Rokstu sagataveja: portals lakuga.lv

Literari muzykaluo Andrejdīna nu 1998. gods leluokā voi mozuokā mārūgā i skaniejumā bejuse Latgolys kulturys telpā. Itūgod 30. novembrī 18.00 stuņdēs tū svieteis Lūznovys muižā – ar literata Oskara Seiksta gruomotys “Atīsmis” attaiseišonu, jaunīšu nūmetnis izstuodis “Sūpluokīšu dzymtu stuosti” nūslāgumu i literarū kabare, kas ļaus nūsaceit ituo gods Uoksta capuris sajiemieju – spicuokū tekstu i juo autoru, viestej Latgalīšu kulturys bīdreibys vadeituoja i projektu koordinatore Ilga Šuplinska.

Literats Oskars Seiksts 15. novembrī svieteis opolu jubileju. Lai ari juo veikums vaira ir zynoms 21. godu symta suokuos, Oskars turpynoj dzeivuot volūdā ari tagad. Kruojums “Atīsmis” ir juo pādejūs godu dzejis, filozofisku puordūmu par sātu, saknem, breiveibu i volūdu apkūpuojums. Kai gruomotys dalykumvuordūs roksta juo draugs i pyrmūs tekstu leidzradeituojs Valentins Lukaševičs: “Volūdā kotrys vuords ir kai tukša skaline – mozeņa, videja ci lela. Oskars tuos skalinis rauga pošjādzyski saveikšēt, pīštopēt ar skoniskom, saturiskom, metaforiskom i cytom nūzeimem tik pylnys, ka aiz rūktura i baist pajimt – var puorlyuzt.”

Gruomotā varēs īpasazeit ari ar mozuok zynomu O. Seiksta byuteibu – juo pietnīceibys aizsuokumus ar polonismismim Jezupa Macileviča “Pavuiceišonā..” (1850) i latgalīšu volūdā. Gruomotā ir ap 300 polonismu, kas īguojuši latgalīšu zemnīka kasdīnā 19. godu symta vydā, daudzi iz palikšonu latgalīšu volūdā, akceņtej Ilga Šuplinska. Sovpus izstuode “Sūpluokīšu dzymtu stuosti” sovu ceļuojumu nūslēgs taišni Andrejdīnā, ļaunūt vēļ pošim sūpluokīšim i gostim pasaceineit izstuodis labirintūs. Vaira par izstuodi var skaiteit ITE.

Vysam pa vydu byus literarais kabare, kas nu 2003. gods ir bejs veids, kai jaunī teksti (i autori) sasateik ar jau zynomajim, kai raksteituojs sateik sovu skaiteituoju. Itūreiz byus vareiba tymā pīsadaleit ari attuolynuotai (kab pīsasaceitu, da 20. novembra juoroksta: ilga.suplinska@gmail.com), tok emocejis i sarunys kluotīnē ari gaida sovus klauseituojus.

Par muzykalim puorsteigumim pasaryupēs Sovvaļnīks i Mareks, Kristaps Višs i Dana Vasiļjeva, kas zeimoj, ka skanēs spieceigi latgalīšu teksti i individualu rūkrokstu muzyka. Varēs īpasazeit ari ar viļānīti Emīlu Loginu, kas beja vīns nu sūpluokīšu i īdedze ar sovu muzykalū aizrauteibu ari cytus.