Rokstu sagataveja: portals lakuga.lv

Muzykys projekts “Vuordi”, kurā dorbojās Edijs Rancāns, klauseituojim pīduovoj sovu pyrmū albumu “Dzīdynuošonys”. “Tys ir par cylvāka īškejim dzeišonys i izaugsmis procesim. Naatkareigi nu to, kas ir bejs uzplāsts, systs, nūbruozts dvēselī voi kerminī. Cylvākam juobyut puori vysam, naatkareigi ni nu kuo,” par albuma viestejumu stuosta Edijs.

“”Dzīdynuošonys” ir par sevis saprasšonu, īrostuos kasdīnys maineišonu i īšonu paceli nu komforta zonys, kas mādz byut kai mentali, tai fiziski gryuši. Reizem ruodīs pat napanasami. Par tū, ka atpakaļceļa bīži viņ nav i vysys važys juoraun nūst, lai kū ari kaids cyts dūmuotu voi saceitu. Kotra dzīsme ir mozs pūsmys dzeišonys celā,” albumu raksturoj Edijs Rancāns.

Projekta vuordi dzīšmu muzykys i vuordu autors, kai ari izpiļdeituojs ir pats Edijs Rancāns. Jis stuosta, ka gondreiž vyss albums tyka īraksteits sātys apstuokļus. Par miksiešonu i māsteriešonu Edijs pasasoka Guntaram Poplavskim, sovpus par vysleluokū atbolstu – sovai sīvai Kristiānai Rancānei.

Albums “Dzīdynuošonys” niu ir atrūnams vysuos straumiešonys vītuos. Taipat “Vuordi” itūrudiņ ari suokuši aktivu koncertiešonu kai Latgolys, tai ari Reigys kulturtelpuos.