda” i portals lakuga.lv.

Niu jau par tradiceju, svietejūt Vaļsts volūdys dīnu, palykuse pasauļa diktata latvīšu volūdā raksteišona, kas itūgod byus deveitū reizi (vaira par IX pasauļa diktatu latvīšu volūdā var izzynuot raksti.org). Tok, izsverūt latvīšu volūdys byušonu vysaidai, kotrys grybātuojs sevkur pasaulī jau septeitū reizi teik aicynuots paraudzeit spākus raksteišonā ari latgaliski, kas ir ūtrei normātuo latvīšu volūdys rokstu tradiceja. Koč ari kasdīnys saziņā latgalīšu volūdu izmontoj aptyvai 9 % Latvejis dzeivuotuoju, tok itūšaļt tuos vuiceišona rokstu formā kai breivpruoteiga interešu izgleiteibys īspieja teik pīduovuota viņ nadaudzi školuos Latgolā.

Septeitais diktats latgalīšu rokstu volūdā skanēs sastdīnis, 14. oktobra, vokorā 18.20 stuņdēs latgaliskajā raidejumā “Kolnasāta” Latvejis Radejis 1 eterā, kai ari video formatā varēs vērtīs Latvejis Sabīdryskūs medeju portalā LSM.lv i latgalīšu kulturys ziņu portalā lakuga.lv, taipat Latvejis Radejis Latgolys studejis i portala lakuga.lv socialūs teiklu profilūs. Itūreiz diktatu reizē ar radejis klauseituojim 14. oktobrī 18 stuņdēs interesenti aicynuoti raksteit ari kluotīnē Rēzeknē, Latgolys viestnīceibā “Gors”.

Diktata teksta skaiteišona itūgod izticāta Dailis teatra aktrisei Katrīnai Grigai, kura poša īt nu Latgolys i kurys bolss itūgod paleidzēja īdzeivynuot ari pyrmū radejis īstudiejumu latgaliski – Alda Bukša kriminalromanu “Bruoli” –, kurā Katrīna īsajute igauņu izmaklātuojis Kersti lūmā. Septeituo latgalīšu rokstu volūdys diktata teksts, kas sagataveits, īvārojūt 2007. godā apstyprynuotūs nūsacejumus, piec tuo nūslāguma puorbaudeišonai byus daīmams portalūs lakuga.lv i LSM.lv. Tekstu speciali diktatam radejuse portala lakuga.lv redaktore, pyrmuo komiksa latgalīšu volūdā “Sunāns breiveibā” autore Laura Melne, kurei itūgod Storptautyskajā Jāņa Baltvilka bolvā sajēme AS “Latvijas valsts meži” bolvu “Jaunaudze” par debeju bārnu literaturā. Diktata teksts ļaus īsavērt kaida bārna puordūmu pasaulī i sadzeivē ar vacuokim i babu.

Latgalīšu volūdys diktata raksteit grybātuojim ari itūgod teik pīduovuota vareiba tekstu raksteit tīšsaistis formatā, kai ari, ka ir gribiešona, īsnēgt tū klaidu puorbaudeišonai. Tū varēs dareit ite: ej.uz/LTGdiktats2023.

Diktatu latgalīšu rokstu volūdā organizej latgalīšu kulturys kusteiba “Volūda”, latgalīšu kulturys ziņu portals lakuga.lv i Latvejis Radejis Latgolys multimedeju studeja, bet atbolsta Latvejis Radeja, Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu i Vaļsts kulturkapitala fonds. Diktata raksteišona kluotīnē Rēzeknē ir ari vīna nu spēlis “Latgalīšu volūdai draudzeiga vīta – ite Rēzekne!” aktivitašu.

Print Friendly, PDF & Email

Kalenders

Mar
2
Sai
18:00 Latgalīšu kulturys goda bolva “B... @ Latgolys viestnīceiba "Gors"
Latgalīšu kulturys goda bolva “B... @ Latgolys viestnīceiba "Gors"
Mar 2 @ 18:00 – 20:30
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]
21:15 Latgalīšu kulturys goda bolva “B... @ LTV1
Latgalīšu kulturys goda bolva “B... @ LTV1
Mar 2 @ 21:15 – 23:15
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]
23:15 Kina “Cylvāka bārns” @ LTV1
Kina “Cylvāka bārns” @ LTV1
Mar 2 @ 23:15 – Mar 3 @ 01:00
Tei ir pyrmuo latgalīšu kina – Latgolā (Sakstagolā) filmāta i pošu latgalīšu spākim veiduota. Kina ir baļsteita iz Juoņa Klīdzēja romana ar taidu pošu nūsaukumu motivim. Stuosts par Latgolys Paulānu saimis dzeivi, par tradicejom i[...]