Grupys “Laimas Muzykanti” albums “Turu buru!” nomināts bolvai “Zelta mikrofons”

Grupys “Laimas Muzykanti” albums “Turu buru!” nomināts bolvai “Zelta mikrofons”

Rokstu sagataveja: portals lakuga.lv

Svineigā ceremonejā izziņuoti Muzykys īrokstu goda bolvys “Zelta mikrofons” nominanti, kai ari sadarbeibys partneru simpatejis. Kategorejā “Tautys voi pasauļa muzykys albums” nomināts ari grupys “Laimas muzykanti” īroksts “Turu buru!”. Latgalīšu volūdu var dzierdēt ari cytūs ituos nominacejis albumūs.

Kategorejā “Tautys voi pasauļa muzykys albums” nomināti: tautys muzykys albums “Devums”, saimu folklorys kūpys “Garataka” īroksts “Izmeklētas meldijas un tādā garā”, bungu i dūdu muzykys grupys “Auļi” albums “Ķekatās”, izlase “Sviests 10”, kai ari folkroka grupys “Laimas Muzykanti” albums “Turu buru!”. Vysūs nu tūs var dzierdēt vysmoz vīnu dzīsmi latgaliski.

“Turu buru!” ir grupys “Laimas Muzykanti” catūrtais studejis albums. 2003. godā izdūts grupys pyrmais albums “Gonam gona”, 2007. godā “Orkla bolss”, bet 2015. godā “Rodi”. Jaunuokajā albumā īkļautys divpadsmit styla i žanru ziņā vysaiži aranžātys tautysdzīsmis. Tuos skaņ bluegrasslatino, smoguo roka i cytūs stylūs. Aranžejis taisejuši vysi grupys dalinīki kūpeiguos īrokstu sesejuos, poši īspieliejuši ari vysaidu tautu muzykys instrumentus, kū var dzierdēt albumā. Izmontuoti naviņ tradicionalī elektriskī i akustiskī skotivis instrumenti, nu ari buzuki, īru flautys, mandolinys, akordeons i c. Vaira par albumu var puorskaiteit muzykys žurnalista Kaspara Zavileiska recenzejā ITE.

Albuma radeišonā pīsadalejuši muziki: Artūrs Uškāns (grupys liders, vokals, akordeons, stabulis, dūdys, tausteni), Matīss Uškāns (bundys), Baiba Ērgle (vokals), Armands Varslavāns (gitara, buzuki), Inga Zeile (vejūle, vokals), Tatjana Gruničeva (bass), Ilze Fārte (vokals), Kristaps Strods (bass), Megija Zonne, Ilze Borodkina, Irbe Sedleniece i Edgars Skrāgis (bekvokali). “Turu buru!” muzykaluo materiala veiduošonā pīsadalejuse ari izcyluo muzike Sintija Šteinkopfa.

Taipat latgalīšu volūdu var dzierdēt ari kategorejā “Hiphop muzykys albums” nominātajā bītmeikeru dueta “Netīrās cilpas” īrokstā “Melnezera grāmata”, kura tapšonā pīsadalejuse Latgolys repa apvīneibys “Ausmeņa Records” puorstuovi Ūga, Bruolāns i Kvāps. Repere Ūga pīsadalejuse ari muzika Shipsea koncertā “Apgaismo mani”, kas nomināts kategorejā “Lobuokais koncertīroksta video”.

Sovpus kategorejis “Džeza, fanka voi soula muzykys albums” nominantu vydā atrūnami diveji albumi ar muzika Matīsa Čudara daleibu, ar kurū naseņ varēja skaiteit interveju portalā lakuga.lv. Nomināts kai Matīsa Čudara trio albums “Take Your Time”, tai trio “Auziņš, Čudars, Arutyunyan” albums “Tutti of Duty”. Tikom kategorejā par lobuokū debeju atrūnama dzīduotuoja Diona ar dzīsmi “Marionete”. Jaunuo muzike lelu daļu dzeivis pavadejuse Latgolā i sasadorbuojuse ari ar latgalīšu grupu “Bez PVN”. Ar pylnu nominantu sarokstu var īpasazeit ITE.

Bolvys “Zelta mikrofons” ceremoneja nūtiks 8. martā pasuokumu i konferenču centrā “ATTA CENTRE” (Krosta īla 60, Reiga). Pasuokumu vadeis Sanda Dejus i Mārtiņš Spuris i kluotīnē tū varēs apmeklēt ari skateituoji. Tīšraidē tam varēs sekuot leidza ari kanalā TV3.


Print Friendly, PDF & Email

Kalenders

Jun
15
Sai
all-day Gitys Palmys izstuode “Vilcienu ... @ Roberta Mūka muzejs
Gitys Palmys izstuode “Vilcienu ... @ Roberta Mūka muzejs
Jun 15 all-day
Nu 12. apreļa da 15. juņa Roberta Mūka muzejā Gaļānūs apsaverama muokslineicys Gitys Palmys gleznu izstuode “Vilcienu meitenes stāsts”. Izstuodē apsaveramys i vairuoku godu laika periodā radeituos, i publikai īprīšk naparuodeitys, kai ari pavysam jaunys[...]