Dzīsmē “Soka Saule rītiedama” izskaņ veļtejums Latgolys teiciejai Domicellai Līpeņai

Dzīsmē “Soka Saule rītiedama” izskaņ veļtejums Latgolys teiciejai Domicellai Līpeņai

Rokstu sagataveja: portals lakuga.lv

Decembra suokumā etnomuzike Liene Skrebinska publicējuse videoklipu i jaunu verseju dzīsmei “Soka Saule rītiedama” – veļtejumu Latgolys teiciejai Domicellai Līpeņai.

Videoklipā, kas papyldynuots ar teiciejis fotografeju i animacejom (videoklipu taisejuši Mārtiņš Skrebinskis i Ramas Ramales), īmyužynuota dzīsme “Soka Saule rītiedama” kai Lienis Skrebinskys, tai Domicellys Līpenis (Domicela Līpeņš, 1901–1992) bolsūs. Latgalīšu tautysdzīsmi sovulaik, 1991. godā, nu teiciejis īrakstejs etnomuzykologs Mārtiņš Boiko i muzikologe Gita Lancere, bet Liene tū veļtej kai teiciejai, tai ari sovai babai Marijai Lizbovskai (1949–2021). Pi dzīsmis īroksta myusu dīnu versejā Lienei tolkā guojs juos studeju bīdrys, tūpūšais skaņu režisords Eduards Reitmans.

Liene soka: “Domicella Līpeņa ir cīši sirsneiga i patīsa. Jei unikala teicieja, sovuos teiktajuos dzīsmēs jei izmontoj daudzi ornamentu i rūtuojumu – tūs var klauseitīs, pieteit i nu tuo smeļt vuiceibu i īdviesmi. Itei dzīsme “Soka Saule rītiedama” sasasauc ar munu pošys dzeivi, paleidz puordzeivuot skumis dabiskā veidā, taipat dzīsme poša par sevi ir cīši skaista, dziļa i latgaliska.”

Itei nav pyrmuo i nabyus pādejuo reize, kod jaunuo muzike, kura bejuse folklorys draugu kūpys “Vīteri” daleibneica, piečuok tradicionalū muzyku vuicejusēs Latgolys Muzykys i muokslys školā (tūlaik Juoņa Ivanova Rēzeknis muzykys školā) i niu studej Igaunejis Muzykys i teatra akademejā. Īrostuokais etnomuzykologu ceļš ir studejis Jāzepa Vītuola Latvejis Muzykys akademejā, tok Liene Skrebinska zynuošonys izalasejuse papyldynuot Igaunejā. Par itaidu izvēli etnomuzike soka: “Es gribieju ceļuošonys pīredzi, padareit plotuokys sovys zynuošonys par folkloru, i, kod pabeidžu vydsškolu Rēzeknē, ruodejuos, ka niu asu breiva i varu eistynuot sovus sapynus.”

Jau svātdiņ, 17. decembrī, Lienis bolsu varēs dzierdēt apvīneibys “SABIA Music” koncertā “Māras dziesmas” Rēzeknis nūvoda Lūznovys muižā. Portals lakuga.lv raksteja, ka tei ir apvīneiba, kurys muzykā sasavyn tautys muzykys, vydslaiku senejūs bazneicu i ambientuos muzykys skanis. Augustā tyka publicāts apvīneibys jaunuokais skaņdorbs – verseja sovulaik teiciejis Domicellys Līpenis dzīduotajam “Ūgu bolsam”. Kai soka Liene, tod nu svātdīnis koncerta tuo apmaklātuoji var gaideit pateikamu atpyutu i Zīmyssvātku sajiutu vydslaiku i tradicionaluos muzykys skaņuos.

Taipat dreižumā gaidoms ari Lienis Skrebinskys i muosu Katrīnys Karelis i Annys Karelis, ar kurom muzike īpasazynuse kūpeigūs folklorys pasuokumūs, kūpdorbs vēļ vīnā Domicellys Līpenis dzīsmē “Zīmeņa”. Tuos dzīsmis stuosts i vielejums ir napīlaist klaidys sovuos dzeivis izvēlēs. “Tys kai mums, tai i vysim cylvākim ir aktuali,” nūsoka etnomuzike, aicynojūt gaideit muzykys jaunumus.


Print Friendly, PDF & Email

Kalenders

Mar
2
Sai
18:00 Latgalīšu kulturys goda bolva “B... @ Latgolys viestnīceiba "Gors"
Latgalīšu kulturys goda bolva “B... @ Latgolys viestnīceiba "Gors"
Mar 2 @ 18:00 – 20:30
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]
21:15 Latgalīšu kulturys goda bolva “B... @ LTV1
Latgalīšu kulturys goda bolva “B... @ LTV1
Mar 2 @ 21:15 – 23:15
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]